استانا. 18 مامىر. يندۋستريالىق-يننوۆاتسيالىق دامۋ باعدارلاماسى اياسىندا ۇكىمەت باسشىسى كارىم ماسىموۆتىڭ باسشىلىعىمەن ونەركاسىپتىك دامۋ بويىنشا كوميسسيا جۇمىس ىستەيتىن بولادى. ول مەملەكەتتىك ورگاندار مەن ۇلتتىق حولدينگتەردىڭ جۇمىسىن قاداعالايدى. ورتالىق كوممۋنيكاتسيالار قىزمەتىندە وتكەن بريفينگتە پرەمەر-ءمينيستردىڭ ورىنباسارى, يندۋستريا جانە جاڭا تەحنولوگيالار ءمينيسترى اسەت يسەكەشەۆ وسىلاي دەدى. بۇل تۋرالى primeminister.kz حابارلادى.
اسەت يسەكەشەۆ ۇكىمەت باسشىسىنىڭ توراعالىعىمەن ونەركاسىپتىك دامۋ بويىنشا كوميسسيا قۇرىلعانىن ايتا كەلە: «بۇل ورگان يندۋستريالاندىرۋ بويىنشا بارلىق جۇمىستى ۇيلەستىرەدى. ينديكاتورلار مەن تيىمدىلىكتىڭ نەگىزگى كورەستكىشتەرى ەنگىزىلەدى, ايلىق, توقساندىق, جارتى جىلدىق جانە جىلدىق نەگىزدە مونيتورينگ جاسالادى. ارينە, بۇل ۇيلەستىرۋ كوميسسياسى بارلىق مەملەكەتتىك ورگانداردىڭ, ۇلتتىق حولدينگتەردىڭ, اكىمدىكتەردىڭ جۇمىسىن مۇقيات تالداپ, ول ءۇشىن بارلىق قاجەت شارالاردى قولدانادى. كوميسسيا ەسەبى ۇكىمەت مەملەكەت باسشىسىنىڭ الدىندا ەسەپ بەرگەندە جىلىنا ەكى رەت جاريالانادى», – دەدى.
سونداي-اق, ول مەملەكەت پەن كاسىپكەرلىك اراسىندا جاۋاپكەرشىلىك جۇگىن ناقتى ءبولۋ قاراستىرىلاتىن جەتكىزدى. ونىڭ ايتۋىنشا, مەملەكەت ءىرى جوبالاردى, سونىمەن بىرگە, مەملەكەت جول سالۋ, سۋبسيديا بەرۋ سىندى مىندەتتەمەلەردى ءوز موينىنا الادى. وسىلايشا, اتقارۋشى بيلىك ءوز مىندەتتەمەلەرىنە جاۋاپتى بولسا, بيزنەس ءونىم مەن جوبانىڭ ساپاسىنا جاۋاپتى بولماق. بۇل ءۇشىن ارنايى ينۆەستيتسيالىق كەلىسىم تۇزىلەدى.
مەملەكەت پەن بيزنەس اراسىنداعى جاۋاپكەرشىلىكتى ءبولۋدىڭ شارتتارى بويىنشا ۇلتتىق كاسىپكەرلەر پالاتاسى مەن اكىمدىكتەر ايماقتارداعى جوبالاردى تالداپ, ىرىكتەيدى.
جولدىباي بازار.
دەرەككوز: primeminister.kz.
فوتو: primeminister.kz.