جاقىندا جاساندى ينتەللەكت يندەكسى بويىنشا «Artificial Intelligence Index Report 2023» اتتى ەسەپ جاريالاندى. مۇندا جىل سايىن سالىستىرىلعان, تالدانعان جاڭا دەرەكتەر ۇسىنىلادى. بۇل – ستەنفورد ۋنيۆەرسيتەتىنىڭ ادامعا باعىتتالعان جاساندى ينتەللەكت ينستيتۋتىنىڭ (HAI) جەكە باستاماسى. بۇل جاساندى ينتەللەكتىنى جاۋاپكەرشىلىكپەن جانە ەتيكالىق تۇرعىدان دامىتۋ ماقساتىندا ماڭىزدى شەشىم قابىلداۋعا مۇمكىندىك بەرەدى.
اقش پەن قىتاي اراسىنداعى جاساندى ينتەللەكت بويىنشا بىرلەسكەن زەرتتەۋلەردىڭ سانى 2010 جىلدان بەرى شامامەن 4 ەسە وسكەن.
بۇل سالاداعى ۇلىبريتانيا مەن قىتاي ىنتىماقتاستىعىنىڭ جالپى كولەمى 2,5 ەسە ارتقان
بۇعان دەيىن جاساندى ينتەللەكت يندەكسىن شىعارۋ ماقساتىندا جانە اتالعان سالاداعى الەمدىك پروگرەستى باقىلاۋ ءۇشىن كوپتەگەن ۇيىمدارمەن ىنتىماقتاستىق ورناتىلعان ەدى. مۇنداي ۇيىمداردىڭ قاتارىندا: دجوردجتاۋن ۋنيۆەرسيتەتىنىڭ قاۋىپسىزدىك جانە جاڭا تەحنولوگيالار ورتالىعى, «LinkedIn», «NetBase Quid», «Lightcast» جانە «McKinsey» بار.
بيىلعى ەسەپتە «Foundation» مودەلدەرىنىڭ (ۇلكەن دەرەكتەن ۇيرەنىپ, باسقا قوسىمشالارعا بەيىمدەلەتىن جي مودەلى) جاڭا تالداۋلارى, ونىڭ ىشىندە گەوساياسات پەن وقۋ شىعىندارى, جاساندى ينتەللەكت جۇيەسىنىڭ قورشاعان ورتاعا اسەرى, جاساندى ينتەللەكت ءبىلىمى جانە وسى سالاداعى قوعامدىق پىكىر تەندەنتسياسى قامتىلعان. بۇل يندەكستە جاساندى ينتەللەكت سالاسىنداعى الەم ەلدەرىنىڭ زاڭنامالارىنداعى وزگەرىستەردى باقىلاۋ جۇمىسى 2022 جىلعى 25 ەلدەن 2023 جىلى 127 ەلگە دەيىن كەڭەيتىلگەن.
جاساندى ينتەللەكت يندەكسىن شىعارۋدا «NetBase Quid» 500 ميلليون دەرەككوز بەن الەۋمەتتىك جەلىدەگى پىكىرلەردى قاراپ, سالاعا قاتىستى الەمدەگى وڭ جانە تەرىس پىكىردى ساراپتايدى. اقش پەن قىتاي اراسىنداعى جاساندى ينتەللەكت بويىنشا بىرلەسكەن زەرتتەۋلەردىڭ سانى 2010 جىلدان بەرى شامامەن 4 ەسە وسكەن. بۇل سالاداعى ۇلىبريتانيا مەن قىتاي ىنتىماقتاستىعىنىڭ جالپى كولەمى 2,5 ەسە ارتقان. الايدا, اقش پەن قىتايدىڭ كەلىسىمدەرى 2020 جىلدان 2021 جىلعا دەيىن تەك 2,1%-عا ءوسىپ, 2010 جىلدان بەرگى جىلدىق ءوسىمنىڭ ەڭ تومەنگى كورسەتكىشىن كورسەتتى.
