ەۋرازيا دامۋ بانكىنىڭ ىقپالداستىق زەرتتەۋ ورتالىعى مەن «قوعامدىق پىكىر» زەرتتەۋ ينستيتۋتىنىڭ ۇيىمداستىرۋىمەن VII استانالىق ەكونوميكالىق فورۋمى اياسىندا «ەۋرازيالىق ىقپالداستىقتى قوعامنىڭ قابىلداۋى» پانەلدى سەسسياسى وتەدى.
بۇل سەسسيا حالىق تاراپىنان ەكونوميكالىق, ساياسي جانە الەۋمەتتىك-مادەني سالالارى بويىنشا تمد مەملەكەتتەرىنىڭ ىنتىماقتاسۋ جانە قاۋىمداسۋ ۇدەرىستەرىن قابىلداۋى ماسەلەسىنە ارنالادى. وندا تمد مەملەكەتتەرىندەگى ىنتىماقتاستىق باعىتتاردى زەرتتەيتىن قازاقستان, رەسەي جانە باسقا مەملەكەتتەردەن جەتەكشى ساراپشىلاردىڭ قاتىسۋى جانە ءسوز سويلەۋى جوسپارلانعان. تمد مەملەكەتتەرىنىڭ حالقى مەن ەليتاسىنىڭ كەدەن وداعى, ءبىرتۇتاس ەكونوميكالىق كەڭىستىك پەن قالىپتاسىپ جاتقان ەۋرازيالىق ەكونوميكالىق وداقتى (ەاو) قابىلداۋى پىكىرتالاستىڭ باستى ماسەلەسىنىڭ ءبىرى رەتىندە قاراستىرىلادى.
سونداي-اق, سەسسيا بارىسىندا ەۋرازيا دامۋ بانكىنىڭ ىقپالداستىق زەرتتەۋ ورتالىعىنىڭ نەگىزگى جوباسىنىڭ ءبىرى – «ەۋرازيا دامۋ بانكىنىڭ ينتەگراتسيالىق بارومەترى» ناتيجەلەرى ۇسىنىلادى. جوبا اياسىندا ەۋرازيالىق ىقپالداسۋدىڭ جانە قاۋىمداسۋدىڭ ءتۇرلى اسپەكتىلەرى بويىنشا قوعامدىق پىكىردى زەرتتەۋ ماقساتىندا تمد وڭىرىندەگى 12 ەلدىڭ تۇرعىندارىنان تۇراقتى تۇردە جىل سايىن ساۋالداما وتكىزۋ قاراستىرىلعان.
تالقىلانۋعا ۇسىنىلاتىن ءماسەلەلەر بويىنشا پىكىرتالاستىڭ نەگىزگى قاتىسۋشىلارى رەتىندە ساراپشىلار, ىقپالداسۋ ۇدەرىستەرىن زەرتتەۋشىلەر, قازاقستان مەن رەسەيدىڭ ءىرى زەرتتەۋ مەكەمەلەرىنىڭ جەتەكشىلەرى, ۋنيۆەرسيتەتتەردەن, زەرتتەۋ قۇرىلىمدارىنان, ساراپتاۋ ورتالىقتارىنان كەلگەن عالىمدار, قازاقستاندا اككرەديتاتسيالانعان مەملەكەتتەردىڭ, حالىقارالىق ۇيىمداردىڭ, مەملەكەتتىك قۇرىلىمداردىڭ وكىلدەرى ءسوز سويلەيدى.
«ەگەمەن-اقپارات».