دوحادان جۇلدەسىز ورالدى

جەر-جاھاننىڭ مىقتىلارى جينالعان جارىستا سوڭعى رەت 2014 جىلى رەسەيدىڭ چەليابى قا­لاسىندا وتكەن الەم چەمپيوناتىندا وڭباي سۇرىنگەن ەدىك. سول كەزدە دزيۋدوشىلارىمىز تەگىس ۇتىلدى. ودان كەيىنگى التى جارىس­تا اسىعىمىز الشىسىنان ءتۇستى. اتاپ ايتساق, 2015 جىلى استانادا ەلدوس سمەتوۆ (التىن) پەن رۋستام ىبىراەۆ (كۇمىس), 2017 جىلى بۋداپەشتە وتگونتسەتسەگ گال­بادراح (قولا), 2018 جىلى باكۋدە ەرلان سەرىكجانوۆ (كۇمىس) پەن گالبادراح (قولا), 2019 جىلى توكيودا سمەتوۆ (قولا), 2021 جىلى بۋداپەشتە عۇس­مان قىر­عىزباەۆ (كۇمىس) جانە 2022 جىلى تاشكەنتتە سمەتوۆ (قولا) پەن ءابي­با ابۋجاقىنوۆا (قولا) جەڭىس تۇعىرىنا كوتەرىلىپ, جان­كۇيەر­لەر­دى قۋانىش پەن شاتتىققا بو­لەدى.

پارسى شىعاناعىندا وتكەن الەم چەمپيوناتىندا ەلىمىزدىڭ ەڭ ۇزدىك 18 بالۋانى تاتاميگە شىقتى. سولاردىڭ اراسىنان 48 كيلو سالماقتا ونەر كورسەتكەن ءابيبا ابۋجاقىنوۆانىڭ عانا ءتاۋىر كۇرەستى. نەبىر مىقتى قارسىلاستى جولىنان ىعىستىرعان قازاق قىزى جارتىلاي فينالدا جەڭىلىستىڭ كەرمەك ءدامىن تاتتى. بۇل مەجەدە ونىڭ ەۋروپانىڭ ەكى دۇركىن چەمپيونى, الەمدىك رەيتينگتە كوش باستاپ تۇرعان فرانتسيالىق شيرين بۋكليگە ءالى جەتپەدى. ال قولا مەدال ءۇشىن سايىستا ءابيبا يتاليالىق اسسۋنتا سكۋتتوعا ەسە جىبەردى. بىلتىر تاشكەنتتەگى الەمدىك دودادا ءدال وسى ەكى سپورتشى جەڭىس تۇعىرىنىڭ ءۇشىنشى ساتىسىندا قاتار تۇرعان ەدى.

اتالعان جارىستا نۇرقانات سەرىكباەۆ پەن نۇرلىحان شار­حاننىڭ دا «شابىسى» جامان بول­عان جوق. 60 كيلو سالماقتا كۇش سىناسقان نۇرقانات باستاپقى با­سەكەلەردىڭ بىرىندە وليمپيا ويىندارىنىڭ كۇمىس, الەم چەمپيوناتى مەن ازيا ويىندارىنىڭ قولا جۇلدەگەرى, الەمدىك رەيتينگ­تە ءبىرىنشى ورىندا تۇرعان تاي­پەي­لىك يان يۋنۆەيدەن ايلا­سىن اسىرعاندا كەۋدەمىزدە ءۇمىت وتى جىلت ەتە قالدى. بىراق كەلە­سى اينالىمدا ونىڭ جولىن جاپو­نيانىڭ جۇلدىزى, توكيو وليمپياداسىنىڭ جەڭىمپازى, ريو وليمپياداسىنىڭ كۇمىس جۇلدەگەرى, الەمنىڭ ءتورت دۇركىن چەمپيونى ناوحيسا تاكاتو بو­گەدى. ال جۇبانىش باسەكەسىندە سە­رىكباەۆتى گرۋزيالىق گەورگي سار­دالاشۆيلي سان سوقتىرىپ كەتتى.

100 كيلو سالماقتاعى نۇر­لىحان شارحان جارىستى وتە تاماشا باستادى. قانداسىمىز ءۇشىنشى اينالىمدا گرۋزيالىق ۆارلام ليپارتەليانيدى جولىنان ىعىستىردى. ال ول كىم دەسەڭىز, ايتار جاۋابىمىز دايى­ن. ليپارتەلياني – ريو وليم­­پيا­داسىنىڭ ءفيناليسى, الەم چەمپيوناتىنىڭ التى دۇركىن جۇل­دەگەرى, كوماندالىق الەم چەم­پيو­ناتىنىڭ ەكى دۇركىن جەڭىمپازى, ەۋروپانىڭ سەگىز دۇر­كىن چەمپيونى (3 رەت جەكە, 5 رەت كوماندالىق ەسەپتە) جانە ەۋروپا ويىندارىنىڭ ەكى دۇركىن كۇمىس جۇلدەگەرى. اتاعىنان ات ۇركەتىن ءاپايتوس قازاقتىڭ قايسار ۇلىنىڭ الدىندا شاراسىزدىق تانىتتى. ودان كەيىن نۇرلىحاننىڭ جولى داڭقى جەر جارعان چەحيانىڭ بالۋانى لۋكاش كرپالەكپەن قيىستى. وليمپيادا مەن الەمنىڭ ەكى جانە ەۋروپانىڭ ءۇش دۇركىن چەمپيونى جەرلەسىمىزدى وڭاي جىقتى. ابدەن كۇشى سارقىلعان شارحان جۇبانىش بەلدەسۋىندە ءيزرايلدىڭ ماقتانىشى, وليمپيا ويىندارىنىڭ قولا جۇلدەگەرى (كوماندالىق ەسەپتە), ەۋروپا چەم­پيونى پەتەر پالچيكتىڭ وسال تۇ­سىن تابا المادى.

