قىتايدىڭ شانحاي قالاسىندا «قازاقستان-2050» جالپىۇلتتىق قوزعالىسىنىڭ ۇيىمداستىرۋىمەن قىتايدا تۇراتىن قازاقستان جاستارى ۇيىمدارى كوشباسشىلارىنىڭ سلەتى ءوتتى. جيىنعا بەيجىڭ, شانحاي, سيان, ۋحان جانە ءۇرىمشى قالالارىنان كەلگەن ستۋدەنتتىك ۇيىمداردىڭ جەتەكشىلەرى مەن قىتايداعى قازاق دياسپوراسىنىڭ جاستار وكىلدەرى قاتىستى. شامامەن 500-گە جۋىق دەلەگات قىتايدىڭ ءار قيىرىنان كەلىپ, قازاق جاستارى جات جۇرتتا جۇرسە دە بىرلىگىنەن اينىمايتىنىن تاعى دا ءبىر بايقاتتى.
شارا اياسىندا «قازاقستان-2050» ستراتەگياسىنىڭ ماڭىزى ارنايى ۇيىمداستىرىلعان كونفەرەنتسيادا تالقىلاندى. باسقوسۋ قىتايداعى قازاقستان ەلشىلىگى مەن قىتايداعى قازاقستان ستۋدەنتتەرى قوعامداستىعىنىڭ قولداۋىمەن ءوتتى.
– بۇگىنگى تاڭدا قىتايدا 1,5 ملن. قازاق تۇرادى. بۇل – ەڭ ءىرى قازاق دياسپوراسى. بۇعان قوسا, قىتايداعى جوعارى وقۋ ورىندارىندا جۇزدەگەن قازاقستاندىقتار وقىپ جاتىر. ەرتەڭگى كۇنى ءدال وسى ازاماتتار قازاقستان مەن قىتاي اراسىن جالعاپ, ەل مەن ەلدى بايلانىستىراتىن دانەكەر بولادى. ياعني, ءبىزدىڭ بيزنەس ءۇشىن, جالپى بارلىعىمىز ءۇشىن, دەمەك, ەلىمىزدى ەڭ دامىعان 30 ەلدىڭ قاتارىنا ەنگىزۋ جولىندا سىزدەردىڭ كومەكتەرىڭىز زور بولماق. شانحايدا ءبىز وسى ماسەلەلەردى تالقىلاۋ ءۇشىن جينالاتىن بولامىز. ءدال قازىر ءبىزدىڭ «قازاقستان-2050» ستراتەگياسىن جۇزەگە اسىرۋعا بار كۇشىمىزدى سالۋىمىز ماڭىزدى, –دەيدى قوزعالىس كوشباسشىسى دانات جۋمين.
قىتايداعى قوزعالىس بەلسەندىلەرى تىلەكتەس ادامبەكوۆ پەن ولجاس سۇلەيمەنوۆ شارانىڭ ماقساتى «شەتەلدە ءبىلىم الىپ جاتقان جاستاردىڭ وتانعا دەگەن پاتريوتتىق سەزىمىن نىعايتۋ, مەملەكەتتىك ءتىلدى ناسيحاتتاۋ, «قازاقستان – 2050» ستراتەگياسىنىڭ جۇزەگە اسىرىلۋ جولىنداعى جاستاردىڭ ماڭىزدىلىعىن ءتۇسىندىرۋ» ەكەنىن ايتادى.
كەزدەسۋدەن بولەك, شارا اياسىندا قىتايدىڭ ءار قالاسىنان كەلگەن كوڭىلدى تاپقىرلار كلۋبىنىڭ ويىندارى وتەدى. وعان قازاقستاننان «جايدارمان» كومانداسىنىڭ قاتىسۋى دا جوسپارلانىپ وتىر. ال وسى جەردە ايتا كەتەتىن جايت – «قازاقستان-2050» جالپىۇلتتىق قوزعالىسى 2013 جىلدىڭ 6 جەلتوقسانىندا ءبىر توپ كوشباسشى جاستاردىڭ ىنتاسىمەن قۇرىلعان ەدى.
«ەگەمەن-اقپارات».