قازاقستاننىڭ كاناداداعى ەلشىسى كونستانتين جيگالوۆ قازاقستان رەسپۋبليكاسىنىڭ وكىلەتتى وكىلى رەتىندە سان-حوسە قالاسىندا وتكەن كوستا-ريكانىڭ جاڭادان سايلانعان پرەزيدەنتى لۋيس گيلەرمو ءسوليستىڭ يناۋگۋراتسيا سالتاناتىنا قاتىستى.
ك.جيگالوۆ كوستا-ريكا باسشىسىنا قازاقستان پرەزيدەنتى ن.ءا.نازارباەۆتىڭ اتىنان قۇتتىقتاۋىن ءبىلدىرىپ, قازاقستان مەن كوستا-ريكا اراسىنداعى قاتىناستاردىڭ ءساتتى دامۋىنا ۇمىتتەنەتىنىن ايتتى.
ساپار شەڭبەرىندە ەلشى كوستا-ريكانىڭ سىرتقى ىستەر ءمينيسترى مانۋەل گونسالەس سانسپەن كەزدەسۋ وتكىزدى. اڭگىمە بارىسىندا تاراپتار ەكى جاقتى ىنتىماقتاستىقتىڭ پەرسپەكتيۆالى باعىتتارىن بەلگىلەپ, حالىقارالىق دەڭگەيدە, اسىرەسە, يادرولىق قاۋىپسىزدىك پەن تاراتپاۋدى قامتاماسىز ەتۋ سالاسىندا ءوزارا ارەكەتتەسۋدىڭ ماقساتقا ساي ەكەنىن اتاپ ءوتتى. اتالعان سالادا ەكى ەل اتقاراتىن جۇمىس حالىقارالىق قوعامداستىق تاراپىنان جوعارى باعالانادى.
كوستا-ريكا تاراپى قازاقستان پرەزيدەنتى ن.ءا.نازارباەۆ باستاماشىلىق ەتكەن «اتوم» جوباسىنا, سونداي-اق, استانادا الەمنىڭ جانە ءداستۇرلى ءدىندەر كوشباسشىلارىنىڭ سەزى سياقتى وركەنيەتتەر ۇنقاتىسۋىن كۇشەيتۋگە باعىتتالعان شارالارعا ۇلكەن قىزىعۋشىلىق تانىتتى.