دوحاداعى الەم چەمپيوناتىندا ءبىز ەلدوس سمەتوۆ (60 كيلو), عۇسمان قىرعىزباەۆ (66 كيلو), جانساي سماعۇلوۆ (73 كيلو), دانيار شامشاەۆ (73 كيلو) جانە ديدار حامزا (90 كيلو) سىندى تالاي دۇرمەكتەردە ىسىلىپ, كوپتەگەن ءدۇبىرلى دودالاردا دارالانعان ساڭلاقتارعا ايرىقشا ءۇمىت ارتقان ەدىك. وكىنىشكە قاراي, ولار سەنىم ۇدەسىنەن شىعا المادى. سول سەكىلدى ابىلايحان جۇبانازار (81 كيلو), عالىمجان قىرىقباي (+100 كيلو), عاليا تىنباەۆا (48 كيلو), تولعاناي ابەۋوۆا (52 كيلو), باقىت قۇساقباەۆا (57 كيلو), ەسميگۇل كۋيۋلوۆا (63 كيلو), اناستاسيا ماياكوۆا (70 كيلو), ارۋنا جانگەلدينا (78 كيلو), كاميلا بەرلىقاش (+78 كيلو) جانە اقەركە رامازانوۆا دا (+78 كيلو) باستاپقى كەزەڭدەردە ءسۇرىندى.

ەرلەر اراسىنداعى جارىستىڭ جالپى كوماندالىق ەسەبىندە گرۋزيا قۇراماسى جەكە-دارا كوش باستادى. قاپ تاۋىنىڭ قىراندارى 2 التىن, 1 كۇمىس جانە 1 قولانى ولجالادى. سونداي-اق توپ-10-دىققا مىنا كوماندالار ەندى: جاپونيا (1+1+3), رەسەي (1+1+0), فرانتسيا مەن شۆەيتساريا (1+0+1), يسپانيا (1+0+0), وزبەكستان (0+1+2), يتاليا, بەلگيا جانە چە­حيا (0+1+0).

ايەلدەر اراسىنداعى سايىس جا­پونداردىڭ (4+1+2) ايقىن جەڭىسىمەن اياقتالدى. ودان كەيىنگى ساتىلارعا فرانتسيا (1+3+1), كا­نادا مەن يزرايل (1+0+1), وز­بەكستان, سلوۆەنيا, گەرمانيا (0+1+0), يتاليا (0+0+3) جانە ني­دەرلاند (0+0+2) قۇرامالارى جايعاستى.

الەم چەمپيوناتىنىڭ جەڭىمپازدارى مەن جۇلدەگەرلەرى

(ەرلەر)

81 كيلو:      1. تاتو گريگالاشۆيلي (گرۋزيا), 2. ماتتياس كاسسە (بەلگيا), 3. تاكانوري                                      ناگاسە (جاپونيا) مەن لي جونحۆان (وڭتۇس­تىك كورەيا).

90 كيلو:      1. لۋكا مايسۋرادزە (گرۋزيا), 2. لاشا بەكاۋري (گرۋزيا), 3. ماركۋس نيۋمان                                        (شۆەتسيا) مەن سانشيرو ماۋراو (جاپونيا).

100 كيلو:    1. ارمان اداميان (رەسەي), 2. لۋكاش كرپالەك (چەحيا), 3. زەليم كوتسوەۆ                                               (ازەربايجان) پەن پەتەر پالچيك (يزرايل).

+100 كيلو: 1. تەددي رينەر (فرانتسيا), 2. ينال تاسوەۆ (رەسەي), 3. الىشەر يۋسۋپوۆ                                               (وزبەكستان) پەن رافاەل سيلۆا (برازيليا).

(ايەلدەر)

63 كيلو:      1. كلاريسس اگبەنەنۋ (فرانتسيا), 2. اندرەيا لەشكي (سلوۆەنيا), 3. سوفي وزباس                                (ماجارستان) پەن دجوانن ۆان ليسحاۋت (نيدەرلاند).

70 كيلو:      1. ساكي نيزوە (جاپونيا), 2. دجوۆاننا سكوچچيماررو (گەرمانيا), 3. ميحاەلا                                   پوللەرەس (اۆستريا) پەن باربارا ماتيچ (حورۆاتيا).

78 كيلو:      1. ينبار لانير (يزرايل), 2. ودري چيومەو (فرانتسيا), 3. گيۋشە ستەنحيويس                                         (نيدەرلاند) پەن ەليس بەللاندي (يتاليا).

+78 كيلو:   1. اكيرا سونە (جاپونيا), 2. دجۋليا تولوفۋا (فرانتسيا), 3. بەاتريز سوۋزا                                      (برازيليا) مەن راز گەرشكو (يزرايل).