ەلوردادا تالداۋ مەكتەبىندە وقۋدىڭ ءۇشىنشى كەزەڭى باستالدى. سەنات جانىنداعى جاس ساراپشىلار كلۋبىنىڭ بۇل باستاماسىنا پالاتا توراعاسى ماۋلەن اشىمباەۆ قولداۋ ءبىلدىرىپ, تاجىريبەسىمەن ءبولىستى. قوعامدىق جوبا بارىسىندا قاتىسۋشىلارعا ەلىمىزدىڭ جانە شەتەلدىك بەلگىلى ساراپشىلار دا ءدارىس وقيدى.
مەكتەپتىڭ ءۇشىنشى كەزەڭىنە قاتىسۋشىلارمەن كەزدەسكەن سەنات سپيكەرى بۇل قوعامدىق جوبا مەملەكەتتىك قىزمەتتە, بيزنەستە, حالىقارالىق ۇيىمداردا جانە باسقا دا سالالاردا جۇمىس ىستەيتىن جاس مامانداردىڭ اناليتيكالىق قابىلەتىن جەتىلدىرۋدى كوزدەيتىنىن اتاپ ءوتتى. جاڭا كەزەڭدەگى وقىتۋ باعدارلاماسى قازاقستاننىڭ ورنىقتى دامۋى تاقىرىبىنا ارنالىپ وتىر.
«پرەزيدەنت قاسىم-جومارت توقاەۆ ءوز ىسىنە شەبەر كاسىبي مامانداردىڭ جاڭا شوعىرىن قالىپتاستىرۋعا ۇنەمى باسا ءمان بەرىپ كەلەدى. وسىعان وراي ءبىز «تالداۋ مەكتەبى» جوباسى ارقىلى اتالعان ستراتەگيالىق مىندەتتى ىسكە اسىرۋعا ءوز ۇلەسىمىزدى قوسۋدى ۇيعاردىق. قازىرگى تاڭدا ەلىمىزدە اناليتيكالىق قابىلەتى جوعارى, بىلىكتى ماماندار دايارلايتىن ارنايى جۇيە جوق. كوبىنە بۇل جۇمىس جۇيەسىز جۇرگىزىلىپ, ءتيىستى دەڭگەيدە تيىمدىلىگىن كورسەتە الماي كەلەدى. سوندىقتان ءبىز كاسىبي ساراپشىلاردى شاقىرىپ, ولارعا جاس ارىپتەستەرىمەن ءوز تاجىريبەلەرىن بولىسۋىنە مۇمكىندىك بەرەتىن الاڭ قۇردىق», دەدى ماۋلەن اشىمباەۆ.
جالپى, ءۇشىنشى كەزەڭگە قاتىسۋعا نيەت بىلدىرگەن 400-دەن استام ءوتىنىم كەلىپ ءتۇستى. كونكۋرستىق كوميسسيا وتىنىمدەردى قاراۋ ناتيجەسىندە 60 ادامدى ىرىكتەپ الدى. ولار – اناليتيكالىق قۇرىلىمداردا, مەملەكەتتىك باسقارۋ جۇيەسىندە, ۇلتتىق كومپانيالاردا, عىلىمي-زەرتتەۋ ينستيتۋتتارىندا جانە باسقا دا سالالاردا تاجىريبەسى بار, سونداي-اق كەيبىرى PhD دارەجەسىنە يە ماماندار.
سەنات توراعاسىنىڭ ءدارىسى «مەملەكەتتىك باسقارۋداعى ورنىقتى دامۋدى كوزدەيتىن اناليتيكا» تاقىرىبىنا ارنالدى. سپيكەر ءوز سوزىندە بۇگىندە مەملەكەتتىك, ءدىني, ساياسي سياقتى ءتۇرلى ينستيتۋتتاردىڭ ىقپالى مەن بەدەلىنىڭ تومەندەۋ ۇردىسىنە نازار اۋداردى. ماۋلەن اشىمباەۆ ونىڭ ورنىنا بۇكىل الەمدە پوپۋليستىك قوزعالىستاردىڭ ىقپالى ارتىپ, ولار كوبىنە كۇن ءتارتىبىن قالىپتاستىراتىن نەگىزگى فاكتورلارعا اينالعانىن دا اتاپ ءوتتى. وسىنداي جاعدايدا, ەڭ الدىمەن, مەملەكەتتىك دەڭگەيدە دۇرىس شەشىم قابىلداۋ ءۇشىن اناليتيكالىق زەرتتەۋلەردىڭ ماڭىزى زور ەكەنى انىق.
