استانا. 26 مامىر. قازاقستاننىڭ وزەندەرى مەن كولدەرىندە وتكەن تاۋلىكتىڭ ىشىندە 7 ادام سۋعا اعىپ كەتتى. بۇل تۋرالى توتەنشە جاعدايلار مينيسترلىگىنىڭ دەرەگىنە سىلتەمە جاساعان «قازاقپارات» حابارلادى.
تالدىقورعان ماڭىنداعى قاراتال وزەنىندە شومىلىپ جۇرگەن 16 جاسار قىز سۋدان شىعا الماي قالدى. ونىڭ دەنەسىن الماتى وبلىستىق توتەنشە جاعدايلار دەپارتامەنتى سۋدان قۇتقارۋ قىزمەتىنىڭ قىزمەتكەرلەرى تاۋىپ الدى.
الماتى وبلىسىندا 18 جاسار جاس جىگىت تە سۋدان اجالىن تاپتى. ول قاراساي اۋدانى جەرىندەگى «№2 وكتيابر» سۋ قويماسىنا باتىپ كەتتى. شومىلىپ ءجۇرىپ سۋعا كەتىپ قالعان ونىڭ دەنەسىن وبلىستىق توتەنشە جاعدايلار دەپارتامەنتى سۋدان قۇتقارۋ قىزمەتى تاۋىپ الدى.
بۇل كۇنى وسى وبلىستىڭ ىلە اۋدانىندا دا سۋدىڭ سالدارىنان قارا جامىلىپ قالعان وتباسى بولدى. 1985 جىلى تۋعان جىگىت وسىنداعى «لوكاتور» دەپ اتالاتىن كولگە باتىپ كەتتى. ونىڭ ءمايىتى وبلىستىق توتەنشە جاعدايلار دەپارتامەنتى سۋدان قۇتقارۋ قىزمەتىنىڭ كۇشىمەن سىرتقا شىعارىلدى.
تارازداعى «بازارباي» كانالىنان 1994 جىلى تۋعان ەكى جاس جىگىت شىعا الماي قالعان. ساعا شومىلىپ ءجۇرىپ اعىپ كەتكەن ولاردىڭ ءبىرىنىڭ دەنەسى تابىلدى. ەندى سۋدان قۇتقارۋ قىزمەتىنىڭ قۇتقارۋشىلارى ەكىنشىسى ىزدەستىرىپ جاتىر.
وڭتۇستىك قازاقستان وبلىسىنىڭ تۇركىستان قالاسىندا دا ءبىر ءجاسوسپىرىم ءتىلسىز جاۋدىڭ قۇربانىنا اينالدى. قالا ىرگەسىندە اعىپ جاتقان قاراشىق وزەنىنىڭ ءيىرىمى 2001 جىلى تۋعان بالانى تارتىپ اكەتتى. ونىڭ دەنەسىن جەرگىلىكتى پوليتسيا قىزمەتكەرلەرى الىپ شىققان.
سولتۇستىك قازاقستان وبلىسىنىڭ لوبانوۆو سەلوسىندا بالىق اۋلاپ جۇرگەن كەزىندە 1986 جىلى تۋعان ازامات سۋعا باتىپ كەتكەن. ونىڭ دەنەسىن وبلىستىق توتەنشە جاعدايلار دەپارتامەنتى سۋدان قۇتقارۋ قىزمەتى سۋدان الىپ شىقتى.
قۇرىش نۇرىمبەت.
دەرەككوز: «قازاقپارات».
فوتو: ngs24.ru.