استانا. 23 مامىر. ورالدا مانشۇك مامەتوۆانىڭ مۇراجاي-ءۇيى تونالدى. قۋانىشقا وراي, كۇدىكتى كوپ ۇزاماي قۇرىقتالدى. بۇل تۋرالى «24kz» حابارلادى.
كەڭەس وداعىنىڭ باتىرى, قازاقتىڭ اياۋلى قىزى مانشۇك مامەتوۆا تۇرعان ءۇي قازىر مۇراجايعا اينالعان. مۇندا باتىر قىزدىڭ قولدانعان زاتتارى, كيىم-كەشەگى جانە باسقا دا بۇيىمدارى ساقتاۋلى تۇر.
ال وسى مۇراجايدى ءتۇن جامىلعان ۇرى توناپ كەتكەن. ارنايى قويىلعان كۇزەتشى – مۇراجاي ديرەكتورىنىڭ ۇلى تەرەڭ ۇيقىدا بولعان.
تەكسەرە كەلە انىقتالعانداي, مۇراجايدىڭ تەرەزەسىن سىندىرىپ, ىشكە كىرگەن ۇرى ءحىح عاسىردا شىعارىلعان «موسين» ۆينتوۆكاسى مەن كارابيندى, مەحانيكالىق پاتەفوندى, سونداي-اق, العاشقى قازاق اسكەري ءبولىمىن قۇرعان حاميت ءچۋريننىڭ راريتەتتىك بىلعارى رۋلەتكا-ولشەۋىشىن العان. مۇنى ازسىنعان توناۋشى مۇراجاي-ۇيدەگى DVD ويناتقىشتى دا قولتىعىنا قىستىرا كەتكەن.
قۋانىشقا وراي پوليتسەيلەر قىلمىستىڭ ءىزىن سۋىتپاي اشتى.
ورال وبلىستىق ىشكى ىستەر دەپارتامەنتىنىڭ ءباسپاسوز قىزمەتىنىڭ وكىلى. اسىلاي عۇباشەۆا: «شۇعىل شارالار قابىلداپ, يننوۆاتسيالىق تەحنولوگيانى قولدانۋدىڭ ناتيجەسىندە قىلمىس 4 ساعاتتىڭ ىشىندە اشىلدى. جەدەل باسقارۋ ورتالىعىنىڭ جانە سول ماڭداعى ۇيىمداردىڭ الدىنداعى بەينەباقىلاۋ كامەرالارىنداعى جازبالاردى قاراۋ ناتيجەسىندە كۇدىكتىنىڭ ءتۇر كەلبەتى مەن بارعان جەرلەرى انىقتالدى. ال كريمينالدىق پوليتسيا قىزمەتكەرلەرى ۇرلانعان قۇندى جادىگەرلەردى تاۋىپ, مۇراجايعا قايتارىپ بەردى» – دەدى.
كۇدىكتى بۇعان دەيىن دە 5 رەت ۇرلىعى ءۇشىن ءىستى بولعان 25 جاستاعى ازامات ەكىن.
مانشۇك مامەتوۆانىڭ مەموريالدىق مۇراجاي ءۇيىنىڭ ديرەكتورى سۆەتلانا بەكتەنوۆا: «وقىس جاعداي بولعاندا, پوليتسياعا حابار بەرەتىن ارنايى دابىل قوندىرعىسىن ورناتۋعا قاراجات جوق. سوندىقتان كۇزەتشىنىڭ قىزمەتىن پايدالانامىز. ال توناۋشىمەن بەتپە-بەت كەلگەن جاعدايدا, قىلمىسكەردىڭ ولاردى دا ايامايتىنى انىق. ەشكىمنىڭ جاپا شەكپەگەنىنە شۇكىر دەپ وتىرمىز. ەندى تەرەزەگە تور ورناتىپ, قاۋىپسىزدىكتى كۇشەيتەمىز», – دەدى.
جولدىباي بازار.
دەرەككوز: «24kz».
فوتو: «24kz».