تۇركىستان وبلىسىنان ەكىنشى دۇنيەجۇزىلىك سوعىسقا 140 مىڭنان استام ازامات اتتانىپ, ونىڭ 70 مىڭى ەلگە ورالعان. بيىلعى 25 ساۋىردەگى جاعداي بويىنشا 4438 ادام سوعىس ارداگەرلەرى مەن وعان تەڭەستىرىلگەندەر ەسەبىندە. ونىڭ ىشىندە ەكىنشى دۇنيەجۇزىلىك سوعىستىڭ 14 ارداگەرى بار.
وبلىس باسشىلىعى ءاربىر ارداگەردىڭ ۇيىندە بولىپ, مەرەكەمەن قۇتتىقتادى. وڭىردەگى ارداگەرلەردىڭ ەڭ جاسى ۇلكەنى 102-دە. ەكىنشى دۇنيەجۇزىلىك سوعىستىڭ تولەبي اۋدانىنداعى جالعىز كۋاگەرى 102 جاستاعى رىسمەت جۇماعۇلوۆ لەڭگىر قالاسىندا دۇنيەگە كەلگەن. قارا جۇمىسقا ەرتە ارالاسىپ, گەورگيەۆكا ۇجىمشارىندا ەڭبەك ەتكەن. قان مايدانعا 1942-1943 جىلدارى قاتىسىپ, ستالينگرادتى قورعاۋشىلار قاتارىندا بولعان. ال 1945-1974 جىلدار ارالىعىندا كۇزەت بولىمىندە قاراۋىل جانە قوسالقى شارۋاشىلىقتا جۇمىسشى بولعان. فوسفور زاۋىتىندا زەينەتكەرلىككە شىققانشا ەڭبەك ەتكەن رىسمەت جۇماعۇلوۆ «وتان سوعىسى» وردەنىمەن, «گ.ك.جۋكوۆ» مەرەكەلىك مەدالىمەن ماراپاتتالعان. رىسمەت قاريانىڭ زامانداسى 101 جاستاعى نەمەت ابدراسيلوۆ 1-گۆارديالىق ارتيللەريالىق ديۆيزيا قۇرامىندا نىساناشى, زەڭبىرەك كومانديرى بولدى. ستالينگراد, كۋرسك, ۋكراينا, بەلورۋسسيا, پولشا قالالارىن ازات ەتۋگە قاتىسقان. رەيحستاگقا شابۋىل جاساۋ كەزىندەگى ەرلىگى مەن باتىرلىعى ءۇشىن ءىى دارەجەلى «داڭق» وردەنىمەن ماراپاتتالدى. سونداي-اق ول «قىزىل جۇلدىز», ءى دارەجەلى «داڭق», ءى دارەجەلى «وتان سوعىسى» وردەندەرىمەن, «ەرلىگى ءۇشىن» جانە باسقا دا 24 مەدالمەن ماراپاتتالعان. سوعىس اياقتالعان سوڭ تۇركىستان قالالىق ميليتسياسىندا جانە تۇركىستان قالاسىنىڭ اۆتوبازاسىندا جۇرگىزۋشى بولىپ جۇمىس ىستەدى. ارداگەر 5 ۇل, 1 قىز, 20 نەمەرە مەن 18 شوبەرە تاربيەلەپ ءوسىردى.
جالپى, وبلىستا 4438 ارداگەرگە جەڭىس مەرەكەسىنىڭ قۇرمەتىنە ءبىر رەتتىك ماتەريالدىق كومەك تولەۋ ءۇشىن اۋداندىق, قالالىق بيۋدجەت ەسەبىنەن 175,5 ملن تەڭگە بولىنگەن. سوعىس ارداگەرلەرىنە 1,5 ملن تەڭگەدەن ۇلەستىرىلسە, 4400-دەن استام تىل ەڭبەككەرلەرى مەن قازا بولعان جاۋىنگەردىڭ جەسىرلەرىنە جانە باسقا دا ساناتتارداعى ارداگەرلەرگە قارجىلاي كومەك قاراستىرىلعان.
تۇركىستان وبلىسى