استاناداعى ەسىل اۋدانىنىڭ اكىمدىگى مەرەكەلىك بەزەندىرۋ جۇمىستارىنا 848 ميلليون تەڭگە جۇمساماق, دەپ حابارلايدى Egemen.kz.
كتك تەلەارناسىنىڭ مالىمەتىنشە, كوپشىلىكتىڭ نازارىن اۋدارعان ميلليوندار مەملەكەتتىك ساتىپ الۋ سايتىنا شىققان. وندا بايقاۋعا قاتىسۋعا ءوتىنىش 2 قاراشاعا دەيىن جالعاساتىنى كورسەتىلگەن.
اكىمدىكتەگىلەردىڭ سوزىنشە, ەسىل اۋدانى ەلوردانىڭ سول جاعالاۋداعى كورنەكتى ورىنداردى قامتيتىن بولعاندىقتان, وسىنشاما قىرۋار قاراجاتتىڭ قاراستىرىلۋى زاڭدىلىق. باسقا وڭىرلەردەن كەلەتىن قوناقتار مەن تۋريستەر دە وتە كوپ. كۇندەلىكتى قوعامدىق, مادەني ورىندار, الاڭدار مەن ساياباقتاردا ەلوردا تۇرعىندارى بوس ۋاقىتتارىن وتكىزەدى. ساتىپ الۋ سايتىنداعى تاپسىرىس الداعى مەرەكەلەرگە, ياعني رەسپۋبليكا, تاۋەلسىزدىك كۇنى مەن جاڭا جىلداعى بەزەندىرۋگە جۇمسالادى دەپ وتىر. سونىمەن قاتار ەسىل اۋدانى اكىمدىگىنىڭ جاۋابىندا مەرەكە كۇندەرى سول جاعالاۋدىڭ باستى كوشەلەرى مەن كوپىرلەرى جالاۋلارمەن ساندەلەدى دەلىنگەن.
“ەسىل اۋدانىندا شەت مەملەكەتتەردىڭ رەسمي دەلەگاتسيالارىنىڭ قاتىسۋىمەن حالىقارالىق ءىسشارالار وتكىزىلىپ جاتقانىن ەسكەرە وتىرىپ, وسى مەملەكەتتەردىڭ تۋلارى مەن باعداردى ءتيىستى تۇردە جوبالاۋ, شاعىن ارحيتەكتۋرالىق پىشىندەردى, پوديۋمداردى, ساحنالاردى شىعارۋ, ورناتۋ جانە دەمونتاجداۋ, كوپشىلىك ءىس-شارالار, سونىڭ ىشىندە كونتسەرتتەر, اشىق اسپان استىنداعى, كورمە, جارمەڭكە وتكىزۋ ءۇشىن كيىز ۇيلەر بەرىلەدى”, –دەلىنگەن ەسىل اۋدانى اكىمدىگىنىڭ حابارلاماسىندا.