قانشا قازاق جىگىتى دەكرەتتىك دەمالىستا ءجۇر, ولاردىڭ جاردەماقىسى قانشا تەڭگە بولدى

ەڭبەك كودەكسىنە سايكەس جۇمىس بەرۋشى اناسىنا نەمەسە اكەسىنە بالا ءۇش جاسقا تولعانعا دەيىن بالا كۇتىمىنە بايلانىستى دەمالىس بەرۋگە مىندەتتى. دەمالىس كەزىندە جالاقى ساقتالمايدى, بىراق دەكرەتتىك دەمالىسقا شىققان اتا-اناعا بىرنەشە جەڭىلدىك بەرىلەدى, سونىڭ ىشىندە:

بالا تۋىنا بايلانىستى بىرجولعى جاردەماقى; رەسپۋبليكالىق بيۋدجەتتەن 1,5 جاسقا دەيىنگى بالا كۇتىمى بويىنشا جاردەماقى (جۇمىس ىستەمەيتىندەرگە); مەملەكەتتىك الەۋمەتتىك ساقتاندىرۋ قورىنان تولەنەتىن الەۋمەتتىك تولەم.

ءبىرىنشى, ەكىنشى جانە ءۇشىنشى بالاعا رەسپۋبليكالىق بيۋدجەتتەن تولەنەتىن بىرجولعى جاردەماقى مولشەرى 38 ايلىق ەسەپتىك كورسەتكىشتى (اەك) نەمەسە اعىمداعى جىلى 131 100 تەڭگەنى, ءتورتىنشى جانە ودان دا كوپ بالاعا – 63 اەك (217 350 تەڭگە) قۇرايدى.

رەسپۋبليكالىق بيۋدجەتتەن بالا كۇتىمى بويىنشا اي سايىنعى جاردەماقىنىڭ مولشەرى ءبىرىنشى بالاعا – 5,76 اەك (19 872 تەڭگە), ەكىنشى بالاعا – 6,81 اەك (23 495 تەڭگە), ءۇشىنشى بالاعا – 7,85 اەك (27 083 تەڭگە) قۇرايدى. ءتورتىنشى جانە ودان دا كوپ بالاعا 8,90 اەك (30 705 تەڭگە) تولەنەدى.

ەكى نەمەسە ودان دا كوپ بالا تۋعان كەزدە كورسەتىلگەن تولەمدەر ءار بالاعا تاعايىندالادى.

بالانىڭ كۇتىمىنە بايلانىستى تابىسىنان ايىرىلعان جاعدايدا تولەنەتىن الەۋمەتتىك جاردەماقى ولار ءۇشىن الەۋمەتتىك اۋدارىمدار الىنعان جاعدايدا اناسىنا نەمەسە اكەسىنە تاعايىندالادى. اي سايىنعى تولەم بالا تۋعانعا دەيىن سوڭعى 24 اي ىشىندە الەۋمەتتىك اۋدارىمدار تولەنگەن ورتاشا ايلىق تابىستىڭ 40 پايىزىن قۇرايدى. بۇل جاردەماقى بالا ءبىر جارىم جاسقا تولعانعا دەيىن تولەنەدى. بۇل رەتتە, الەۋمەتتiك تولەمنiڭ ەڭ تومەنگi مولشەرi بيۋدجەتتەن تولەنەتiن ۇقساس اي سايىنعى مەملەكەتتiك جاردەماقىنىڭ مولشەرiنەن كەم بولماۋى, ال ەڭ جوعارى مولشەرi ەڭ تومەنگi جالاقىنىڭ جەتi ەسەلەنگەن مولشەرiنiڭ 40 پروتسەنتiنەن اسپاۋى كەرەك.

ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك قامسىزداندىرۋ جانە الەۋمەتتىك ساقتاندىرۋ دەپارتامەنتىنىڭ مالىمەتى بويىنشا, 2023 جىلدىڭ توعىز ايىندا جارتى ميلليونعا جۋىق ادام 198,6 ملرد تەڭگە كولەمىندە الەۋمەتتىك تولەم الدى. الۋشىلاردىڭ باسىم بولىگى (99,7 پايىزى) ايەلدەر بولسا, 0,3 پايىزى نەمەسە 1551 ادام ەر ادامدار. سونىمەن قاتار, 457 ەر ادام بيىل العاش رەت بۇل تولەمدى الدى.

«اعىمداعى جىلدىڭ توعىز ايىندا الەۋمەتتىك تولەمنىڭ ەڭ تومەنگى مولشەرى 19 872 تەڭگەنى (ونىڭ ىشىندە ەرلەر ءۇشىن - 22 080 تەڭگە), ەڭ جوعارىسى - 196 000 تەڭگەنى قۇرادى. دەگەنمەن, الەۋمەتتىك تولەمنىڭ مولشەرى بالا تۋىلعانعا دەيىنگى سوڭعى 24 ايداعى تابىسقا بايلانىستى ەكەنىن ەسكەرەمىز», - دەلىنگەن Tengrinews.kz رەداكتسياسىنىڭ رەسمي ساۋالىنا بەرگەن جاۋابىندا.