وتىننىڭ جاڭا ءتۇرىن وندىرەدى

«Natural Gas + H2» بىرلەسكەن جوباسى «جاسىل سۋتەگى» ءوندىرىسىن قۇرۋعا جانە ونى تابيعي گازبەن وڭتايلى ارالاستىرۋعا باعىتتالعان. جاڭا تەحنولوگيا اتموسفەراعا بولىنەتىن كومىرقىشقىل ديوكسيدى قالدىقتارىن ازايتۋعا جانە ەكولوگيانى جاقسارتۋعا جول اشادى. ۋنيۆەرسيتەت عالىمدارى تاجىريبەلىك-ونەركاسىپتىك ۋچاس­كەدە الىنعان ناتيجەلەر بو­يىنشا جاڭاشىلدىقتى الماتى مەن اقتاۋ قالالارىنداعى جىلۋ ەلەكتر ورتالىقتارىنا ەنگىزۋدى ۇسىناتىن بولادى.

«ەۋرازيا ۇلتتىق ۋنيۆەر­سي­تە­تىنىڭ عىلىمي الەۋەتى زور ءارى مىقتى كادرلارى دا جەتكىلىكتى. ءبىز عالىمدارىمىزدىڭ عىلى­مي زەرتتەۋلەرىن قولداۋعا باسىم­دىق بەرەمىز. ۋنيۆەرسيتەت زەرت­تەۋشىلەرى ونەركاسىپتىك كاسىپ­ورىنداردىڭ اۋانى لاس­تاۋ دەڭگەيىن تومەندەتۋ ءۇشىن عىلىمدى قاجەتسىنەتىن جانە ەكولوگيالىق تازا جاڭا تەح­نولوگيالاردى ازىرلەۋ باعى­تىن­دا بەلسەندى ەڭبەك ەتەتىنىن اتاپ وتكىم كەلەدى. ءبىزدىڭ پروفەسسور قايرات كۇتەربەكوۆتىڭ جەتەك­شىلىگىمەن عالىمدار توبى العاش رەت ەلىمىزدە سۋتەگى ەنەرگەتيكاسى تەحنولوگيا­لا­رىن دامىتۋ جوبالارىنا باس­تا­ماشىلىق تانىتىپ, ولاردى ىسكە اسىردى. بۇل مەموراندۋم شەڭبەرىندەگى حالىقارالىق ىنتى­ماقتاستىق ەكولوگيالىق تازا سۋتەگىن ءوندىرۋ جانە پايدالانۋ باعىتىندا قاناتقاقتى جوبالاردى قولعا الۋعا مۇمكىندىك بەرەدى. بىرلەسكەن كۇش-جىگەرىمىزدىڭ ناتيجەسى ەكولوگيانى ەداۋىر جاقسارتاتىن جانە زياندى قالدىقتاردى ازايتاتىن وتىن ءوندىرىسىنىڭ جاڭا تەحنولوگيا­لىق جەلىسىنىڭ ىسكە قوسىلۋى بولادى دەپ سەنەمىن», دەدى ۋنيۆەرسيتەتتىڭ ستراتەگيالىق دامۋ جونىندەگى پرورەكتورى دۋمان ايتماعامبەتوۆ.

ۋنيۆەرسيتەت عالىمدارى سۋتەگى ەنەرگەتيكاسى سالاسىندا 15 جىلدان بەرى عىلىمي قىزمەتپەن اينالىسىپ كەلەدى. ءبىلىم ورداسىندا ەۋرازيالىق فيزيكا-ەنەرگەتيكالىق زەرتتەۋلەر جانە عىلىمدى قاجەت ەتەتىن تەحنولوگيالار ينستيتۋتى تابىستى جۇمىس ىستەپ تۇر. وتكەن جىلى ۋنيۆەرسيتەت پەن «الماتى ەلەكتر ستانسالارى» اق قورشاعان ورتانى قورعاۋ جانە گاز-سۋتەگى وتىنىنىڭ قوسپاسىن پايدالانۋ باعىتىندا ىنتىماقتاستىق پەن ءوزارا ءىس-قيمىل تۋرالى مەموراندۋمعا قول قويعانىن ايتا كەتكەن ءجون.