بۇعان دەيىن ەكى بىردەي كوميكس البوم شىعارعان 8-سىنىپ وقۋشىسى اسىل سۇڭعاتقىزى «ستيكەر پاك» جاساۋدى قولعا الدى. ول دەگەنىڭىز – جاسوسپىرىمدەر اراسىندا كەڭىنەن قولدانىلاتىن كوڭىلدى, كۇلكىلى سۋرەتتەرى بار جاپسىرما قاعازدار. ال اسىل جاساپ جۇرگەن «ستيكەر پاك» وزگەشە, سالماقتى. الاشوردا زيالىلارىنىڭ وتتى سوزدەرىن جازىپ, پورترەتتەرىن سالىپ, جاسوسپىرىمدەرگە تاراتادى.
– كوپشىلىك وقۋشىلار كىتاپحاناعا بارىپ, الاش زيالىلارىنىڭ سوزدەرىن وقي بەرمەيدى. وعان ءبىز كىنالى ەمەسپىز. ءداۋىرىمىز تسيفرلانىپ كەتكەندىكتەن شىعار. سوندىقتان دا زامانعا قاراي الاشورداشىلاردىڭ سوزدەرىن جاسوسپىرىمدەردىڭ سۇرانىسىنا قاراي «ستيكەر پاك» ارقىلى جەتكىزۋدى ءجون كوردىم, – دەيدى اسىل سۇڭعاتقىزى.
الاش ايتقان اسىل سوزدەردى اۋديتورياعا قاراي يكەمدەپ, وقىرمان تارتىپ جۇرگەن اسىلدىڭ بۇل ءادىسىن ۇلكەن شەبەرلىك دەر ەدىك. ءتىپتى بويىنان سۋرەتشىلىكتەن بولەك مەنەدجەرلىك قاسيەتتى دە بايقادىق.
جاساعان «ستيكەر پاك» دەپ اتالاتىن جاپسىرما قاعازىن قاراڭىز. ماعجاننىڭ پورترەتىن اينىتپاي بەينەلەگەن. جوعارعى جاعىندا «ارىستانداي ايباتتى, جولبارىستاي قايراتتى, قىرانداي كۇشتى قاناتتى. مەن جاستارعا سەنەمىن!» دەپ اقىننىڭ ولەڭ جولدارىن كەلتىرگەن. ءدال وسى «ستيكەر پاكتى» نوۋتبۋكتەرىنە, قالتا تەلەفوندارىنا جاپسىرىپ الىپ جۇرگەن جاستارعا رۋح بەرەتىن وسىدان ارتىق قانداي ءسوز كەرەك؟
ايتا كەتەرلىگى, وسكەمەندەگى №3 مەكتەپتىڭ وقۋشىسى اسىل سۇڭعاتقىزى بۇعان دەيىن ءاليحان بوكەيحاننىڭ ءومىر جولىن باياندايتىنداي سۋرەتتى كىتاپشا شىعارىپ, وقىرمان قاۋىمعا ۇسىنعان. ىلە شالا «ەر توستىك» ەرتەگىسى كوميكس جانرىندا كىشكەنتاي وقىرماندارعا جول تارتتى. ءسوزى از, سۋرەتى كوپ مۇنداي جانر بۇگىنگى وقىرمان ءۇشىن وتە ءتيىمدى ءادىس بولىپ تۇر. بۇل – وقىرماندى كىتاپتان الشاقتاتۋ ەمەس, كەرىسىنشە از سوزبەن كوپ ماعلۇمات بەرۋدىڭ ءبىر جولى دەر ەدىك.
اسىلدىڭ الداعى ارمان-ماقساتى – بالالارعا ارنالعان قازاق ءتىلدى كونتەنت قالىپتاستىرۋ. سەبەبى بالاباقشا جاسىنداعى بالالاردىڭ ءوزى «يۋتۋب» ارناسىنان ورىس تىلىندەگى بەينەروليكتەردى كورىپ, سۋسىنداپ ءجۇر. بۇگىنگى تىلمەن ايتساق, «تاربيە – تەلەفوننان باستالادى». ەندەشە, اسىل دەسە اسىل وقۋشىنىڭ وي-ارمانى جۇزەگە اسسىن دەپ تىلەيىك.
شىعىس قازاقستان وبلىسى