ارقايسىمىز ومىرىمىزدە ءبىر رەت بولسا دا قاعاز ىدىسپەن كوفە نەمەسە شاي ىشكەن شىعارمىز. ال كەيبىر ادامدار كۇنىن جۇمىسقا بارا جاتقاندا ىستىق سۋسىنسىز ەلەستەتە المايدى. نەلىكتەن كارتونعا نەمەسە قاعاز قوراپقا سۇيىقتىق قۇيساڭىز, ول ىلعالدانىپ كەتەدى دە شىنىاياقتار قالپىن ساقتايدى؟ بۇل تۋرالى ويلاپ كوردىڭىز بە؟
بارلىعى قاراپايىم: قاعاز شىنىاياقتا سۇيىقتىقتى ۇزاعىراق ساقتاۋعا مۇمكىندىك بەرەتىن قوسىمشا پوليەتيلەن قورعانىس قاباتى بار. ءبىر توپ عالىمدار مۇنداي ىدىستان ىستىق سۋسىنداردى ءىشۋدىڭ قاۋىپسىز ەكەنىن انىقتاۋعا شەشىم قابىلدادى.
زەرتتەۋشىلەر بەس ءتۇرلى ماركاداعى قاعاز شىنىاياقتارعا ىستىق سۋدى (85-90 گرادۋس تسەلسي) قۇيىپ, قورعانىس قاباتىنان فتوريد, حلوريد, سۋلفات جانە نيترات سياقتى يونداردىڭ بولىنەتىنىن انىقتادى.
تاجىريبە بارىسىندا 25 000 ميكرون پلاستماسسا بولشەكتەرى ءبىر ستاكان ىستىق سۋعا (100 ميلليليتر) 15 مينۋتتا تۇسەتىنى بەلگىلى بولدى. سونىمەن قاتار, عالىمدار اۋىر مەتالدار, اتاپ ايتقاندا پاللادي, حروم, كادمي جانە گيدروفوبتى جابىنداردا قولدانىلاتىن كەيبىر قاۋىپتى قوسىلىستار دا شىنىاياقتاردان ىستىق سۋعا تۇسەتىنىنە كوز جەتكىزدى.
ء"شاي مەن كوفە سياقتى ىستىق سۋسىنداردى كۇندەلىكتى تۇتىنۋ ارقىلى ميكروپلاستيكتەردىڭ, يونداردىڭ جانە اۋىر مەتالداردىڭ تۇراقتى اسەر ەتۋى بولاشاقتا ادامداردىڭ دەنساۋلىعىنا قاۋىپ ءتوندىرۋى مۇمكىن", دەپ ەسكەرتەدى زەرتتەۋشىلەر.