الەمدىك تاجىريبەدە «water governance» ۇعىمى مەملەكەت تاراپىنان سۋ رەسۋرسىن جۇيەلى باسقارۋ مەن ءتيىمدى پايدالانۋدى كوزدەيدى. ەلىمىزگە ورتالىق ازياداعى سۋ رەسۋرستارىنىڭ 18 پايىزدان استامى عانا تيەسىلى ەكەنى ءمالىم. سايكەسىنشە بىزدەگى سۋ قورىنىڭ 40 پايىزعا جۋىعى كورشى مەملەكەتتەردەن كەلەدى. بۇل ءوز كەزەگىندە, سۋ ۇلتتىق قاۋىپسىزدىكتىڭ نەگىزگى تارماعى رەتىندە كۇن تارتىبىنە ەنىپ وتىر.
وسى سالاعا ارنايى ءمان بەرىپ, جەكە مينيسترلىك رەتىندە قۇرۋ – ۋاقىتىلى قابىلدانعان شەشىم. جاڭادان قۇرىلاتىن سۋ رەسۋرستارى جانە يرريگاتسيا مينيسترلىگى ەلىمىزدەگى سۋ ساياساتىن ىلگەرىلەتەتىن, سۋ ينفراقۇرىلىمىن جەتىلدىرۋ بويىنشا ۇسىنىستار بەرىپ, ونىڭ ورىندالۋىنا جاۋاپتى بولۋى قاجەت. سونىمەن قاتار ءوز قۇزىرەتتىلىگى شەڭبەرىندە ترانسشەكارالىق سۋ رەسۋرستارى بويىنشا كەلىسسوزدەر مەن تالقىلاۋلاردا مەملەكەتتىك مۇددەنى قورعاۋدا باسىمدىققا يە بولماق. سونداي-اق سالالىق ۆەدومستۆو رەتىندە سۋ ماسەلەلەرى بويىنشا حالىقارالىق جانە وڭىرلىك ۇيىمدار مەن وزگە دە مۇددەلى تاراپتارمەن بايلانىستى جاڭا دەڭگەيگە كوتەرۋگە, سول ارقىلى ەلىمىزگە سۋدى ءتيىمدى پايدالانۋ بويىنشا جاڭا تەحنولوگيالار ەنگىزۋگە مۇمكىندىك تۋماق.
ورتالىق ازيا ءوڭىرى اۋىل شارۋاشىلىعىنىڭ 75 پايىزى سۋارمالى ءارى ەلىمىزدىڭ تومەنگى اعىستا ورنالاسۋى سۋ رەسۋرسى بويىنشا كورشى ەلدەرمەن ءتيىمدى ءارى جۇيەلى بايلانىس ورناتۋ, دوستىق پەن سەرىكتەستىككە نەگىزدەلگەن «سۋ ديپلوماتياسىن» جۇرگىزۋدى قاجەت ەتەدى. وسى رەتتە اتالعان مينيسترلىك وزگە دە مۇددەلى مەملەكەتتىك ورگاندارمەن بىرلەسىپ ارەكەت ەتۋگە ءتيىس.
باۋىرجان باعلاي,
پرەزيدەنت جانىنداعى مەملەكەتتىك باسقارۋ اكادەمياسى ديپلوماتيا ينستيتۋتىنىڭ قىزمەتكەرى