ۇلى وتان سوعىسى باستالىپ, ەلگە زۇلمات كەزەڭ كەلگەندە 6 جاسار, مەكتەپتىڭ باستاۋىش سىنىبىنا دايىندالىپ جۇرگەن بالا بولاتىنمىن. جاستارى اسكەرگە الۋعا جاتاتىن اكە-اعالاردىڭ بىرقاتارى اتتاندىرىلىپ, ەلگە ولاردان ءۇشبۇرىشتى حاتتار دا كەلە باستادى, ۇرىسقا بارا سالا وققا ۇشىپ ارتتارىن قارا جامىلدىرعان بوزداقتار دا كوپ ەدى.
بەلىمىز قاتايماستان ۇلكەندەردىڭ تىرلىگىنە ارالاسىپ, قولىمىزدان كەلگەن كومەكتەرىمىزدى ءبىز سياقتى جاس بالالار دا كورسەتە باستادىق. ۇلى وتان سوعىسى اياقتالىپ, نەمىس باسقىنشىلارىن ءوز استاناسى بەرليندە تالقانداعاننان كەيىن ەلگە اسكەرلەرىمىز جەڭىسپەن ورالىپ جاتتى. 4-5 رەت جارالانسا دا سول بەرلينگە دەيىن بارىپ, ەلگە قايتۋعا ءناسىپ ەتكەندەردىڭ ءبىرى مەنىڭ نەمەرە اعام ايتجانوۆ سيعابات بولاتىن. حالقىمىزدا «40 جىل قىرعىن بولسا دا اجالدى ولەدى», دەگەن ءسوز بار عوي, سول ءسوز وسى اعاعا ارنالعان با دەپ قالاسىڭ.
بۇل كىسى ورىسشا, قازاقشا, ءتىپتى, ارابشانى دا تازا سويلەيتىن, قازىرگى دارەجەدەگىدەي ورتا نەمەسە جوعارى وقۋ ورىندارىن بىتىرمەگەنىمەن, دۇنيەتانىمى مول, ۇلكەن-كىشىنىڭ ءسوزىن تاۋىپ سويلەي بىلەتىن, قۇيماقۇلاق شەجىرەشىلىگى دە بار, ۇيىمداستىرۋ قابىلەتى دە وتە جوعارى ادام بولاتىن.وسى قاسيەتتەرىنە بايلانىستى بولۋى كەرەك, ول كىسىنى گۋرەۆ وتىن دايىنداۋ مەكەمەسىنە ءبىر باسشىلىق قىزمەتكە تارتتى.ول ءبىر سوعىستان تۇرالاعان شارۋاشىلىقتى جولعا قويۋ, وعان قوسا, ەكى ءۇيدىڭ ءبىرى قارا جامىلىپ قارا قاعاز العان, قايعى-دەرتتىڭ ورنى جازىلماعان قيىنداۋ كەزەڭ ەدى عوي.سول كەزدە ەلدى العا باستاۋ دەگەنىڭىز, ەكىنشى مايدانمەن پارا-پار بولاتىن. گۋرەۆ-ورال توعايلارىنان دايىندالعان اعاشتى جيناپ, كەپتىرىپ, ودان ونى جايىق وزەنى بويىمەن بارجا سۇيرەگەن ساۋساقپەن سانارلىق پاروحودتارمەن قالاعا تاسىتۋ دەگەن وڭاي شارۋا ەمەستىن. قازىرگىدەي كوگىلدىر وتىن تۇگىل كومىردىڭ ءوزى قات كەزدە جىلىلىققا تالپىنباعان كەيبىر وتباسىنىڭ سۋىقتان ءولىپ كەتكەندەرى كەزدەسكەن. اعامىزدىڭ وتان سوعىسىندا العان كونتۋزياعا بايلانىستى شاشتارى ءتۇسىپ قالعان ماڭدايىنىڭ شىپ-شىپ تەرلەپ, كەيبىر تۇندەردى ۇيقىسىز وتكىزگەندىگىن كوزىمىز كورگەن.
مىنە, ۇلى وتان سوعىسىندا ەر اتانىپ, كەۋدەسىن وردەن-مەدالدارعا تولتىرىپ كەلگەن اعامىزدىڭ بەيبىت جاعدايداعى تۋىنداعان قيىن-قىستاۋ كەزەڭدەردى جەڭە ءبىلۋ قاسيەتتەرى بىزگە ۇلگى بولدى. وسىنداي ەلگە تىرەك بولعان اعالار ەسىمدەرى ۇمىتىلماۋى ءتيىس.
سايدەش ەسمۇحانوۆ,
ەڭبەك ارداگەرى, ەڭبەك قىزىل تۋ, «قۇرمەت بەلگىسى» وردەندەرىنىڭ يەگەرى.
اتىراۋ وبلىسى.