تۇركىستان وبلىسىندا زاڭسىز كوشى-قون ۇيىمداستىرعان ەر ادام ۇستالدى, ونىڭ ۇيىنەن 30 وزبەكستان ازاماتى تابىلدى, دەپ حابارلايدى Egemen.kz.
تۇركىستان وبلىسى پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆتىڭ مالىمەتىنشە, جەدەل-ىزدەستىرۋ جانە ارنايى ءىس-شارالار كەزىندە پوليتسەيلەر وزبەكستان رەسپۋبليكاسىنىڭ ازاماتتارىنا مەملەكەتتىك شەكارا ارقىلى زاڭسىز كىرۋ جانە شىعۋ ءۇشىن سىياقىعا قىزمەت كورسەتكەن جەرگىلىكتى تۇرعىندى انىقتادى.
«جۇرگىزىلگەن ارنايى وپەراتسيانىڭ ناتيجەسىندە جەدەل ۋاكىلدەر كۇدىكتىنى شەكارادان كەدەرگىسىز ءوتۋ بويىنشا قىزمەت كورسەتكەنى ءۇشىن 130 000 تەڭگە اقشالاي قاراجات العان ساتىندە قولعا ءتۇسىردى. سونداي-اق, ءتىنتۋ كەزىندە 2,5 ميلليون تەڭگەگە جۋىق اقشا, 2 ۇيالى تەلەفون مەن قۇجاتتاردى تاركىلەدى», دەدى ول.
پوليتسيا قىزمەتكەرلەرى تۇرعىننىڭ جازدىق ءۇيىن تەكسەرۋ كەزىندە, ەلدە بولۋ مەرزىمىن بۇزىپ جۇرگەن وزبەكستاننىڭ 30 ازاماتىن تاپتى. ۇستالعان ەر ادام ولارعا وزبەكستانعا كەدەرگىسىز شىعۋعا كەپىلدىك بەرگەن.
قازىرگى ۋاقىتتا وسى دەرەكتەر بويىنشا قىلمىستىق كودەكستىڭ 394-بابى 1-بولىگى (زاڭسىز كوشى-قوندى ۇيىمداستىرۋ) نەگىزىندە سوتقا دەيىنگى تەرگەۋ جۇمىستارى جۇرگىزىلىپ جاتىر.
كۇدىكتى قاماۋعا الىندى. وقيعانىڭ ءمان-جايى انىقتالىپ جاتىر.