تاشكەنتتە وتكەن بوكستان 2023 جىلعى الەم چەمپيوناتىنىڭ جەڭىمپازى اسلانبەك شىمبەرگەنوۆ پەن كۇمىس جۇلدەگەر دۋلات بەكباۋوۆتى جامبىل جۇرتشىلىعى ءسان-سالتاناتپەن قارسى الدى, دەپ حابارلايدى Egemen.kz.
جەڭىس تۇعىرىنا شىعىپ, قازاقستان نامىسىن قورعاپ, ەل ءۇمىتىن اقتاعان جامبىلدىق ەكى بوكسشىنى جانكۇيەرلەرى قۇشاق جايا قارسى الدى.
ەسكە سالساق, ۇلتتىق قۇراما كاپيتانى اسلانبەك شىمبەرگەنوۆ التىن مەدال يەلەنسە, دۋلات بەكباۋوۆ كۇمىس مەدال جەڭىپ العان ەدى.
ارنايى ۇيىمداستىرىلعان سالتاناتتى ءىس-شارادا وبلىس اكىمى نۇرجان نۇرجىگىتوۆ بىلعارى قولعاپ شەبەرلەرىن جەڭىسپەن قۇتتىقتاپ, جەرلەستەرىنىڭ اتىنان ماراپاتتادى.
«الەمدىك باسەكەدە كوك تۋىمىزدى بيىككە كوتەرگەن ورەندەرىمىز اسلانبەك پەن دۋلاتتى ايتۋلى جەڭىسىمەن شىن جۇرەكتەن قۇتتىقتايمىن! جامبىل بوكس مەكتەبىنىڭ جارقىن ءداستۇرىن ساقتاعان سپورتشىلارىمىز وزدەرىن ناعىز شەبەر بوكسشى ەكەندىگىن وسى الەم بىرىنشىلىگىندە دالەلدەي ءبىلدى.
1999 جىلى حيۋستوندا وتكەن الەم چەمپيوناتىندا بولات ءجۇمادىلوۆ التىننان القا تاقسا, اراعا 24 جىل سالىپ اسلانبەك شىمبەرگەنوۆ سول جەڭىستى, سول ەرلىكتى قايتالاپ وتىر. بۇل ءبىز ءۇشىن ۇلكەن قۋانىش, جوعارى مارتەبە. بوكسشىلارىمىزدى ۇلكەن رينگكە باۋلىپ, حالىقارالىق دارەجەدەگى سپورت شەبەرى دەڭگەيىنە كوتەرگەن قر ەڭبەگى سىڭگەن جاتتىقتىرۋشى نۇرلان اقۇرپەكوۆ پەن ەرمەك ەرتاەۆتاردىڭ ەرەن ەڭبەكتەرىن دە ايرىقشا اتاپ وتكىم كەلەدى», دەدى وبلىس اكىمى قۇتتىقتاۋ سوزىندە.
سالتاناتتى جيىن بارىسىندا الەم چەمپيونى اسلانبەك شىمبەرگەنوۆكە 3 بولمەلى پاتەردىڭ كىلتى تارتۋ ەتىلدى.
سونداي-اق جەڭىمپازدىڭ جەكە باپكەرى, جوعارى ساناتتى جاتتىقتىرۋشى ەرمەك ەرتاەۆقا 5 ميلليون تەڭگەنىڭ سەرتيفيكاتى سىيعا بەرىلدى.
ايتا كەتسەك, الەم چەمپيوناتىنىڭ كۇمىس جۇلدەگەرى دۋلات بەكباۋوۆقا 2 بولمەلى پاتەر بەرىلسە, ونىڭ جەكە باپكەرى نۇرلان اقۇرپەكوۆكە 3 ميلليون تەڭگەنىڭ سەرتيفيكاتى تابىستالدى.