بەلگىلى ءانشى تورەعالي تورەالى سوت شەشىمىن ورىنداپ, قوعامدىق جۇمىستا جۇرگەنىن كورسەتتى, دەپ حابارلايدى Egemen.kz.
"بىزگە سوتتىڭ ۇكىمى بويىنشا 40 ساعات قوعامدىق جۇمىس تاپسىرىلعان ەدى. اللاعا شۇكىر, تۇسكە دەيىن ساياباقتا بولدىق, قازىر وسىندامىز. بۇل مەنىڭ تاۋەلسىزدىگى بار قازاقستانىم, بۇل مەنىڭ وتانىم, ەلىم, جەرىم. سوندىقتان, البەتتە, ءانۇرانى مەن كوك تۋى بار ەلدىڭ ءوزىنىڭ زاڭى بولادى. ول زاڭعا ءبارىمىز بىردەي باعىنۋىمىز كەرەك دەپ ويلايمىن. مىنە, ۇلى دالا بالاسى ءوزىنىڭ ۇلى دالاسىن سىپىرىپ جاتىر", - دەدى ءانشى بەينەجازبادا.
ءوزىنىڭ ايتۋىنشا, ول مۇنداي جۇمىستان ۇيالمايدى.
"بۇل نامىس كورەتىن ەمەس. ءوزىمىزدىڭ اۋلامىزدى سىپىرامىز, قوقىس توگىپ كەلۋ دەگەن سياقتى عوي. بۇل جۇمىس, اينالىپ كەلگەندە, پايعامبار سۇننەتىنە كەلەدى عوي نەگىزى. ءوز جاتقان-تۇرعان جەرىڭدى تازا ۇستاۋ, ەرتەڭگى اس قۇياتىن ىدىسىڭدى بۇگىن جۋىپ قويۋ دەگەن نارسەنىڭ ءبارى - تازالىق يماننان ەمەس پە؟ امان بولىڭىزدار! انانىڭ ءبارىن جيناپ تاستادىق", - دەيدى تورەعالي تورەالى.
ايتا كەتەيىك, بۇعان دەيىن تانىمال ءانشى بيلىك وكىلدەرىن وزدەرىنىڭ قىزمەتتىك مىندەتتەرىن اتقارۋ كەزىندە ءتىل تيگىزگەنى ءۇشىن سوتتالعان بولاتىن.