جىل سايىن پوليتسيا 30 توننادان استام ەسىرتكىنى انىقتايدى. ونىڭ نەگىزگى بولىگى - ەلىمىزدىڭ وڭتۇستىك ايماقتارىندا وسىرىلگەن قاراسورا, دەپ حابارلايدى Egemen.kz.
سونىمەن قاتار 450 كەلىگە جۋىق سينتەتيكالىق ەسىرتكى تاركىلەنەدى.
زاڭسىز اينالىمنان الىنعاننان كەيىن ولاردى نە ىستەيتىنىن ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ باستىعى قاجىعالي يماجانوۆ ايتىپ بەردى.
– تاركىلەنگەن ەسىرتكى دەرەۋ ساراپتاماعا جىبەرىلەدى. سول ءۇشىن ولاردىڭ ءار پارتياسىنان وسى ەسىرتكىنىڭ اسا ۇلكەن مولشەرىنە تەڭ ۇلگى الىنادى. ول قىلمىستىق ىسكە قوسىلىپ, زاتتاي ايعاقتار كامەراسىنا تاپسىرىلادى. قالعان ەسىرتكى پوليتسيا, پروكۋراتۋرا جانە دەنساۋلىق ساقتاۋ ورگاندارى قىزمەتكەرلەرىنىڭ قاتىسۋىمەن مىندەتتى فوتو جانە بەينە ءتۇسىرىلىم جاسالا وتىرىپ, كوميسسيالىق تۇردە جويىلادى. سوت ۇكىمى كۇشىنە ەنگەننەن كەيىن ءىس بويىنشا دالەلدەمەلەر رەتىندە ءوتىپ جاتقان ەسىرتكى ۇلگىلەرى دە جويىلادى, – دەدى يماجانوۆ.
سپيكەردىڭ سوزىنشە, ەسىرتكىنى جويۋ ارنايى جابدىقتالعان پەشتەردە جۇرگىزىلەدى. قالعان كۇل حيميالىق وڭدەۋدەن وتەدى, بۇل ولاردى تولىعىمەن جويۋعا مۇمكىندىك بەرەدى.
– جويىلعانعا دەيىن پوليتسيا تاركىلەنگەن ەسىرتكىنى قورعاۋدىڭ كۇشەيتىلگەن شارالارىن قابىلدايدى. بۇل اسىرەسە قۇرامىندا ەسىرتكى بار وسىمدىكتەردىڭ سالماعى ءبىر فاكتى بويىنشا جەتى تونناعا جەتۋى مۇمكىن جانە ەسىرتكىنىڭ مۇنداي كولەمىن زاتتاي ايعاقتار كامەراسىندا ساقتاۋ مۇمكىن بولمايتىن كەزدە, وسىرىلگەن قاراسورا داقىلدارىن جويۋ كەزىندە ەرەكشە ماڭىزدى, – دەپ اتاپ ءوتتى دەپارتامەنت باستىعى.
مىسالى, قىركۇيەك ايىندا پاۆلودار وبلىسىندا ەسىرتكىگە قارسى كۇرەسۋشى پوليتسەيلەر 60 كەلىدەن استام اۋعان گەروينىن تاركىلەدى – بۇل ەلىمىزدىڭ ىشكى قارا نارىعىنداعى سوڭعى جىلدارداعى رەكوردتىق پارتيا. ونىڭ قۇنى 915 ملن تەڭگەدەن استى.
وسى تاۋەكەلدەردى ەسكەرە وتىرىپ, پوليتسەيلەرمەن قىلمىسكەرلەر ۇستالىپ, گەروين تاركىلەنگەن ساتتەن باستاپ ارنايى ماقساتتاعى جاۋىنگەرلەر تارتىلا وتىرىپ, كۇزەت ۇيىمداستىرىلدى. ەسىرتكى جويۋ ورنىنا دا كۇشەيتىلگەن اسكەريلەندىرىلگەن كۇزەتپەن جەتكىزىلدى.
ۆەدومستۆودا تۇسىندىرىلگەندەي, قازىر سينتەتيكالىق ەسىرتكىنىڭ جاسىرىن وندىرىستەرىنەن الىناتىن پرەكۋرسورلاردى جويۋ وزەكتى بولىپ وتىر. وسى جىلدىڭ 9 ايىندا ەسىرتكى وندىرىسىندە قولدانىلاتىن 79 توننادان استام حيميكاتتار تاركىلەندى.
ناشاقورلىققا جانە ەسىرتكى بيزنەسىنە قارسى كۇرەس جونىندەگى 2023-2025 جىلدارعا ارنالعان كەشەندى جوسپارعا سايكەس 2024 جىلدىڭ ءبىرىنشى جارتىجىلدىعىندا قىلمىستىق ىستەر بويىنشا زاتتاي ايعاقتار رەتىندە تاركىلەنگەن پرەكۋسورلاردى, ۋلى زاتتاردى جانە باسقا دا حيميالىق ونىمدەردى قاۋىپسىز جويۋ ءۇشىن ونەركاسىپتىك سۋبەكتىلەرگە وتەۋسىز نەگىزدە بەرۋ الگوريتمدەرى ازىرلەنەتىن بولادى.