ۇلان اۋدانىنىڭ ماماي باتىر اۋىلىنداعى ورتا مەكتەپ سپورت زالىندا ارداقتى انا, ەڭبەك ارداگەرى مايرا بالعابايقىزىن ەسكە الۋعا ارنالعان ۆولەيبولدان قىزدار اراسىندا وبلىستىق تۋرنير ءۇشىنشى رەت ءوتتى.
ونى ۇيىمداستىرعان – ۇلان اۋدانىنداعى بالالار مەن جاسوسپىرىمدەر سپورت مەكتەبى جانە بۇقارالىق سپورتتى دامىتۋعا اتسالىسىپ جۇرگەن مۇزاپاروۆتار اۋلەتى. ءتۋرنيردىڭ سالتاناتتى اشىلۋىنا ەسىمى وبلىسقا بەلگىلى سپورت ارداگەرلەرى, قاراپايىم ەڭبەگىمەن قۇرمەتكە بولەنگەن ازاماتتار, اۋىلدىڭ سىيلى اقساقالدارى قاتىستى.
– مايرا بالعابايقىزىنىڭ ەسىمى ۇلان اۋدانىنا جاقسى تانىس. مايرا اپاي مەن ومىربەك اعا ۇزاق جىلدار ماماي باتىر اۋىلىندا ەڭبەك ەتىپ, قۇرمەتكە بولەندى. جاستاردى يماندىلىق پەن ىزەتتىلىككە تاربيەلەدى. قاجىلىققا باردى. ءوز بالالارىن عانا ەمەس, اۋىل جاستارىن سالاماتتىلىققا تاربيەلەدى. سپورت جارىستارى جاستاردى وتانسۇيگىشتىك پەن پاتريوتيزمگە باۋليتىنى ءسوزسىز. وسى ورايدا مۇزاپاروۆتار اۋلەتى سپورت جارىستارىنا ۇنەمى دەمەۋشىلىك جاسايدى. تۇرمىسى تومەن تۇرعىندارعا قولۇشىن بەرىپ كەلەدى. رەتى كەلگەندە ايتا كەتۋ كەرەك, ولار وسىمەن ونىنشى رەت تۋرنير وتكىزىپ وتىر, دەدى ۇلان اۋدانى اكىمىنىڭ ورىنباسارى قۋات وقاسوۆ.
كيكبوكستان الەمنىڭ بەس دۇركىن چەمپيونى اسقار موجانوۆ, بوكستان كسرو سپورت شەبەرى ەرجان ايجىگىتوۆ, تاعى باسقالار ءتۋرنيردى وتكىزىپ وتىرعان مۇزاپاروۆتار وتباسىنا تابىس تىلەپ, الداعى ۋاقىتتا دا جاستاردى سپورتقا باۋلي بەرسە دەگەن تىلەكتەرىن جەتكىزدى.
تۋرنيرگە زايسان اۋدانىنان, ريددەردەن, جارمادان, سەرەبريانكا قالاسىنان, ۇلان اۋدانىنان بارلىعى التى كوماندا قاتىستى. جارىس ساعىر جانە ماماي باتىر اۋىلدارىندا ءوتتى. ءتۋرنيردىڭ تارتىستى وتكەنى سونشالىق, كورەرمەندەر سپورت زالىنا سىيماي كەتتى. ناتيجەسىندە, «ۇلان» قۇراما كومانداسى ءبىرىنشى ورىندى جەڭىپ الدى. «جارما-1», «جارما-2» كوماندالارى ەكىنشى جانە ءۇشىنشى ورىنداردى ءبولىستى. مۇزاپاروۆتار وتباسى اتىنان جەڭىمپازدارعا اقشالاي سىي-سياپات جاسالىپ, كۋبوكتەر, ماقتاۋ گراموتالارى تاپسىرىلدى. قالعان كوماندا مۇشەلەرى دە ماراپاتتان قۇر قالعان جوق.
وڭداسىن ەلۋباي,
«ەگەمەن قازاقستان»
گازەتىنىڭ ارداگەرى
شىعىس قازاقستان وبلىسى,
ۇلان اۋدانى