قازاقستان ءوزىنىڭ گەوساياسي ورنالاسۋىن تاياۋ 10 جىلدا دۇرىس پايدالانۋى كەرەك. VII استانا ەكونوميكالىق فورۋمىندا ۇكىمەت باسشىسى كارىم ءماسىموۆ وسىلاي دەدى. بۇل تۋرالى «قازاقستان جاڭالىقتارى» حابارلادى.
جيىن بارىسىندا ك.ءماسىموۆ: «رەسەي الداعى ون جىلدىقتا ىقپالداستىق ماسەلەسىندە باتىستان گورى قىتايعا ۇلكەن ءمان بەرەدى. ەلىمىز گەوگرافيالىق تۇرعىدا رەسەي مەن قىتايدىڭ اراسىندا ورنالاسقان. سوندىقتان, قىتايدان رەسەيگە, رەسەيدەن قىتايعا باعىت العان قالىڭ كولىكتىك اعىننىڭ استىندا قالامىز. وسى ورايدا ءبىز ءوزىمىزدىڭ گەوگرافيالىق جاعدايىمىزدى ءتيىمدى پايدالانۋىمىز قاجەت.
سول ءۇشىن ورنالاسۋىمىزدى كاپيتالداندىرىپ, تۇراقتى ەكونوميكاعا يە بولۋ ءۇشىن بارلىق ەلدەردەن ينۆەستيتسيالار تارتۋىمىز كەرەك», – دەدى. سونداي-اق, ول جاقىن كۇندەرى ەۋرازيالىق ەكونوميكالىق وداقتى قۇرۋ تۋرالى شارتقا قول قويىلاتىنىن جانە ول ۇدەرىسكە قازاقستان دا قاتىسىپ جاتقانىن اتاپ ءوتتى. ۇكىمەت باسشىسى: «ەۋرازيالىق ەكونوميكالىق وداق شەڭبەرىندە قازاقستان ساياسي تۇرعىدا تاۋەلسىز بولادى. ءبىز دۇنيەجۇزىلىك ساۋدا ۇيىمىنا ەنۋگە, ەۋروپالىق وداقپەن ارىپتەستىك تۋرالى كەلىسىمگە قول قويۋعا, قىتايمەن اراداعى بايلانىستى ءارى قاراي تەرەڭدەتۋگە, سونىمەن قاتار ەۋرازيالىق ەكونوميكالىق وداقتىڭ ءبىر مۇشەسى اتانۋعا دايىنبىز», – دەدى.
جولدىباي بازار. دەرەككوز: «قازاقستان جاڭالىقتارى». فوتو: i-news.kz.