كەشە ۇكىمەت ۇيىندە قىرعىز رەسپۋبليكاسىنىڭ كەدەن وداعى مەن ءبىرتۇتاس ەكونوميكالىق كەڭىستىككە ەنۋى ماسەلەلەرى بويىنشا قازاق-قىرعىز كەلىسسوزى ءوتتى. قازاقستان جاعىن پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ, قىرعىز تاراپىن وسى ەلدىڭ ەكونوميكا ءمينيسترى تەمىر ساريەۆ باسقاردى, دەپ حابارلادى پرەمەر-ءمينيستردىڭ ءباسپاسوز قىزمەتى.
كەزدەسۋ بارىسىندا قازاقستان ۇكىمەتىنىڭ قولداۋىمەن, قىرعىزستاننىڭ كەدەن وداعىنا قوسىلۋى بويىنشا «جول كارتاسىن» جۇزەگە اسىرۋ ماسەلەلەرى تالقىلاندى.
سونداي-اق, تاراپتار ساۋدا-ەكونوميكالىق ىنتىماقتاستىقتىڭ, اتاپ ايتقاندا, مۇناي-گاز سالاسىنداعى, كەدەن بەكەتتەرىنىڭ جۇمىس ىستەۋىندەگى, اۋىل جانە سۋ شارۋاشىلىعىنداعى, كوشى-قونداعى, ەپيزوتيكالىق جاعدايلارداعى, ۆەتەرينارلىق جانە فيتوسانيتارلىق قاۋىپسىزدىك سالالارىنداعى پەرسپەكتيۆالاردى قارادى.
«ءبىزدىڭ ەلدەرىمىز اراسىنداعى قارىم-قاتىناس ەكونوميكالىق تىعىز بايلانىستا, ىرعاقتى دامۋدا.قىرعىزستاننىڭ كەدەن وداعىنا قوسىلۋى ىنتىماقتاستىعىمىزدى ارتتىرىپ, ءبىزدىڭ ەلدەرىمىز ەكونوميكالارى مەن حالىقتارىنىڭ يگىلىگىنە قىزمەت ەتەتىن بولادى», دەدى ب.ساعىنتاەۆ.
پرەمەر-ءمينيستردىڭ ءبىرىنشى ورىنباسارى ەكى ەل اراسىندا دوستىق قارىم-قاتىناس قالىپتاسقانىن جانە پايدا بولعان بارلىق ماسەلەلەردە تۇسىنىستىك تابىلىپ كەلە جاتقانىن اتاپ كورسەتتى.
ءوز كەزەگىندە, ت.ساريەۆ قىرعىز جاعىنىڭ قازاقستانمەن ەكونوميكالىق ىنتىماقتاستىقتى جانداندىرۋعا ءازىر ەكەندىكتەرىنە جانە تالقىلانعان ماسەلەلەر بويىنشا قولداۋعا يە بولاتىنىنا ءۇمىت ارتاتىندىقتارىنا توقتالدى.