تسيفرلىق دامۋ جانە اەروعارىش ونەركاسىبى ءمينيسترى باعدات مۋسين 2027 جىلعا قاراي رەسپۋبليكالىق جانە وبلىستىق ماڭىزى بار جولداردى ينتەرنەتكە 100 پايىز قوسۋعا ۋادە بەردى, دەپ حابارلايدى Egemen.kz.
«تاعى ءبىر ماڭىزدى ماسەلە رەسپۋبليكالىق جانە وبلىستىق ماڭىزى بار جولداردى ۇيالى بايلانىس پەن ينتەرنەتكە قوسۋ. ينتەرنەت قازىر وسى جولداردىڭ 25 پايىزىندا عانا قولجەتىمدى», دەدى باعدات مۋسين ۇكىمەت وتىرىسىندا.
ونىڭ ايتۋىنشا, 2027 جىلعا قاراي بۇل جولداردىڭ 100 پايىزى ينتەرنەت پەن ۇيالى بايلانىسپەن قامتىلادى.
«بۇل ءىس-شارالار «قولجەتىمدى ينتەرنەت» ۇلتتىق جوباسى اياسىندا وپەراتورلارعا بەرىلەتىن سالىقتىق پرەفەرەنتسيالاردى جانە ولاردىڭ ينۆەستيتسيالارى مەن رەسپۋبليكالىق جانە جەرگىلىكتى بيۋدجەتتەردىڭ شىعىستارىن قارجىلاندىرۋ ارقىلى جۇزەگە اسىرىلادى», دەپ قوستى ول.