پەتروپاۆلدا جاتتىعۋ كەزىندە كوز جۇمعان جاس جىگىتتىڭ ءولىمى جان-جاقتى تەكسەرىلىپ جاتىر, دەپ حابارلادى Egemen.kz.
«ەشكىم مۇنداي وقىس جاعدايدى كۇتكەن جوق. ول دوپتى اينالدىرىپ جاتتىعىپ جۇرگەن. اياق استىنان ەسىنەن تانىپ قۇلاپتى. مۇنى جاتتىقتىرۋشى ايتتى. فۋتبول الاڭىندا بۇرىن-سوڭدى ءدال وسىنداي قايعىلى وقيعان ورىن الماعان», – دەيدى «قىزىلجار» فۋتبول ورتالىعىنىڭ باسشىسى ۆياچەسلاۆ كولودا.
وقىس وقيعا فۋتبول كلۋبىنىڭ كەزەكتى جاتتىعۋى كەزىندە بولعان. راۋان مۇحتاروۆ دوپپەن ويناپ كەلە ءجۇرىپ, كەنەتتەن قۇلاپ تۇسكەنى سول جەردەگى بەينەباقىلاۋ كامەرالارىنا ءتۇسىپ قالعان.
قازىر وسى بەينەجازبا تەرگەۋشىلەردىڭ قولىندا. سونداي-اق, كامەراعا راۋاننىڭ كەۋدەسىنە دوپ تيگەنى دە ءتۇسىپ قالعان. بىراق جاس سپورتشى ەش اۋىرسىنباي ءارى ويناپ كەتە بارعان. دەگەنمەن ونىڭ ولىمىنە وسى سوققى سەبەپ بولۋى مۇمكىن دەگەن بولجام بار.
فۋتبولشىنىڭ ناقتى نەدەن كوز جۇمعانى ءالى انىقتالىپ جاتىر.
«قر قىلمىستىق كودەكسىنىڭ 001-بابى «ادامنىڭ قايتىس بولۋى» بويىنشا سوتقا دەيىنگى تەرگەپ تەكسەرۋدىڭ بىرىڭعاي تىزىلىمىنە تىركەلدى. سوت مەديتسينالىق ساراپتاما تاعايىندالدى. ءىستىڭ بارلىق ءمان- جايىن زەردەلەۋگە باعىتتالعان سوتقا دەيىنگى تەرگەۋ ءجۇرىپ جاتىر», – دەيدى سقو پوليتسيا دەپارتامەنتى ءباسپاسوز قزمەتىنىڭ رەسمي وكىلى نۇربەك باەكين.