ءماجىلىستىڭ جالپى وتىرىسىندا دەپۋتات ءادىل جۇبانوۆ ەڭ تومەنگى زەينەتاقى مولشەرىن ەڭ تومەنگى جالاقىمەن تەڭەستىرۋدى ۇسىندى, دەپ حابارلايدى Egemen.kz.
«زەينەتكەرلەرگە لايىقتى ءارى جاقسى زەينەتاقى تولەۋ – ەل تۇرعىندارىن قورعاۋ ەلەمەنتى. ەلدەردەگى زەينەتاقى مولشەرى نەگىزىندە سول ەلدىڭ ەكونوميكالىق دامۋ دەڭگەيىن, دەموگرافيالىق جاعدايدى جانە الەۋمەتتىك سالاداعى مەملەكەتتىك ساياساتتى انىقتاۋعا بولادى. قاراپايىم حالىقتىڭ ءال-اۋقاتى قانشالىقتى جاقسارىپ جاتقانى مەملەكەتتىك جاردەماقىلار مولشەرىنىڭ ارتۋىنان بايقالادى. قازاقستاندا 30 جىل ىشىندە الەۋمەتتىك سالا بويىنشا شەشىمىن تاپپاعان ەڭ باستى ماسەلە – حالىقتىڭ الەۋمەتتىك جاعدايىنىڭ تومەندىگى. ەلىمىز باي بولسا دا, الەۋمەتتىك قولداۋدى قاجەت ەتەتىن از قامتىلعان حالىق سانى جىل سايىن ارتىپ وتىر. شىن مانىندە, 30 جىلدا ەڭ تومەنگى جالاقى مەن زەينەتاقىنى مىسە تۇتىپ كەلەمىز. بۇل حالىقتىڭ قارىزعا كىرىپ, نەسيەنىڭ قۇرىعىنا تۇسۋگە يتەرمەلەيدى. مەملەكەت بەلگىلەگەن ەڭ تومەنگى زەينەتاقى مولشەرi – 57 853 تەڭگەگە ءومىر ءسۇرۋ مۇمكىن ەمەس», دەدى دەپۋتات ۇكىمەت باسشىسىنىڭ ورىنباسارى تامارا دۇيسەنوۆانىڭ اتىنا جولداعان دەپۋتاتتىق ساۋالىندا.
ايتۋىنشا, ەلدەگى زەينەتاقى جۇيەسىن قايتا جاڭعىرتۋ كەرەك.
«بۇل رەتتە ەڭ از زەينەتاقى الاتىن زەينەتكەرلەردىڭ زەينەتاقىسىن كوبەيتۋدىڭ ماڭىزى زور. زەينەتاقىنىڭ ەڭ تومەنگى بازالىق مولشەرلەمەسىن ەڭ تومەنگى جالاقى مولشەرىمەن تەڭەستىرۋ قاجەت. زەينەتاقى جۇيەسىندەگى ءتيىمدى وزگەرىستەر – زەينەتكەرلەردىڭ الەۋمەتتىك جاعدايىنىڭ, ءومىر ءسۇرۋ ساپاسىنىڭ از دا بولسا ارتۋىنىڭ بىردەن-ءبىر كورسەتكىشى. ءبىزدىڭ ەلدە زەينەتكەردىڭ ەڭ تومەنگى زەينەتاقىسى ءدارى-دارمەك پەن دۇرىس دەمالۋدى ايتپاعاندا, تاماعىنا ارەڭ جەتەدى. بيىل ەڭ تومەنگى جالاقى 70 مىڭ تەڭگەگە كوتەرىلسە, كەلەسى جىلى 85 مىڭ تەڭگەگە دەيىن جەتكىزۋ مىندەتى قويىلدى. ال, وسى ەڭ تومەنگى جالاقى مولشەرى ەڭ تومەنگى كۇنكورىس دەڭگەيىن ەسكەرە وتىرىپ بەكىتىلەدى. سوندىقتان زەينەتاقىنىڭ ەڭ تومەنگى مولشەرلەمەسىن ەڭ تومەنگى جالاقىمەن تەڭەستىرۋ – ۇكىمەت الدىنداعى كەزەك كۇتتىرمەيتىن وزەكتى ماسەلەلەردىڭ ءبىرى بولۋى قاجەت دەپ ەسەپتەيمىن», دەدى ءادىل جۇبانوۆ.
سونىمەن قاتار ول مەملەكەت ازاماتتاردىڭ ەڭ تومەنگى جالاقى دەڭگەيىنەن تومەن ەمەس زەينەتاقى الۋىنا كەپىلدىك بەرۋى قاجەتتىگىن العا تارتتى.
«الەمنىڭ كەيبىر ەلدەرىندە ادامنىڭ زەينەتاقىسى بەلگىلەنگەن ەڭ تومەنگى مولشەردەن تومەن بولسا, وندا مۇنداي زەينەتكەرگە الەۋمەتتىك ۇستەمەاقى تولەۋ تاجىريبەسى بار. ەڭ تومەنگى زەينەتاقىنى الاتىن كىم دەگەن سۇراق تۋىندايدى؟ ول – ەڭبەق ءوتىلى جوق, زەينەتاقى قورىنا اقشاسى سالىنباعان ادام. ونداي ادامدار كوبىنە اۋىلدىق جەردىڭ تۇرعىندارى. اۋىل تۇرعىنىندا ەڭبەك ءوتىلى قايدان بولادى, ەگەر سول كەزدەگى مەملەكەت باسشىسى جاساپ تۇرعان سوۆحوزدار مەن كولحوزداردى كۇشپەن تاراتىپ, ەندى ءبىز ەتتى برازيليا, ارگەنتينادان الامىز دەسە؟ سوندىقتان حالىقتىڭ وسىنداي جاعدايعا تاپ بولعانىنا بيلىكتىڭ دە كىناسى زور», - دەدى ول.