جەزقازعاننىڭ جانىندا قۋاتى 1,2 مۆت قۇرايتىن كۇن ەلەكتر ستانساسىنىڭ قۇرىلىسى اياقتالدى. بۇل نىساننىڭ قۇرىلىسىنا 378 ملن تەڭگەدەن اسا قارجى تارتىلدى.
ءبىر جارىم گەكتار اۋماقتى الىپ جاتقان ستانسا پايدالانۋعا بەرىلگەن العاشقى جىلدا 1,88 ملن كۆت/س ەلەكتر ەنەرگياسىن وندىرەدى دەپ كۇتىلۋدە. بىراق بۇل وبلىس ورتالىعىنداعى ەلەكتر سۇرانىسىنىڭ نەبارى 10 پايىزىن عانا قاناعاتتاندىرادى. سوندىقتان جەرگىلىكتى بيلىك ەنەرگيانىڭ بالامالى كوزدەرىن ودان ءارى دامىتۋ ءۇشىن تاعى بىرنەشە جوبانى قولعا الماق.
– ءبىز بىرتىندەپ ەنەرگيانىڭ بالاما كوزدەرىنە, ياعني, جاسىل ەنەرگياعا نازار اۋداراتىن بولامىز. سونىڭ ءبىر دالەلى, كۇن ستانساسىنان بولەك, ەندى جەل قۋاتىن دا پايدالانۋدى كوزدەپ وتىرمىز. جەزقازعان – ساتباەۆ قالالارىنىڭ ورتاسىنان قۋاتى 200 مۆت جەل ەلەكتر ستانساسىن سالۋ جوباسى دايىن. بۇل جوبانىڭ قۇرىلىسىنا ءبىر مەزگىلدە 250 جۇمىس كۇشى تارتىلاتىن بولادى, دەيدى ۇلىتاۋ وبلىسى ەنەرگەتيكا جانە تۇرعىن ءۇي-كوممۋنالدى شارۋاشىلىعى باسقارماسىنىڭ باسشىسى الماز جانداربەكوۆ.
كۇنگە دە, جەلگە دە جەرىمىزدە زارۋلىك جوق. ەندەشە, ولاردىڭ قۋاتىن ادام مۇددەسىنە باعىتتاۋدى ويلاستىرعان جوبالارعا تەك قانا ساتتىلىك بولسىن.
ۇلىتاۋ وبلىسى,
جەزقازعان قالاسى