«قازىرگى ەكونوميكالىق جانە ساياسي ۇدەرىستەردىڭ جالپى قاي باعىتتا ءوربىپ جاتقانىن, ونىڭ استارىن ءتۇسىنۋ اسا ماڭىزدى. الەمنىڭ جارقىن بولاشاعى كوبىنە حالىقارالىق قاۋىپسىزدىك جانە جاھاندىق ماسەلەلەردى ۇجىمداسىپ شەشۋدىڭ جاڭا ساليقالى جۇيەسىن قالىپتاستىرۋمەن بايلانىستى. وسىلايشا, ءبىز بەلگىسىزدىك بەلەڭ العان, ايقىن باعدارى جوق, الداعى وقيعالار مەن ولاردىڭ سالدارى قۇبىلمالى الەمدە ءومىر ءسۇرىپ جاتىرمىز. ءبارى تەز وزگەرەتىن مۇنداي الەمدە ەسكى تاسىلدەر مەن ۇلگىلەر بويىنشا ارەكەت ەتۋدىڭ كەلەشەگى جوق جانە ول مۇمكىن دە ەمەس. سوندىقتان قازىر اناليتيكالىق داعدىلار, سىني ويلاۋ, بولىپ جاتقان وقيعالارعا جۇيەلى جانە بايسالدى كوزقاراسى بار ماماندار سۇرانىسقا يە», دەگەن ماۋلەن اشىمباەۆ زەرتتەۋلەر جۇرگىزۋ, تالداۋ قابىلەتىن جەتىلدىرۋ بويىنشا ءوز تاجىريبەسىندەگى كەيستەرمەن ءبولىستى.
سونىمەن قاتار پالاتا توراعاسى كوماندامەن ءتيىمدى جانە ۇيلەسىمدى جۇمىستىڭ ماڭىزدىلىعىن اتاپ ءوتتى. سوندىقتان قاتىسۋشىلار ورنىقتى دامۋ ماقساتتارى بويىنشا بىرلەسكەن جوبالار دايىنداۋ ءۇشىن توپتارعا ءبولىندى. ولاردىڭ ارقايسىسىنا سالالىق ساراپشىلار, مەملەكەتتىك قۇرىلىمداردىڭ, عىلىمي جانە حالىقارالىق ۇيىمداردىڭ وكىلدەرى مەنتور رەتىندە بەكىتىلدى.
وقۋدىڭ العاشقى كۇنى «كۋرسيۆ» باسىلىمىنىڭ جانە «Qalam» مۋلتيمەديالىق جوباسىنىڭ باس ديرەكتورى ەلمار مۋرتازاەۆ پەن «Eurasian Center for People Management» باس ديرەكتورى, داعدارىس جانە ستراتەگيالىق كوممۋنيكاتسيالار ماسەلەلەرى جونىندەگى ساراپشى ەربول يسمايلوۆ ءدارىس وقىدى.
الداعى سەگىز اپتالىق وقۋ بارىسىندا ممۋ پروفەسسورى ناتاليا زۋبارەۆيچتىڭ, لي كۋان يۋ مەملەكەتتىك ساياسات مەكتەبىنىڭ پروفەسسورى يااكوب يبراگيمنىڭ جانە «پيشي, سوكراششاي» كىتابىنىڭ اۆتورى ماكسيم يلياحوۆتىڭ دارىستەرى دە جوسپارلانعان.
سونداي-اق تاريحشى, بەلگىلى ساياساتتانۋشى جانە شىعىستانۋشى سۇلتان اكىمبەكوۆ, قازاقستان پرەزيدەنتىنىڭ ىشكى ساياسات ماسەلەلەرى جانە كوممۋنيكاتسيالار جونىندەگى كومەكشىسى رۋسلان جەلدىباي, ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى جاندوس شايماردانوۆ تاعى باسقا سپيكەرلەر ءدارىس وقيدى.