جاقىندا بۋرابايدا قازاقستان پرەزيدەنتى جانىنداعى شەتەل ينۆەستورلارى كەڭەسىنىڭ كەزەكتى وتىرىسى وتەدى دەپ جوسپارلانعان. وعان مەملەكەت باسشىسى نۇرسۇلتان نازارباەۆ قاتىسادى دەپ كۇتىلىپ وتىر.
ال وسى ينۆەستيتسيا ماسەلەسىنە وراي اڭگىمە قوزعايتىن بولساق, اسپاناستى ەلىنىڭ جەرى دە, تىرلىگى دە الىپ, وراسان ەكەنى بارىمىزگە بەلگىلى. ايتەۋىر, ۇلكەن بيزنەستى قولعا الىپ, كاسىبىن ورگە دوڭگەلەتكىسى كەلگەندەردىڭ كوبى وسى ەلمەن تىعىز قارىم-قاتىناس جاساۋدى دۇرىس كورەدى. شىنىندا, تىرشىلىگى قىم-قۋىت قىتاي ەلىنەن ءبىزدىڭ ۇيرەنەرىمىز, الارىمىز كوپ. مىنە, جامبىل وبلىسىنىڭ اكىمدىگى وسىناۋ الىپ ەلمەن الىس-بەرىس جاساۋدىڭ جولىن تاپتى. جاقىندا قىتاي ەلىنىڭ سيان قالاسىندا 18-ءشى ساۋدا-ينۆەستيتسيالىق كورمەسى مەن «جىبەك جولى» جارمەڭكەسى وتكەن بولاتىن. وعان قىتايدىڭ بارلىق پروۆينتسياسىنان, اۆتونوميالىق ولكەلەرىنەن, ورتالىق باعىنىستاعى قالالارىنان 674 دەلەگاتسيا جانە 77 ەل قاتىستى.
وسى كورمەدە جامبىل وبلىسىنىڭ دەلەگاتسياسى بىرقاتار كەلىسىمشارتتارعا قول جەتكىزىپ, اۋليەاتا وڭىرىنە ۇلكەن ينۆەستيتسيانىڭ كەلۋىنە جول اشتى. ياعني, قىتاي كاسىپكەرلەرى جالپى سوماسى 300 ملن. دوللاردان اساتىن جوبالارعا قاتىسۋعا نيەت ءبىلدىرىپ وتىر. ناقتىراق ايتساق, «جىبەك جولى» حالىقارالىق جارمەڭكەسىنىڭ اياسىندا جامبىل وبلىسىنىڭ جانە قحر شەنسي پروۆينتسياسىنىڭ وكىلدەرى قىتايلىق كومپانيالاردىڭ سوماسى 300 ملن. دوللاردان اساتىن (50 ملرد. تەڭگە) وسى قازاقستاندىق وڭىردەگى جوبالاردى ىسكە اسىرۋعا قاتىسۋىن كوزدەيتىن بىرقاتار قۇجاتتارعا قول قويدى. بۇل قۇجاتتار جامبىل وبلىسى اكىمدىگى مەن شەنسي پروۆينتسياسىنىڭ حالىقتىق ۇكىمەتى اراسىندا اۋىل شارۋاشىلىعى, مەديتسينالىق, تۋريستىك جانە باسقا دا سالالارداعى ىنتىماقتاستىقتى ودان ءارى دامىتۋدى كوزدەيدى. سونداي-اق, قىتايلىق كومپانيالار تاراز قالاسىنداعى №4 جىلۋ ەنەرگيا ورتالىعىن قايتا جاڭعىرتۋعا 193,8 ملن. اقش دوللارىن, جامبىل وبلىسىنداعى كۇن ەلەكتر ستانساسىنىڭ قۋاتىن 1,5-تەن 7 مۆت-قا كەڭەيتۋ ءۇشىن 13 ملن. دوللار, شىعارىلعان ونىمدەردىڭ ەۋرو-4 ستاندارتتارىنا سايكەس كەلۋى ءۇشىن جاڭا جابدىقتار مەن تەحنولوگيالاردى ەنگىزىپ, قولدانىستاعى گازدى قايتا وڭدەيتىن زاۋىتتى جاڭعىرتۋعا 54 ملن. دوللار جۇمساپ, جەل ەلەكتر ستانساسىن 1,5 مۆت-تان 21 مۆت-قا دەيىن ۇلعايتۋعا قاتىسۋعا نيەتتەنىپ وتىر.
شەنسي پروۆينتسياسى قىتايدىڭ اۋىل شارۋاشىلىعى سالاسىنداعى جەتەكشى ءوڭىرى بولىپ ەسەپتەلەدى. الەمدەگى الما باعىنىڭ 10 پايىزى وسى جەردە وسىرىلەدى. «ءبىز قىتايلىق كاسىپكەرلەرمەن وسى سالادا بىرلەسىپ جۇمىس ىستەمەكپىز. ەجەلگى سياندا ەكى مىڭجىلدىق تاريحى بار تاراز ارقىلى وتەتىن ۇلى جىبەك جولى باستالعان. سوندىقتان, ءبىزدىڭ باۋىرلاس قالالار مەن وڭىرلەر اراسىندا تۋريستىك سالانى دامىتپاق ويىمىز بار. ەكسپو-2017-گە ءبىز تارازدىڭ ەجەلگى تاريحىمەن تانىستىرۋ ءۇشىن قىتايلىق تۋريستەردى مولىنان تارتۋعا نيەتتىمىز», دەدى ك. كوكىرەكباەۆ.
ءبىر ايتا كەتەرلىگى, تاراز بەن سيان تۋىستاس قالالار بولىپ تابىلادى. اللا قالاسا, الماسى كوپ سيان مەن جاسىل جەلەگى مول تاراز قالالارىنىڭ بۇل باۋىرلاستىعى بارىس-كەلىستى كوبەيتىپ, ايماق ەكونوميكاسى دامۋىنىڭ جاڭا پاراعىن اشادى دەگەن سەنىم بار.
ورالحان ءداۋىت,
«ەگەمەن قازاقستان».
جامبىل وبلىسى.