حالىقارالىق قاتىناستار, قورعانىس جانە قاۋىپسىزدىك كوميتەتىنىڭ دەپۋتاتتارى وڭىرلەرگە ساپار بارىسىندا استانا جانە الماتى قالالارى مەن جەتىسۋ, قاراعاندى جانە قىزىلوردا وبلىستارىنداعى ءوندىرىس ورىندارىندا, وقۋ جانە مەديتسينالىق مەكەمەلەرىندە ەڭبەك ۇجىمدارىمەن بىرقاتار كەزدەسۋ وتكىزدى. ايماقتارداعى جۇزدەسۋلەرگە كاسىپكەرلەر دە قاتىستى.
كەزدەسۋلەردە كونستيتۋتسيالىق رەفورمانىڭ نەگىزگى ماقساتى مەن پارلامەنت قابىلداعان زاڭداردىڭ جەكەلەگەن ەرەجەلەرى تالقىلاندى. كەزدەسۋگە قاتىسۋشىلار مەملەكەت باسشىسىنىڭ باستامالارىنا قولداۋ ءبىلدىرىپ, قويىلعان مىندەتتەردى ىسكە اسىرۋعا دايىن ەكەندىكتەرىن جەتكىزدى.
سايلاۋشىلار الەۋمەتتىك قامسىزداندىرۋ, ءبىلىم بەرۋ جانە مەديتسينالىق قامتاماسىز ەتۋ ماسەلەلەرىنە باسا نازار اۋداردى. كەزدەسۋ بارىسىندا تۇرعىن ءۇي-كوممۋنالدىق سالاداعى زاڭنامالىق وزگەرىستەر, وتاندىق وندىرۋشىلەردى قولداۋ جاعدايى دا اڭگىمە ارقاۋىنا اينالدى. بيۋدجەت قارجىسىن ءتيىمدى جانە ماقساتتى جۇمساۋ, كومىر قازاندىقتارىن تابيعي گازدى پايدالانۋعا كوشىرۋ, ەلدى مەكەندەردىڭ ينفراقۇرىلىمىن دامىتۋ ماسەلەلەرى كوتەرىلدى.
ءوز شەشىمىن تالاپ ەتەتىن ماسەلەلەردىڭ قاتارىندا جاستارعا ارنالعان جۇمىس ورىندارىنىڭ بولماي وتىرعانى جانە اۋىلدىق جەرلەردە ءتيىستى ينفراقۇرىلىمنىڭ جوقتىعى, ءبىرىنشى كەزەكتە تۇتىناتىن ونىمدەر باعاسىنىڭ ءوسۋى, ورتا مەديتسينا قىزمەتكەرلەرىنىڭ جالاقىسى مەن ۇستەمە اقىلاردى ارتتىرۋ قاجەتتىگى, سونداي-اق ينجەنەرلىك كونسترۋكتسيالار مەن قۇرىلىس ماتەريالدارى ساپاسىنىڭ تومەندىگى دە ايتىلدى.
سەناتورلار استانا جانە قاراعاندى قالالارىنداعى بىرقاتار قورعانىس-ونەركاسىپ نىساندارىندا (وق-ءدارى زاۋىتى) بولىپ, قورعانىس جانە تج قىزمەتى مينيسترلىكتەرى اسكەري بولىمدەرىنىڭ باسشىلىعىمەن جانە جەكە قۇرامىمەن كەزدەستى.
سەناتور س.ەرشوۆ قاراعاندىداعى «Steel Manufacturing جشس» پاترون زاۋىتىندا بولعان كەزدە ءوندىرىستىڭ جۇمىس بارىسىمەن, بيىل العا قويعان مىندەتتەرمەن جانە بەلگىلەنگەن جوسپارلارىمەن, وزگە دە شەشىمى تابىلعان ماسەلەلەرمەن تانىستى. ول سونداي-اق قورعانىس مينيسترلىگىنىڭ 50185 اسكەري بولىمىندە بولىپ, اسكەري قىزمەتشىلەرمەن كەزدەستى جانە قويىلعان سۇراقتارىنا جاۋاپ بەردى. اسكەري قىزمەتشىلەر كەزدەسۋ كەزىندە دالالىق ءىسساپارلار ءۇشىن اقشالاي تولەمدەرگە, اسكەري قىزمەتشىلەردىڭ تۇرعىن ءۇي وتەماقىلارىنا, اسكەري قىزمەتتى وتكەرۋ جاعدايىنا بايلانىستى سۇراقتار قويدى. سەناتور كوتەرىلگەن بارلىق ماسەلەلەر زاڭ شىعارۋ قىزمەتى بارىسىندا ءتيىستى مەملەكەتتىك ورگاندار وكىلدەرىمەن بىرگە قارالىپ, ەسكەرىلەتىنىن اتاپ ءوتتى.
سەناتور د.نۇرجىگىتوۆا الماتى قالاسىندا ناۋرىزباي اۋدانىنىڭ ارداگەرلەر كەڭەسىنىڭ مۇشەلەرىمەن, «الماتى-تازالىق» مەكەمەسى مەن ونكولوگيا ينستيتۋتىنىڭ قىزمەتكەرلەرىمەن كەزدەسۋلەر وتكىزدى. وندا مەملەكەت باسشىسىنىڭ باستاماسى بويىنشا قولعا الىنعان رەفورمالار اياسىندا پارلامەنت قابىلدانعان زاڭدار, سونداي-اق الەۋمەتتىك قامسىزداندىرۋ جانە ايەلدەردىڭ دەنساۋلىعىن قورعاۋ ماسەلەلەرى تالقىلاندى.
دەپۋتات ع.سارىباەۆ تالدىقورعان قالاسىنداعى تابيعي گازعا قوسىلعان №4 قازاندىعى مەن كومىر جاعىلاتىن №9 قازاندىقتىڭ عيماراتىندا بولدى. جەرگىلىكتى ماماندار كومىر قازاندىقتارىنىڭ تابيعي گازدى پايدالانۋعا كوشۋىنىڭ ماڭىزدىلىعىن اتاپ ءوتتى. بۇل ەكولوگيالىق ماسەلەلەردى شەشىپ قانا قويماي, ايماقتىڭ الەۋمەتتىك-ەكونوميكالىق دامۋىن جاقسارتۋعا مۇمكىندىك بەرەتىن بولادى.