قازاقستان مۇسىلماندارى ءدىني باسقارماسى وسى جىلدى ءدىني ساۋاتتىلىق اياسىندا «يسلام جانە ىزگى قوعام» دەپ جاريالاعانى ايان. وسى ورايدا ىزگىلىككە ۇندەگەن ىرگەلى جۇمىستار جۇرگىزىلىپ جاتىر. اتاپ ايتقاندا, «ەل ۇلەسى پاتەرگە» اكتسياسى ارقىلى از قامتىلعان ازاماتتارعا پاتەر تابىستالسا, «ومىرگە ءۇمىت سىيلا» جوباسى ەمدەلۋگە مۇقتاج جانداردىڭ ەم-شارا الۋىنا كومەك بەرەدى.
بۇل جولى «زەكەت جانە قايىرىمدىلىق» قورى «ەل ۇلەسى پاتەرگە» اكتسياسى اياسىندا قاراعاندى قالاسىنىڭ تۇرعىنى قۇرمانعازى جۇنىسوۆكە ءتورت بولمەلى پاتەردىڭ كىلتىن تابىستادى. قۇرمانعازى – ون جىلدان بەرى «انەت بابا» مەشىتىندە اۋلا سىپىرۋشى. سونىمەن قاتار بەس جۇزدەن اسا وتباسى ازىق-ت ۇلىك سەبەتىن الدى.
قاراعاندى وبلىسىنا جۇمىس ساپارىمەن كەلگەن قازاقستاننىڭ باس ءمۇفتيى ناۋرىزباي قاجى تاعان ۇلى «انەت بابا» مەشىتى مەن «زەكەت جانە قايىرىمدىلىق» قورىنىڭ قايىرىمدىلىق اكتسيالارىنا, MUNARA TV تەلەارناسىنىڭ فيليالى مەن مەشىت جانىنداعى وتباسىلىق-كونسۋلتاتيۆتىك ورتالىقتىڭ اشىلۋىنا قاتىستى.
– قازاقستان مۇسىلماندارى ءدىني باسقارماسى بيىلعى جىلدى ءدىني ساۋاتتىلىق اياسىندا «يسلام جانە ىزگى قوعام» دەپ جاريالادى. «انەت بابا» مەشىتىندە بيىل نەكەگە تۇرعان جاس وتباسىلارمەن كەزدەسۋ ءوتتى. ءبىز ولارمەن وتباسىلىق قۇندىلىقتار تۋرالى سويلەستىك. باسقارما ۇلكەن قايىرىمدىلىق جۇمىستارىن جۇرگىزىپ جاتىر. بۇل – «ەل ۇلەسى پاتەرگە» اكتسياسى بويىنشا از قامتىلعان ازاماتتارعا پاتەر تابىستاۋ جانە ازاماتتاردى ەمدەۋگە قولداۋ كورسەتەتىن «ومىرگە ءۇمىت سىيلا» جوباسى, – دەدى باس ءمۇفتي ناۋرىزباي قاجى تاعان ۇلى.
«زەكەت جانە قايىرىمدىلىق» قورىنىڭ قاراعاندى وبلىسىنداعى جاۋاپتى وكىلى ميراس ەرلان ۇلى قور ارقىلى كوپتەگەن مۇقتاج ادامنىڭ ءبىراز ماسەلەسى شەشىلگەنىن ايتادى. قوردىڭ دەمەۋشىلەرى بار.
– ماسەلەن, قاراعاندى وبلىسىنان بەس وتباسى ەمدەلۋگە قاراجات الدى. قۇرمانعازى جۇنىسوۆكە سۇرىپتاۋ ستانساسىنان پاتەر ساتىپ الدىق. بۇل – جىل باسىنان بەرى سىيعا تارتقان ەكىنشى پاتەر. رامازان ايىندا كوپبالالى وتباسىنا باسپانا بەرىلدى. جازدا تاعى ءتورت پاتەردىڭ كىلتىن تابىستاۋدى جوسپارلاپ وتىرمىز. وتكەن جىلى قاراعاندى وبلىسىندا ءبىز 11 پاتەر سىيعا تارتتىق, – دەيدى ميراس ەرلان ۇلى.
قاراعاندى