ورتالىق سايلاۋ كوميسسياسى 5-7 قازان ارالىعىندا ەلەكتورالدىق وقىتۋ ورتالىعىنىڭ بازاسىندا ەلىمىزدە تىركەلگەن ساياسي پارتيالاردىڭ وكىلدەرى ءۇشىن «قازاقستان رەسپۋبليكاسىنداعى سايلاۋ پروتسەسى: تەورياسى مەن تاجىريبەسى» اتتى وقىتۋ كۋرسىن وتكىزىپ جاتىر.
ورتسايلاۋكوم تاراپىنان كۋرستىڭ سپيكەرلەرى تىزىمىندە وسك توراعاسىنىڭ ورىنباسارى كونستانتين پەتروۆ, كوميسسيا مۇشەلەرى ءسابيلا مۇستافينا, اناستاسيا ششەگورتسوۆا, اسىلبەك سماعۇلوۆ, سونداي-اق اپپارات قىزمەتكەرلەرى بار.
وقىتۋ كۋرسى ساياسي پارتيالاردىڭ وكىلدەرىنە پرەزيدەنت سايلاۋىن ازىرلەۋ مەن وتكىزۋ ەرەكشەلىكتەرىن تۇسىندىرۋگە باعىتتالعان. سونىڭ ىشىندە سايلاۋ ناۋقانىنىڭ نەگىزگى كەزەڭدەرى, كانديداتتاردى ۇسىنۋ مەن تىركەۋدىڭ ۇيىمداستىرۋشىلىق-قۇقىقتىق راسىمدەرى, مەملەكەتتىك جانە مەملەكەتتىك ەمەس قارجىلاندىرۋدى, اتاپ ايتقاندا, كانديداتتاردىڭ سايلاۋ قورلارىمەن جۇمىسى جانە سايلاۋالدى ۇگىت-ناسيحات جۇمىستارىن جۇرگىزۋ ماسەلەلەرى جان-جاقتى تالقىلانادى.
سەميناردا ساياسي پارتيالار وكىلدەرى مەن سايلاۋ پروتسەسىنە قاتىسۋشىلارعا ەلەكتورالدىق وقىتۋ ماسەلەلەرى, سايلاۋدى ۇلتتىق بايقاۋدى جۇزەگە اسىرۋ, مۇگەدەكتىگى بار ادامداردىڭ سايلاۋ قۇقىقتارىن قامتاماسىز ەتۋ, سايلاۋ زاڭناماسىن بۇزعانى ءۇشىن قۇقىقتىق جاۋاپكەرشىلىك ماسەلەلەرى جانە «قازاقستان رەسپۋبليكاسىنداعى سايلاۋ تۋرالى» زاڭعا ەنگىزىلگەن نوۆەللالار تانىستىرىلادى. سونداي-اق سەمينار بارىسىندا پارتيالاردىڭ سايلاۋ پروتسەسىنە قاتىسۋى بويىنشا ترەنينگ وتەدى.
20 قاراشاعا بەلگىلەنگەن كەزەكتەن تىس پرەزيدەنت سايلاۋىن وتكىزۋ كەزەڭىندە ەلەكتورالدىق وقىتۋ جونىندەگى جوسپارعا سايكەس بۇدان بۇرىن رەسپۋبليكالىق جانە وبلىستىق جاستار ۇيىمدارى, باق وكىلدەرى, وبلىستار اكىمدەرى اپپاراتى, سونداي-اق جەرگىلىكتى اتقارۋشى ورگاندار قارجىلىق قىزمەتتەرىنىڭ قىزمەتكەرلەرى ءۇشىن سەمينارلار وتكىزىلدى.
سايلاۋ ناۋقانى شەڭبەرىندەگى كەلەسى سەمينارلار وڭىرلەردىڭ سايلاۋشىلارمەن جۇمىس جونىندەگى call-ورتالىقتارىنىڭ قىزمەتكەرلەرى, كانديداتتاردىڭ سايلاۋالدى شتابتارىنىڭ, سايلاۋ جونىندەگى زاڭگەرلەر, سايلاۋدى ۇيىمداستىرۋعا جانە وتكىزۋگە جاۋاپتى جاو قىزمەتكەرلەرى, قۇقىق قورعاۋ جانە سوت ورگاندارىنىڭ, پروكۋراتۋرا ورگاندارىنىڭ قىزمەتكەرلەرى, قازاقستاننىڭ شەتەلدەگى وكىلدىكتەرىنىڭ جانىنان قۇرىلعان ۋچاسكەلىك سايلاۋ كوميسسيالارىنىڭ مۇشەلەرى ءۇشىن ۇيىمداستىرىلماق.
سونداي-اق وسى جىلدىڭ قازان جانە قاراشا ايلارىندا ورتالىق سايلاۋ كوميسسياسى مەن اقپارات جانە قوعامدىق دامۋ مينيسترلىگى پرەزيدەنتتىككە كانديداتتاردىڭ ۇگىت ناۋقانىن رەتتەۋ ماسەلەلەرى بويىنشا بۇقارالىق اقپارات قۇرالدارى ءۇشىن جانە سايلاۋدى ۇلتتىق بايقاۋدى جۇزەگە اسىرۋ ماسەلەلەرى بويىنشا ۇكىمەتتىك ەمەس ۇيىمدار ءۇشىن بىرلەسكەن سەمينارلار وتكىزۋدى جوسپارلاپ وتىر.