تارازدا نارەستەنى ساتۋعا قاتىستى شۋلى ىسكە نۇكتە قويىلدى. ءىس جامبىل وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا قارالدى. ەكى دارىگەر كىنالى دەپ تانىلىپ, باس بوستاندىعىنان ايىرىلدى, دەپ حابارلايدى Egemen.kz.
Orda.kz ءتىلشىسىنىڭ مالىمەتىنشە, تارازداعى كوپسالالى اۋرۋحانانىڭ ەكى اكۋشەرىنە ايىپ تاعىلعان. ولار الدىن الا ءسوز بايلاسۋ ارقىلى ءبىر توپ ادامعا كامەلەتكە تولماعانداردى ساۋدالاعان. تەرگەۋ بارىسىندا انىقتالعانداي, وتكەن جىلدىڭ قاراشا ايىندا 35 جاستاعى ايەل جۇكتىلىگىنىڭ جەتىنشى ايىندا تۇسىك جاساتقىسى كەلگەن, سوتتالۋشى دارىگەرلەر ونى توقتاتقان. ناتيجەسىندە اياعى اۋىر ايەل نارەستەسىن دۇنيەگە اكەلەدى, بىراق ونى تاماقتاندىرۋدان باس تارتىپ, مەديتسينالىق مەكەمە قىزمەتكەرلەرىنەن بالانى الىپ كەتۋدى تالاپ ەتكەن.
ايەلدىڭ جاعدايىن وتباسىنان جاسىرعانىن تۇسىنگەن ب نارەستەنى ساتۋعا كومەك سۇراپ ارىپتەسى يۋ-عا حابارلاسادى. وزدەرىنىڭ قىلمىستىق نيەتىن جۇزەگە اسىرۋ ءۇشىن اكۋشەرلەر الدىن الا ءسوز بايلاسىپ, ءبىر توپ ادامعا ءسابيدى 1,5 ميلليون تەڭگەگە ساتپاق بولعان.
الايدا بۇل ىسكە قۇقىق قورعاۋ ورگاندارى ارالاستى. كەيبىر مالىمەتتەرگە سايكەس, ساتىپ الۋشى بالانى زاڭدى تۇردە ءوز فاميلياسىنا تىركەۋگە تىرىسقان. بۇل رەتتە بارلىق تولەم سوماسىنىڭ ءبىر ميلليونى بيولوگيالىق اناعا بەرىلۋى كەرەك بولسا, 500 مىڭى قۇجات راسىمدەۋگە جۇمسالادى دەپ جوسپارلانعان. ءسابيدى ساتىپ الۋشى, راستالماعان دەرەكتەر بويىنشا, ون جىل بويى ءوز بەتىنشە بالالى بولۋعا تىرىسقان.
ايىپتالۋشىلاردىڭ كىناسى جابىرلەنۋشىنىڭ زاڭدى وكىلىنىڭ, كۋالاردىڭ ايعاقتارىمەن, ساراپتامالىق قورىتىندىلارمەن جانە زاتتاي دالەلدەمەلەرمەن وبەكتيۆتى تۇردە راستالدى. دارىگەرلەر 8 جىلعا باس بوستاندىعىنان ايىرىلدى. بالا تاعدىرىن سوت شەشكەنشە بالالار ۇيىندە بولادى. ۇكىم ءالى زاڭدى كۇشىنە ەنگەن جوق.