جەزقازعان قالاسىنىڭ نەكە سارايىندا شاڭىراق كوتەرگەن جاس جۇبايلاردىڭ نەكەلەسۋ ءراسىمى سالتاناتتى جاعدايدا ءوتتى. جاستاردى ۇلىتاۋ وبلىسى اكىمىنىڭ ورىنباسارى ع.قۇسمانعالي ارنايى كەلىپ قۇتتىقتادى.
– ءبىزدىڭ وبلىس بيىل العاش رەت وتباسى كۇنى مەرەكەسىن اتاپ ءوتىپ جاتىر. سىزدەردىڭ ناق وسى كۇنى قول ۇستاسىپ الداعى ومىرگە بىرگە اتتاعالى تۇرعان ساتتەرىڭىزگە كۋا بولعانىما قۋانىشتىمىن. سىزدەرگە باقىت, شاتتىق, قۋانىشتار مەن جاقسىلىق تىلەيمىن, – دەگەن عالىمجان مۇرات ۇلى جاس جۇبايلارعا وبلىس اكىمدىگى اتىنان سىي-سياپات جاساپ, نەكە كۋالىكتەرىن تاپسىردى.
قۇسىن قولىنا قوندىرعان ازاماتتاردىڭ ەكەۋى دە – قاراپايىم ەڭبەككەرلەر. ايتالىق, اقجول مامبەتباي №1 جەزقازعان بايىتۋ فابريكاسىندا كونۆەيەر ءماشينيسى بولسا, ءالى ماحمۇد جەزقازعان مىس قورىتۋ زاۋىتىنىڭ ەلەكترليزدەۋ تسەحىندا قۇراستىرۋشى ەكەن. ءالىنىڭ كەلىنشەگى ليزا ءتىس دارىگەرى بولسا, اجولدىڭ تاڭداعان جارى اقجان بولاشاق پەداگوگ كورىنەدى.
اقجول مەن اقجاننىڭ تۋعان كۇندەرى بىردەي بولسا, ءالى دە, ليزا دا ءوز ۇيلەرىنىڭ ەكىنشى پەرزەنتتەرى ەكەن. «وسەتىن مال تۇستەس كەلەدى» دەگەنگە سايىپ, وتباسى كۇنى وتباسىن قۇرىپ جاتقان جاستاردىڭ مۇنداي ءوزارا ۇقساستىقتارىن ءبىز دە جاقسىلىققا جورىدىق.
جەزقازعان