جاڭا وقۋ جىلىندا كوپتەگەن ءوڭىر ءۇشىن قالا مەن اۋىل اراسىنداعى ءبىلىم بەرۋ مۇمكىندىكتەرىن تەڭەستىرۋ ماسەلەسى ەرەكشە ماڭىزدى بولىپ وتىر. بۇل تۇرعىدا اقتوبە وبلىسىنىڭ وزىندىك مودەلى قالىپتاسقان.
وبلىستاعى 404 مەكتەپتىڭ شامامەن 70 پايىزى اۋىلدىق جەرلەردە ورنالاسقان, ونىڭ 204-ءى – شاعىن جيناقتى مەكتەپ. اۋىلدىق وقۋ ورىندارىنىڭ سانىنا قاراماستان, مۇندا وقيتىن بالالار وبلىس وقۋشىلارىنىڭ جالپى سانىنىڭ 9 پايىزىن عانا قۇرايدى. بۇل ماسەلە كونتينگەنت ايىرماشىلىعىمەن راستالىپ وتىر: اۋىلدىق مەكتەپتەر قالالىق مەكتەپتەرگە قاراعاندا 10 ەسە از.
مۇنداي الشاقتىق ءبىلىم بەرۋ جۇيەسىنە ۇلكەن قيىندىقتار تۋعىزادى. مىسالى, ءبىر مۇعالىمنىڭ بىرنەشە ءپاندى وقىتۋ ماسەلەسى نەمەسە بالالاردى ءبىر اۋىلدان ەكىنشى اۋىلعا تاسىمالداۋ قاجەتتىلىگى. بىراق جۇيەلى جۇمىس, يننوۆاتسيالىق تاسىلدەر جانە تسيفرلىق تەحنولوگيالاردىڭ مۇمكىندىكتەرىن پايدالانۋ ارقىلى بۇل ماسەلەنى ەڭسەرۋگە بولادى.
ء«بىلىم ALL» وڭىرلىك قاناتقاقتى جوباسى اۋىل مەكتەپتەرى ءۇشىن ناعىز سەرپىلىس بولدى. وبلىس ورتالىعىنىڭ ۇزدىك پەداگوگتەرى شاعىن جيناقتى مەكتەپتەردىڭ بالالارىنا ونلاين فورماتتا فيزيكا, ماتەماتيكا, حيميا, بيولوگيا جانە اعىلشىن ءتىلى پاندەرىن وقىتادى. بۇل – مامانداردىڭ تاپشىلىعى ماسەلەسىن شەشىپ قانا قويماي, جەرگىلىكتى مۇعالىمدەردىڭ بىلىكتىلىگى مەن تسيفرلىق ساۋاتتىلىعىن ارتتىرا تۇسەدى.
جوبانى ىسكە اسىرۋ باستالعاننان بەرى بالالاردىڭ ءبىلىم دەڭگەيىنە ۇنەمى مونيتورينگ جۇرگىزىلدى. بۇل ءبىلىم بەرۋ جەتىستىكتەرىندەگى الشاقتىقتىڭ 4,7 پايىزعا تومەندەگەنىن كورسەتتى. بىراق باستاما مۇنىمەن توقتاعان جوق. «قازاقستان حالقىنا» قورى ءبىلىم بەرۋدى تۇراقتى دامىتۋ قورى ارقىلى ءوڭىردىڭ 12 تىرەك جانە 134 شاعىن جيناقتى مەكتەبىن زاماناۋي جابدىقتارمەن جاراقتاندىرۋعا 5 ملرد تەڭگە ءبولدى.
بۇل جوبا زاماناۋي ءبىلىم بەرۋدىڭ ورنالاسقان جەرىنە بايلانىستى بولماۋى كەرەك ەكەنىن كورسەتەدى. يننوۆاتسيا جانە تسيفرلاندىرۋ – ءبىلىم بەرۋ تەڭدىگىنە قول جەتكىزۋدىڭ نەگىزگى قۇرالى. اقتوبە وبلىسى زاماناۋي تەحنولوگيالار مەن سەنىمدى سەرىكتەستىكتىڭ كومەگىمەن ءار بالاعا ساپالى ءبىلىم الۋ ءۇشىن تەڭ مۇمكىندىكتەر بەرۋدىڭ جارقىن مىسالى بولىپ وتىر.
جايىق سۇلتان,
وبلىستىق ءبىلىم باسقارماسىنىڭ باسشىسى
اقتوبە وبلىسى