سەرىك زايسان ۇلى تايبوعاروۆ – كاتونقاراعاي اۋدانىنداعى ۇلكەن نارىن اۋىلىنىڭ ازاماتى. جاستايىنان بىلىمگە قۇشتار بولعان تالانتتى جاس ىزدەندى, جاڭالىققا دەن قويدى. پەداگوگيكا عىلىمدارىنىڭ كانديداتى, پروفەسسور اتاندى. قىزمەتى ءوسىپ, سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ پرورەكتورى, جوعارى كوللەدجىنىڭ ديرەكتورى قىزمەتتەرىن اتقاردى.
ءوزىنىڭ قىسقا عۇمىرىندا 100-دەن استام عىلىمي ەڭبەك جازدى. اتتەڭ! ءبىر كەم دۇنيە. قاشاندا ىزدەنىستەن جالىقپايتىن ازامات استاناعا دوكتورلىق ديسسەرتاتسياسىن قورعاۋعا اتتانىپ بارا جاتقاندا جول-كولىك اپاتىنان كوز جۇمدى. بۇدان 16 جىل بۇرىن قازا تاپقان ازامات ءتىرى بولعاندا ءدال بۇگىن تۋىستارى مەن دوستارى سەرىك زايسان ۇلىنىڭ 60 جاسقا تولعان مەرەيتويىن اتاپ وتەر ەدى.
دوستارى, سوناۋ اقتاۋدان ات شالدىرىپ كەلگەن توقتامىس جۇماعۇلوۆ, سەرىك اقتانوۆ باسقاراتىن وبلىستىق فەدەراتسيا, تۋىستارى سەرىك زايسان ۇلىنىڭ مەرەيتويىنا وراي بيلياردتان ەسكە الۋ ءتۋرنيرىن وتكىزدى. ونى شىعىس قازاقستان وبلىستىق بيليارد سپورتى فەدەراتسياسىنىڭ پرەزيدەنتى سەرىك اقتانوۆ اشىپ, ازاماتتىڭ بۇقارالىق سپورتتى دامىتۋعا كەزىندە مول ۇلەس قوسقانىن, وڭىردە بيليارد سپورتىنىڭ كەڭ قانات جايعانى جايلى ايتتى.
تۋرنير تارتىستى ءوتتى. ەڭبەك ارداگەرى ەركىنبەك شومبينوۆ, بىرنەشە تۋرنيردە باس بايگە العان الماس ۋاليەۆ, نۇرجان جيەنباەۆ, تاعى باسقالار جەڭىمپازدى انىقتادى. ناتيجەسىندە, قايرات ادىلبەكوۆ, نۇرجان جيەنباەۆ, مانار بيبورينوۆ جۇلدەلى ورىنداردى ءوزارا ءبولىستى. سەرىك زايسان ۇلىنىڭ جان دوسى توقتامىس جۇماعۇلوۆ تۋرنيرگە قاتىسۋشىلارعا ريزاشىلىعىن ءبىلدىردى. ال فەدەراتسيا باسشىسى سەرىك اقتانوۆ قاتىسۋشىلارعا ەستەلىك گراموتالار تاپسىردى.
وڭداسىن ەلۋباي,
جۋرناليست
وسكەمەن