استانا قالاسىنىڭ اكىمى التاي كولگىنوۆ Instagram پاراقشاسىندا سپورت وكىلدەرىمەن كەزدەسكەنىن ءمالىم ەتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
«جاستارمەن جانە سپورت وكىلدەرىمەن كەزدەستىم. ەركىن ميكروفون فورماتىندا وتكەن جيىندا نيەت بىلدىرگەن كەز كەلگەن ادام سۇراقتارىن قويدى. مىسالعا ولاردىڭ قاتارىندا تۇرعىن ءۇي باعدارلامالارىنا قاتىسۋ, ءبىلىم بەرۋ سالاسىندا ءتۇرلى وقىتۋ جوبالارىن ەنگىزۋ, سپورت ورتالىقتارىن اشۋ, جاس سپورتشىلاردى قولداۋ جانە ت.ب. بار.
مۇنداي كەزدەسۋلەر قيىندىقتاردى ءتيىمدى ءارى جىلدام شەشۋگە, پروبلەمالاردى نازاردا ۇستاۋعا مۇمكىندىك بەرەدى.
ماسەلەن وسىعان دەيىن جاتتىقتىرۋشىلار مەن سپورتشىلارعا جەكە مەديتسينالىق مەكەمە ءبولۋ تۋرالى پروبلەما كوتەرىلگەن بولاتىن. سەبەبى ولار كاسىبي تەكسەرۋلەردى وزگە پاتسيەنتتەرمەن قاتار ءوتىپ, بىرگە ەمدەلەتىن. ال بۇل سپورتشىلاردىڭ دايىندىق ساپاسى مەن ساۋىقتىرۋ پروتسەسىنە كەرى اسەر ەتەتىن. وسى ماسەلەنى بىرلەسە تالقىلاعاننان كەيىن سپورتشىلارعا ارنالعان ارنايى مەديتسينالىق ورتالىق (ا-82 كوشەسىندەگى «نۇرلى جول» تەمىرجول ۆوكزالىنىڭ جانىندا) اشىلدى», دەپ جازدى اكىم.
ءمينيستردىڭ ايتۋىنشا, جەكپە-جەك ونەرى ورتالىقتارى, جەكپە-جەك زالى جانە ت.ب. اشىلىپ, «تولقىن» سپورت كەشەنى مەن «جاستار» سارايىندا جوندەۋ جۇمىسى جۇرگىزىلدى. «قازاقستان» سپورت كەشەنىندە قايتا جوندەۋ جانە جاڭعىرتۋ جۇمىسى ءجۇرىپ جاتىر.
سونىمەن قاتار كوكتال-2 جانە ءوندىرىس ەلدى مەكەندەرىندە دەنە شىنىقتىرۋ-ساۋىقتىرۋ كەشەندەرى اشىلدى. اتالمىش ورىنداردا سپورتتىڭ 10 ءتۇرى بويىنشا 1 مىڭعا جۋىق بالا جاتتىعىپ ءجۇر. تاعى ەكى ەلدى مەكەندە ءدال وسىنداي دەنە شىنىقتىرۋ-ساۋىقتىرۋ كەشەندەرىنىڭ قۇرىلىسى ءجۇرىپ جاتىر. بۇقارالىق سپورتتى قارجىلاندىرۋدى 3 ەسەگە ارتتى.
2020-2021 جىلدارى جاتتىقتىرۋشى-وقىتۋشىلاردىڭ جالاقىسى 50%-عا, بيىل تاعى 25%-عا ارتتى. ال كادر تاپشىلىعىن شەشۋ ءۇشىن «دەنە شىنىقتىرۋ جانە سپورت» ماماندىعى بويىنشا گرانتتار بولەمىز.
سول سياقتى جاستاردى قولداۋ بويىنشا بەلسەندى جۇمىس جۇرگىزىپ جاتىرمىز. جاستار جەلىسى بويىنشا بىرنەشە تۇرعىن ءۇي باعدارلاماسى بار. وتكەن جىلى جەڭىلدەتىلگەن نەسيەلەۋ بويىنشا ارنايى «Elorda Zhastary» تۇرعىن ءۇي باعدارلاماسىن ەنگىزدىك. 2 جىل ىشىندە 3,4 ملرد تەڭگەگە نەسيە بەرىلدى. وزگە باعدارلاما – جالعا الۋ بويىنشا 3 جىل ىشىندە جۇمىس ىستەيتىن جاستارعا 2,5 مىڭعا جۋىق پاتەر بەرىلدى.
«ماڭىزدى ماسەلەلەردىڭ ءبىرى – جۇمىسقا ورنالاسۋ. وتكەن جىلى 6 مىڭ جاس جۇمىسقا ورنالاستى. جىل سوڭىنا دەيىن تاعى 6,5 مىڭنان استام جاستى جۇمىسقا ورنالاستىرۋدى جوسپارلاپ وتىرمىز. سونداي-اق بيزنەس-يدەيالاردى جۇزەگە اسىرۋ ءۇشىن گرانتتار بەرەمىز.
اۋقىمدى ءارى جۇيەلى جۇمىس جاسالدى, بىراق ءالى دە اتقارىلاتىن شارۋا كوپ. كەلىپ تۇسكەن سۇراقتاردى شەشۋ ماسەلەسى قولعا الىندى, ورىنداۋ كەستەسىن جاسايمىز», دەپ جازدى التاي كولگىنوۆ.