سوڭعى ۋاقىتتا رەزونانس تۋدىرعان باستاما – ChatGPT جاساندى ينتەللەكتى. ول ۋنيۆەرسيتەت دەڭگەيىندەگى ءتۇرلى تاقىرىپتا ەسسە جازۋعا قابىلەتتى جانە مۋزىكا شىعارا الادى. بۇعان قوسا اداممەن كۇندەلىكتى سويلەسىپ, كەز كەلگەن سۇراعىنا جاۋاپ بەرەدى. چات-بوت ىسكە قوسىلعالى, باستاپقى بىرنەشە ايدىڭ وزىندە بەلسەندى قولدانۋشىلار سانى 100 ميلليونعا جەتتى. وسىلايشا ونلاين دوس تاريحتاعى ەڭ جىلدام دامىپ كەلە جاتقان تۇتىنۋشى قولدانباسىنا اينالىپ ۇلگەردى. كەيىن ChatGPT-ءدىڭ شىعارىلىمى مەن تەحنيكالىق مۇمكىندىكتەرى عالىمدار اراسىندا جاساندى ينتەللەكتىنىڭ ادامزاتتىڭ بولاشاعىنا تيگىزەتىن اسەرى تۋرالى سۇراقتار تۋعىزدى.
2021 جىلى جاساندى ينتەللەكتىنىڭ كومپيۋتەرلىك كورۋ باعىتى بويىنشا ەڭ كوپ باسىلىم شىعارعان قىتايلىق 10 عىلىمي ورتالىق بولدى. وسى تاقىرىپتا قحر عىلىم اكادەمياسى 562 ماقالا جاريالاعان.
كەستەدە بىلتىر جاساندى ينتەللەكت سالاسى بويىنشا ەڭ كوپ عىلىمي ەڭبەك شىعارعان الەمدەگى توپ 10 ورتالىق كورسەتىلگەن.
بۇگىندە ادام ءومىرىنىڭ كوپتەگەن سالاسى جاساندى ينتەللەكتىمەن بايلانىستى. وعان دالەل دە جەتكىلىكتى. قازىر جاساندى ينتەللەكتىنىڭ ادام كەلبەتىن تانۋداعى تەحنيكالىق جۇيەلەرى 100% جەتىلگەن. سوندىقتان ول قاۋىپسىزدىك شارالارىن ساقتاۋ ماقساتىندا ءىرى مەگاپوليستەردە, اۋەجاي مەن ۆوكزالداردا جانە ادام كوپ جۇرەتىن قوعامدىق ورىنداردا قولدانىلىپ ءجۇر.
سونداي-اق جاساندى ينتەللەكت جۇيەلەرى مەديتسينا سالاسىندا زاقىمدانعان اعزا ورگاندارىن سەگمەنتتەپ, وپەراتسيانىڭ ءساتتى وتۋىنە, دارىگەرلەردىڭ دۇرىس شەشىمدى جىلدام ءارى ءتيىمدى قابىلداۋىنا كومەكتەسەدى. تەحنوكراتتاردىڭ بولجاۋىنشا, كەلەشەكتە كۇردەلى وپەراتسيالاردى جاساندى ينتەللەكتىمەن جابدىقتالعان روبوتتار جاسايدى.
بۇدان بولەك, تەحنولوگيانىڭ دامۋىمەن شەت تىلدەرىندە جازىلعان ماتىندەر وزگە تىلدەرگە ساپالى اۋدارىلا باستادى. ءتىپتى ادام داۋسىمەن ايتىلعان سوزدەردى ماتىنگە ءتۇسىرۋ سالاسىندا ايتارلىقتاي جەتىستىكتەر بار. عالىمداردىڭ باعدارلاۋىنشا, بولاشاقتا ەكى ەلدىڭ ازاماتى جاساندى ينتەللەكت فۋنكتسيالارىمەن جابدىقتالعان قۇلاققاپ ارقىلى ءبىر-ءبىرىن اۋدارماشىسىز تۇسىنەتىن بولادى.
بىلتىر ءماتىندى جاساندى ينتەللەكت ارقىلى بەينەكليپكە اينالدىرۋدىڭ بىرنەشە جوعارى ساپالى مودەلدەرى شىقتى. 2022 جىلدىڭ مامىر ايىندا تسينحۋا ۋنيۆەرسيتەتى مەن بەيجىڭ جاساندى ينتەللەكت اكادەمياسىنىڭ زەرتتەۋشىلەرى ءماتىندى بەينەگە تۇرلەندىرۋ ءۇشىن UCF-101 سىناعىندا سول كەزدەگى ەڭ جوعارى باستاپقى باللدى كورسەتكەن COG video ۇلگىسىن جاساپ, ۇسىندى. 2013-2022 جىلدار ارالىعىندا جاساندى ينتەللەكت سالاسىن دامىتۋعا سالىنعان ينۆەستيتسيا كولەمى بويىنشا اقش الدا كەلەدى. ەكىنشى ورىندا قىتاي, ودان كەيىن ۇلىبريتانيا تۇر.
سۇيىندىك قابىل,
«قازاقستاندىق قوعامدىق دامۋ ينستيتۋتى» كەاق ساراپشىسى