جاستار كاسىپكەرلىگىنىڭ ءورىسىن كەڭەيتۋدى ماقسات تۇتقان جەڭىلدەتىلگەن نەسيە بەرۋ باعدارلاماسى باستالدى. ەلىمىزدە وسىنداي نەسيەنى العان العاشقى جاستىڭ ءبىرى – قاراعاندىلىق ءمولدىر تايلاقوۆا. 2,5%-بەن 5 ملن تەڭگەگە ءمولدىر سۇلۋلىق سالونىن اشادى. جالپى, قاراعاندى وبلىسىندا جەڭىلدەتىلگەن شاعىن نەسيەگە قۇجات قابىلداۋ 2023 جىلدىڭ 1 ناۋرىزىندا باستالسا, وعان بۇگىندە 31 ءوتىنىش كەلىپ تۇسكەن ەكەن. بۇيىرتسا, ايماقتا جەڭىلدەتىلگەن نەسيەنى بيىل 324 ادام الادى.
جاستاردىڭ ۇسىنعان جوبالارى سان الۋان. قايسىبىرى قىزمەت كورسەتۋدى دامىتقىسى كەلسە, ەندى ءبىر توبى ساۋدا-ساتتىق, مال شارۋاشىلىعى, جەڭىل ونەركاسىپ باعىتىن تاڭداعان. 9 جاس مال شارۋاشىلىعىنا دەن قويىپتى. 13 جاستىڭ جوباسى – قىزمەت كورسەتۋ باعىتىندا. ساۋدا سالاسىندا باعىن سىناعىسى كەلەتىندەر جەتەۋ ەكەن. جەڭىل ونەركاسىپ پەن وسىمدىك شارۋاشىلىعىندا كاسىپ قىلۋعا نيەت قىلعان ەكى جاس بار.
ءمولدىر سۇلۋلىق يندۋسترياسىنا كەزدەيسوق كەلمەگەن. بۇعان دەيىنگى التى جىلدا وسى سالانىڭ قىر-سىرىن مەڭگەرگەن.
– كوپتەن بەرى ءوز بيزنەسىمدى اشۋ ويىمدا ءجۇردى. جەڭىلدەتىلگەن نەسيە باعدارلاماسى تۋرالى جاڭالىقتاردان ەستىپ قالىپ, قاتىسۋعا بەل بۋدىم. شارتتارىن ءبىلىپ, تىڭعىلىقتى دايىندالدىم. سونىڭ ناتيجەسىندە كوميسسيا الدىندا جوبامدى قورعاپ شىقتىم, – دەيدى ءمولدىر تايلاقوۆا.
باعدارلامانىڭ باستاماشىسى ەڭبەك جانە حالىقتى الەۋمەتتىك قورعاۋ مينيسترلىگى ەكەنى ءمالىم. نەسيەلەۋ «اگرارلىق نەسيە كورپوراتسياسى» اق ارقىلى جۇزەگە اسادى. باعدارداما اياسىندا 21 جاستان 35 جاسقا دەيىنگى كاسىپكەرلەر جەڭىلدەتىلگەن نەسيەگە قول جەتكىزە الادى. باعدارلاماعا قاتىسۋشىلاردىڭ جاسى «اگرارلىق كرەديتتىك كورپوراتسياعا» ءوتىنىش بەرگەن كەزى ەسكەرىلەدى.
بۇل نەسيە جاستارعا ءوز ءىسىن اشۋ, ودان ءارى دامىتۋ ماقساتىندا كومەك بەرۋدى كوزدەيدى. شارتقا سايكەس جاستاعى ەل ازاماتى كەز كەلگەن سالادا بيزنەس اشا الادى. بيزنەستىڭ تۇرىنە شەكتەۋ جوق.
نەسيە – مولشەرى 5 ملن تەڭگەگە دەيىن. مەرزىمى – كەز كەلگەن ماقساتتاعى جوبالار ءۇشىن – 5 جىل, ال مال شارۋاشىلىعى ءۇشىن – 7 جىلعا دەيىن. نەگىزگى قارىز بەن سىياقىنى وتەۋگە جەڭىلدىك كەزەڭ دە قاراستىرىلعان. ول نەسيە مەرزىمىنىڭ ۇشتەن ءبىرىن قۇرايدى.
مۇنداعى باستى شارت – كاسىپكەرلىكتە بەس جىلدان كەم ەمەس ءوتىل جانە كەپىلدىڭ بولۋى. كەپىلگە كاسىپكەر جىلجىمالى, يا جىلجىمايتىن م ۇلىكتى قويا الادى. كەپىل تابىلماسا, كەپىل بەرۋشى رەتىندە اتا-اناسىن, تۋىستارىن تارتۋىنا مۇمكىندىگى بار. ميكروكرەديتتەر ارنايى كوميسسيانىڭ شەشىمى نەگىزىندە بەرىلەدى. كوميسسيا الدىندا ۇمىتكەرلەر وزدەرىنىڭ بيزنەس-جوبالارىن تانىستىرىپ, قورعاۋعا ءتيىس.
قاراعاندى