ۇكىمەتتىڭ جول كارتاسىنداعى 10 ناقتى قادامنىڭ ءبىرى قارجى جۇيەسىن دامىتۋ جانە بانك سەكتورىن ساۋىقتىرۋ ەكەنى بەلگىلى. وسى رەتتە ۇلتتىق بانككە قارجى سەكتورىن دامىتۋدىڭ 2030 جىلعا دەيىنگى تۇجىرىمداماسىن الداعى ماۋسىمدا اياقتاۋ تاپسىرىلعان بولاتىن.
تۇجىرىمدامانىڭ نەگىزگى ماقساتى باسەكەگە قابىلەتتىلىك پەن تۇراقتىلىقتى ارتتىرۋ بولماق. بۇل تۋرالى وتكەن سەيسەنبىدە ۇكىمەتتە قارالعان ماسەلەلەرگە وراي ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ۇلتتىق بانك توراعاسى قايرات كەلىمبەتوۆ ءمالىم ەتتى. «تۇجىرىمداما بويىنشا, ءبىزدىڭ ءوز الدىمىزعا قويعان باستى مىندەتتەمەلەرىمىز قازاقستاننىڭ قارجى سەكتورىنىڭ باسەكەگە قابىلەتتىلىگىن ارتتىرۋ, سونىمەن قاتار سوڭعى 10-15 جىلدا ءبىزدىڭ جاھاندىق داعدارىس سەكىلدى جاھاندىق قاتەرلەرگە ۇشىراعانىمىزدى ەسكەرە وتىرىپ, سىرتقى جاعدايلارعا قارجى سەكتورىنىڭ توتەپ بەرۋ قابىلەتىن ارتتىرۋ مەن اتالمىش سىرتقى قاتەرلەرگە تويتارىس بەرۋدە مەملەكەت كەدەرگىسىنەن ارىلتۋ», دەدى ق.كەلىمبەتوۆ. ۇلتتىق بانك توراعاسىنىڭ مالىمەتىنشە, تۇجىرىمداما بىرنەشە كەزەڭگە ءبولىنگەن. ءبىرىنشى كەزەڭدە قاداعالاۋ ورگاندارىنىڭ جۇمىسىنا باسا نازار اۋدارىلادى. ءارى قاراي تۇجىرىمدامانىڭ ورىندالۋى بىرنەشە باستى باعىتتى ەسكەرە وتىرىپ جۇرگىزىلەدى.
سونىمەن قاتار, «2020 جىلعا دەيىن نەگىزگى ترەندتەر بارشىلىق. ەۋرازيالىق ەكونوميكالىق وداق قۇرۋ كەلىسسوزدەرى اياقتالىپ كەلەدى جانە وداق اياسىنداعى ءبىزدىڭ بايقاۋىمىزداعى جاعداي وسى قۇجاتتا ەسكەرىلگەن. سونىڭ ىشىندە ءبىزدىڭ ەۋرازيالىق ينتەگراتسيا اياسىنداعى كەلىسىمدەردىڭ ءبىرى 2025 جىلعا دەيىن قارجىلىق باقىلاۋ ورگانىن قۇرۋ. ول ءوز كەزەگىندە الماتىدا جۇمىس ءىستەيتىن بولادى. سول ۋاقىتقا دەيىن وسى سالاداعى زاڭنامانى ۇيلەستىرۋ بويىنشا ايتارلىقتاي جۇمىستار اتقارىلۋى كەرەك», دەدى ول. ق.كەلىمبەتوۆتىڭ ايتۋىنشا, ەكىنشى باسىم باعىت قازاقستاننىڭ دۇنيەجۇزىلىك ساۋدا ۇيىمىنا ەنۋى بولىپ تابىلادى جانە وسى باعىت بويىنشا كەلىسسوزدەر بيىلعى جىلى اياقتالۋى مۇمكىن. وسى ورايدا وتپەلى كەزەڭ انىقتالىپ, ودان كەيىن كەلىسىم بويىنشا قازاقستاننىڭ قارجى نارىعىندا الەمنىڭ ەڭ ءىرى دەگەن ۇيىمدارى جۇمىس ىستەۋ قۇقىعىنا يە بولماق.
دينارا بىتىكوۆا,
«ەگەمەن قازاقستان».