استانا. 19 مامىر. 8 توننادان اساتىن جۇك كوتەرەتىن اۋىر سالماقتى كولىكتەردىڭ قوزعالىسىنا جازعى كەزەڭگە وراي شەكتەۋلەر قويىلدى. بۇل تۋرالى كولىك جانە كوممۋنيكاتسيا مينيسترلىگىنىڭ ءباسپاسوز قىزمەتى حابارلادى.
اۋىر سالماقتى جۇك كولىكتەرىنىڭ قوزعالىسىنا شەكتەۋلەر الماتى, اتىراۋ, جامبىل, قاراعاندى (جەزقازعان ءوڭىرى), قىزىلوردا, وڭتۇستىك قازاقستان جانە ماڭعىستاۋ وبلىستارى ءۇشىن 1 ماۋسىم مەن 30 تامىز ارالىعىندا قويىلادى. ال, اقمولا, اقتوبە, شىعىس قازاقستان, باتىس قازاقستان, قاراعاندى (قاراعاندى ءوڭىرى), قوستاناي, پاۆلودار جانە سولتۇستىك قازاقستان وبلىستارىندا اتالعان شەكتەۋلەر 1 ماۋسىمنان 15 تامىزعا دەيىن ەنگىزىلمەك.
حابارلامادا ايتىلعانداي, بۇل شارا جالپى قولدانىستاعى رەسپۋبليكالىق ماڭىزى بار اۆتوموبيل جولدارىنىڭ بەتكى جابىندىسىن ساقتاۋ ماقساتىندا قولعا الىنىپ وتىر. كولىكتىك باقىلاۋ كوميتەتى توراعاسىنىڭ ورىنباسارى بولات سماع ۇلىنىڭ سوزىنە قاراعاندا, مۇنداي شەكتەۋلەر جىل سايىن جازعى كەزەڭدە جولدىڭ جوعارعى توسەمىن ساقتاۋ ماقساتىندا ەنگىزىلەدى, ويتكەنى, تەمپەراتۋرا +25 گرادۋستان اسقاندا اسفالت قىزىپ, اۋىر جۇككە شىداس بەرمەيتىن كورىنەدى. سونىڭ سالدارىنان اۋىر سالماقتى كولىك ءجۇرىپ وتكەندە جول جامىلعىسى بۇزىلادى.
بۇل ارادا قوزعالىس شەكتەۋلەرى ءتۇن مەزگىلىندە قويىلمايتىنىن ايتا كەتەيىك. دالىرەگى, جۇك كولىكتەرىنىڭ قوزعالىسىنا شەكتەۋ وڭتۇستىكتە ساعات 10-00-دەن 22-00-گە دەيىن, ال سولتۇستىك جانە ورتالىق وبلىستاردا 11-00-دەن 21-00 ارالىعىندا قويىلادى.
جولدىباي بازار.
دەرەككوز: mtc.kz.
فوتو: 1zoom.ru.