مادەنيەت جانە سپورت مينيسترلىگىنىڭ قولداۋىمەن ۇلتتىق مۋزەيدە «قولونەرشىلەر ورتالىعى» مەن «پالەونتولوگيا» زالىنىڭ اشىلۋ سالتاناتى ءوتتى.
اشىلۋ سالتاناتىنا مادەنيەت جانە سپورت ءمينيسترى اسحات ورالوۆ, رەسپۋبليكالىق جانە وبلىستىق مۋزەي باسشىلارى, عالىمدار مەن قوعام قايراتكەرلەرى قاتىستى.
«قولونەرشىلەر ورتالىعىندا» ەلىمىزدىڭ زاماناۋي شەبەرلەرى جاساعان ۇزدىك ساندىك-قولدانبالى ونەر تۋىندىلارى جۇرتشىلىق نازارىنا ۇسىنىلدى. ۇلى جىبەك جولى بويىنداعى كونە شاھارلاردىڭ كوركەم ۇلگىسىمەن جاسالعان ورتالىققا كەلگەن قوناقتار قولونەر بۇيىمدارىن تاماشالاپ, ۇناعان تۋىندىلاردى ساتىپ الۋعا مۇمكىندىك الدى.
ال «پالەونتولوگيا» زالىندا قازاقستان اۋماعىنان تابىلعان تيراننوزاۆر, ءۇش ساۋساقتى گيپپاريون جىلقىسى, ۇلكەن ءمۇيىزدى بۇعى, الىپ مۇيىزتۇمسىق (يندريكوتەري), مامونت سەكىلدى ەجەلگى تاريحقا دەيىنگى كەزەڭ جانۋارلارى مەن پالەونتولوگتار, گەولوگتار تاپقان باسقا دا تىرشىلىك يەلەرىنىڭ قاڭقالارى جيناقتالدى. زاماناۋي اقپاراتتىق قۇرالدارمەن جابدىقتالعان ورتالىقتى دايارلاۋ بارىسىندا پاريجدەگى پالەونتولوگيا مۋزەيىنىڭ, لوندون مەن بەرليندەگى جاراتىلىستانۋ مۋزەيلەرى سەكىلدى الەمدەگى الدىڭعى قاتارلى ورتالىقتاردىڭ تاجىريبەلەرى ەسكەرىلىپتى. سونىمەن قاتار زالدىڭ عىلىمي تۇجىرىمداماسىن دايىنداۋعا وتاندىق جانە شەتەلدىك تانىمال پالەونتولوگ عالىمدار تارتىلعان.
«پالەونتولوگيا زالى مەن قولونەر شەبەرلەرى ورتالىعىنىڭ اشىلۋى – ۇلتتىق مۋزەي ءۇشىن عانا ەمەس, بۇكىل ەلىمىز ءۇشىن ماڭىزدى وقيعا. بىرەگەي ەكسپوزيتسيا كەلۋشىلەرگە ءبىزدىڭ زامانىمىزعا دەيىنگى ەلىمىزدىڭ تاريحىن كورسەتىپ قانا قويماي, وتاندىق پالەونتولوگيا ءۇشىن ماڭىزدى ورىنعا اينالاتىنىنا سەنىمدىمىن. ال قولونەر شەبەرلەرىنىڭ ورتالىعى ءبىزدىڭ سۋرەتشىلەرىمىزگە ۇلتىمىزدىڭ باي مادەنيەتى تۋرالى مالىمدەمە جاساۋعا, ساندىك-قولدانبالى ونەر شەبەرلەرىنە ءوزارا تاجىريبە الماسۋعا مۇمكىندىك بەرەدى جانە جالپى ەلىمىزدە مۋزەي ماركەتينگى مەن مەنەدجمەنتىن دامىتۋعا قىزمەت ەتەدى», دەپ اتاپ ءوتتى اسحات ورالوۆ.