وتكەن اپتادا جوعارعى سوتتىڭ ۇيىتقى بولۋىمەن «تاۋەلسىز سوت تورەلىگىندەگى سوت اكىمشىلىگى: الەمدىك ستاندارتتار مەن ۇزدىك تاجىريبەلەر» تاقىرىبىندا دوڭگەلەك ۇستەل ءوتتى. ءىس-شاراعا قاتىسقان قازاقستان, ازەربايجان, قىرعىزستان, وزبەكستان, تۇركيا جانە باسقا ەلدەردىڭ سۋديالارى مەن سوت اكىمشىلىكتەرىنىڭ وكىلدەرى سوت تيىمدىلىگىن وڭتايلاندىرۋ, سوت تورەلىگىنە قول جەتكىزۋ قۇرالدارى مەن جاڭا تەحنولوگيالار جونىندە وي-پىكىرلەرىن ورتاعا سالدى.
دوڭگەلەك ۇستەل جۇمىسىنا بۋەنوس-ايرەستەن (ارگەنتينا) ارنايى كەلگەن حالىقارالىق سوت اكىمشىلىگى قاۋىمداستىعىنىڭ (IACA) پرەزيدەنتى لۋيس ماريا پالما قاتىستى. القالى جيىننان كەيىن ول پرەزيدەنت قاسىم-جومارت توقاەۆقا جازعان حاتىندا ەلىمىزدىڭ تاۋەلسىزدىگىن قامتاماسىز ەتۋدەگى سوت جۇيەسىنىڭ ماڭىزدى قادامدارىنا ەرەكشە توقتالدى.
«سوت اكىمشىلىگى جانە سوت رەفورماسى سالاسىنداعى 25 جىلدان استام تاجىريبەمە ارقا سۇيەي وتىرىپ, استانا سوت اكىمشىلىگىنىڭ جاڭا وزىق ستاندارتتارىن بەلگىلەي باستاعانىن ايتا الامىن. الەمدىك ۇزدىك تاجىريبەگە سۇيەنگەن قازاقستان قىسقا مەرزىمدە سوت باسقارۋىنىڭ بىرەگەي مودەلىن ەنگىزە وتىرىپ, تەرەڭ رەفورمالار جۇرگىزە الدى», دەپ جازدى ول.
ل.پالما وسى ۋاقىتقا دەيىن جەتەكشى ەلدەر قول جەتكىزە الماعان ساپالى جانە جىلدام سوت تورەلىگىن قامتاماسىز ەتۋگە باعىتتالعان قازاقستاننىڭ تسيفرلىق اقىلدى سوتتارىن اتاپ ءوتتى. حالىقتىڭ سوتتارعا تسيفرلىق قولجەتىمدىلىگى بويىنشا قازاقستان الەمدە 4-ورىن الادى. ول جاساندى ينتەللەكتى قولدانۋدى جانە جوعارعى سوتتىڭ اۋماقتان تىس سوتتىلىقتى باستاۋىن باسقا ەلدەر ءۇشىن ۇلگى بولا الاتىن تاماشا تاجىريبەلەر دەپ سانايدى.
مارتەبەلى مەيمان استانا جانە الماتى سوتتارىنا ارنايى بارىپ, سۋديالار مەن سوت قىزمەتكەرلەرىنىڭ جۇمىسىن ەداۋىر جەڭىلدەتەتىن جانە ناقتى ۋاقىت رەجىمىندە سوت تورەلىگىنە ونلاين قول جەتكىزۋ ءۇشىن ىڭعايلى قۇرالداردى ۇسىناتىن ات-سەرۆيستەردىڭ قاجەتتىلىگىنە كوز جەتكىزدى. وسىعان وراي IACA بۇكىلالەمدىك حابارلىق ادىستەمە – ونلاين كونفەرەنتسيا ارقىلى سوت باسقارۋىندا اقپاراتتىق تەحنولوگيالاردى قولدانۋدىڭ قازاقستاندىق تاجىريبەسىن زەردەلەۋگە جانە تاراتۋعا نيەتتى.
«سوت جۇيەسىن قارجىلاندىرۋدىڭ قازاقستاندىق مودەلى دە نازار اۋدارۋعا تۇرارلىق. بيۋدجەتتىڭ ەڭ تومەنگى شەگىن زاڭنامالىق بەكىتۋ, سونداي-اق سۋديالىق ءوزىن-ءوزى باسقارۋ ورگانىنىڭ سۋديالىق جالاقىنىڭ مولشەرىن ايقىنداۋ قۇقىعى قازاقستاندىق سوتتاردى بيلىكتىڭ باسقا تارماقتارىنان شىنىمەن تاۋەلسىز ەتۋدىڭ قۋاتتى قۇرالى بولىپ سانالادى», دەپ ەسەپتەيدى ل.پالما. ونىڭ پىكىرىنشە, ەلىمىزدىڭ سوت اكىمشىلىگىنىڭ ينستيتۋتسيونالدىق دەڭگەيدە دەربەس مەملەكەتتىك ورگان رەتىندە قالىپتاسۋى سۋديالاردى اكىمشىلىك-بيۋروكراتيالىق قىزمەتتەن بوساتۋعا ىقپال ەتتى. تاقىرىپتىڭ وزەكتىلىگىن جانە باسقا ەلدەردەن كەلگەن ساۋالداردى اتاپ وتكەن IACA پرەزيدەنتى قازاقستان سوت اكىمشىلىگىمەن ىنتىماقتاستىق تۋرالى مەموراندۋمعا قول قويىلعانىن جانە سوت باسقارماسىنىڭ قازاقستاندىق مودەلى تۋرالى اقپاراتتى IACA اقپاراتتىق رەسۋرستارىنا ورنالاستىرعانىن حابارلادى.
IACA ەلىمىزدىڭ جوعارعى سوت باسشىلىعىن بيىل 25-27 قازاندا بۋەنوس-ايرەستە (ارگەنتينا) وتەتىن حالىقارالىق كونفەرەنتسيا جۇمىسىنا قاتىسۋعا شاقىردى. ل.پالما وسى ءىس-شارا اياسىندا سوت باسقارماسىنىڭ قازاقستاندىق مودەلىن تانىستىرۋدى ۇسىندى. IACA ورتالىق ازيا جانە ءۇندىستان اتىنان ۆيتسە-پرەزيدەنت رەتىندە سوت اكىمشىلىگىنىڭ وكىلدەرىن ۇسىنباق.
ەستەرىڭىزگە سالا كەتەيىك, Iاسا – قۇرامىندا 100-دەن استام مەملەكەت, سونىڭ ىشىندە اقش, قىتاي, كانادا, جاپونيا, گەرمانيا, فرانتسيا ەلدەرى بار ىرگەلى ۇيىم. ەلىمىز حالىقارالىق قاۋىمداستىققا 2015 جىلدان بەرى مۇشە. IACA-عا مۇشە بولۋ ۇنەمى تاجىريبە الماسۋعا جانە سوت مەنەدجمەنتىنىڭ وزىق قىرلارىن مەڭگەرىپ, ونى تىڭعىلىقتى پىسىقتاپ الۋعا مۇمكىندىك بەرەدى.