مەملەكەت باسشىسى قاسىم-جومارت توقاەۆ VIII سايلانعان پارلامەنتتىڭ ءبىرىنشى سەسسياسىندا ەل دامۋىنا ۇلەس قوساتىن بىرنەشە ماڭىزدى ماسەلەنى ەرەكشە اتاپ ءوتتى. سونىڭ ىشىندە ۇكىمەت پەن پارلامەنتكە ءتۋريزمدى دامىتۋ ماسەلەسىنە باسا نازار اۋدارۋعا ءتيىس ەكەنىن جەتكىزدى.
پرەزيدەنتىمىز ءوز سوزىندە «ەلىمىزدەگى ءتۋريزمنىڭ الەۋەتى زور, كورىكتى جەرلەرىمىز وتە كوپ. بىراق سول جەرلەرگە بارىپ دەمالۋعا ءالى دە جۇرتتىڭ قولى جەتە بەرمەيدى. بۇل سالاعا تىڭ سەرپىن بەرۋ ءۇشىن, ەڭ الدىمەن, ينفراقۇرىلىم ماسەلەسىن كەشەندى تۇردە شەشىپ, قىزمەت ساپاسىن تۇبەگەيلى جاقسارتۋ قاجەت», دەپ مالىمدەدى.
بۇگىندە تۋريزم سالاسى مەملەكەتكە ەڭ كوپ تابىس الىپ كەلەتىن بىردەن-ءبىر سالا ەكەنى بارشاعا بەلگىلى. سوندىقتان دا مەملەكەت باسشىسى ەلىمىزدەگى تۋريزم سالاسىن دامىتۋعا ەرەكشە توقتالىپ ءوتتى. قازىرگى تاڭدا قازاقستان ءتۋريزمى الەمدى شارپىعان پاندەمياعا دەيىنگى قالپىنا كەلىپ ۇلگەردى. ىشكى جانە كەلۋ ءتۋريزمىنىڭ, كورسەتىلگەن قىزمەتتەر كولەمىنىڭ جانە نومىرلىك قوردىڭ نەگىزگى كورسەتكىشتەرى وسكەنى بايقالادى.
قازاقستان دۇنيەجۇزىلىك ەكونوميكالىق فورۋمنىڭ الەمدىك تۋريزم رەيتىنگىندە پوزيتسياسىن جاقسارتىپ, 117 ەل اراسىندا 66-ورىنعا تۇراقتادى. ارينە, تۋريستەر سانىن ۇلعايتۋ ءۇشىن ءتيىستى ينفراقۇرىلىم سالۋ جانە قولايلى جاعداي جاساۋ قاجەت. كەيىنگى جىلدارى بۇل باعىتتا ايتارلىقتاي جۇمىستار اتقارىلىپ كەلەدى.
2019-2022 جىلدارى ەلىمىزدە 118 ينفراقۇرىلىمدىق جوبالاردى ىسكە اسىرۋعا 170,1 ملرد تەڭگە كولەمىندە قارجى ءبولىندى. بۇگىندە جالپى قۇنى 789,6 ملرد تەڭگەنى قۇرايتىن 197 جوبا ىسكە اسىرىلىپ جاتىر: كولىك ينفراقۇرىلىمى بويىنشا – 371,9 ملرد تەڭگەگە 95 جوبا, اۋماقتاردى اباتتاندىرۋ بويىنشا – 229,8 ملرد تەڭگەگە 47 جوبا, سۋمەن جابدىقتاۋ, سۋ بۇرۋ جانە كارىز بويىنشا – 84,7 ملرد تەڭگەگە 29 جوبا, ەلەكترمەن جانە جىلۋمەن جابدىقتاۋ بويىنشا – 103,2 ملرد تەڭگەگە 26 جوبا. سونىمەن قاتار تۋريستىك كەشبەك سياقتى مەملەكەتتىك قولداۋدىڭ جاڭا شارالارى ازىرلەنىپ جاتىر.
جالپى, جوعارىدا اتالعان باستامالاردى ساپالى ىسكە اسىرۋ ءتۋريستىڭ بۇكىل جول بويىنداعى جايلىلىعىن قامتاماسىز ەتەدى.
تالعات امانباەۆ,
«Kazakh Tourism» ۇلتتىق كومپانياسى»
اكتسيونەرلىك قوعامى باسقارما توراعاسى