VII استانا ەكونوميكالىق فورۋمى اياسىندا «مەملەكەتتىك قىزمەت پەرسونالىن باسقارۋ: احۋالى مەن بولاشاعى» اتتى جاھاندىق كونفەرەنتسيا ءوتتى. ونى مەملەكەتتىك قىزمەت ىستەرى اگەنتتىگى, قازاقستان پرەزيدەنتى جانىنداعى مەملەكەتتىك باسقارۋ اكادەمياسى مەن بۇۇ دامۋ باعدارلاماسى, ەۋروپا وداعى «قازاقستان ۇكىمەتى مەملەكەتتىك قىزمەتى رەفورماسى جانە مودەرنيزاتسياسى» جوباسى ۇيىمداستىردى. جيىنعا كەلگەن حالىقارالىق ساراپشىلار قازاقستاندىق مەملەكەتتىك قىزمەت مودەلىن جوعارى باعالادى.
اۋرەليا بۋشەز,
ەۋروپا وداعىنىڭ قازاقستانداعى وكىلدىك باسشىسى:
– قازاقستاندا مەملەكەتتىك قىزمەتتىڭ جاڭا مودەلى قولدانىلۋدا. بۇل نەگىزگى ءۇش قاعيداتقا سۇيەنەدى: قوعام الدىندا ەسەپ بەرۋ, اشىقتىق جانە مەريتوكراتيا. وسى باعىتتا قازاقستاندا كۇردەلى جۇمىستار اتقارىلىپ, جەتىستىكتەرگە قول جەتكىزىلدى. ماسەلەن, مەملەكەتتىك قىزمەت بويىنشا ايماقتىق حابتىڭ قۇرىلعانىن اتاپ وتۋگە بولادى. قازاقستاننىڭ ايماقتاعى باسقا مەملەكەتتەرگە كورسەتىپ وتىرعان ۇلگىسى قۇندى. بۇل وزگە ەلدەردىڭ مەملەكەتتىك قىزمەت سالاسىن جاڭعىرتۋعا سەرپىن بەرەدى. ارينە, ەۋروپا وداعى قازاقستاننىڭ مەملەكەتتىك قىزمەت سالاسىن مودەرنيزاتسيالاۋ بويىنشا جەتىستىكتەرىن تولىق مويىنداي وتىرىپ, ءارى قاراي وعان قولداۋ بىلدىرەدى.
چەستەر نيۋلاند,
اقش مەملەكەتتىك قىزمەت پەرسونالدى باسقارۋ ءوفيسى جانىنداعى باسقارۋشىلاردىڭ بىلىكتىلىگىن ارتتىرۋ فەدەرالدى ينستيتۋتىنىڭ بۇرىنعى ديرەكتورى, وڭتۇستىك كاليفورنيا ۋنيۆەرسيتەتىنىڭ پروفەسسورى:
– قازىرگى تاڭدا قازاقستاننىڭ مەملەكەتتىك قىزمەت جۇيەسى الەمدەگى, ونىڭ ىشىندە اقش-تى قوسا العاندا, ەڭ وزىق ۇلگىلەردىڭ ءبىرى. ساياسي لاۋازىمداعىلار سانى قىسقارتىلىپ, اكىمشىلىك مەملەكەتتىك قىزمەتكەرلەر سانى ارتتىرىلىپ وتىر. 70-ءشى جىلدارى اقش ساياسي قىزمەتشىلەر سانىن كوبەيتۋ جولىن ۇستانعان بولاتىن. ال بۇل ماسەلەدە امەريكالىق ۇكىمەت بەلگىلى ءبىر دەڭگەيدە ولقىلىق جىبەردى. بىزگە, كەرىسىنشە, سىزدەردىڭ مەملەكەتتىك قىزمەت جۇيەسىندەگىدەي باعىتتا جۇمىس جاساۋ كەرەك ەدى.
مانۆەل باداليان,
ارمەنيا رەسپۋبليكاسى ازاماتتىق قىزمەت كەڭەسى توراعاسى:
– ارمەنيانىڭ مەملەكەتتىك قىزمەت سالاسى قازاقستاننىڭ تاجىريبەسى مەن كومەگىنىڭ ارقاسىندا جەتىلە تۇسپەك. ءالى ءبىز قول جەتكىزە قويماعان ماسەلەلەر قىزىقتىرىپ وتىر. مىسالى, قازاقستان مەملەكەتتىك قىزمەتكەرلەردى سارالاپ, «ا» كورپۋسى سياقتى مەملەكەتتىك قىزمەت دەڭگەيلەرىن انىقتادى. ءبىز مەملەكەتتىك قىزمەت سالاسىن جەتىلدىرۋ ءۇشىن كوپتەگەن ەلدەردىڭ تاجىريبەسىمەن تانىستىق. سونىڭ ىشىندە قازاقستاننىڭ ۇلگىسى بىزگە وتە جاقىن كورىندى. سوندىقتان, جاڭادان «ۆەلوسيپەد» ويلاپ تاپپاي-اق, قازاق ۇلگىسىن الۋدى ءجون كوردىك.
ستەفان حلاۆاچەك,
اۆستريانىڭ ساۋدا پالاتاسى ەكونوميكالىق دامۋ ينستيتۋتىنىڭ ەكس-ديرەكتورى, باسقارۋ جانە ۇيىمداستىرۋدى دامىتۋ ماسەلەلەرى بويىنشا باس ساراپشى:
– اسىرەسە, مەملەكەتتىك قىزمەت بويىنشا استانا ايماقتىق حاب تۋرالى يدەيا وتە جاقسى! ويتكەنى, مەملەكەتتىك قىزمەتتى رەفورمالاۋ بارىسىندا اقپارات تاراتۋ, تاجىريبە ءبولىسۋ وتە ماڭىزدى. مەملەكەتتىك قىزمەتكەرلەر اراسىندا كوبىرەك اقپارات الماسىپ, ۇنەمى بىلىكتىلىكتەرىن ارتتىرىپ وتىرۋ قاجەت. ال سول بىلىمدەردى, اقپاراتتاردى ءبىر جەردەن تاراتاتىن ورتالىقتىڭ بولۋى وتە قىزىقتى!
جازىپ العان
ساۋلەبەك ءبىرجان.