كوشپەلى قازاق حالقىنىڭ بايتەرەكتىڭ تامىرى ءتارىزدى تەرەڭدە جاتقان تاريحىنا ۇڭىلەتىن بولساق, ەگەمەندىكتىڭ تىزگىنى قازاق حالقىنا وڭايلىقپەن كەلگەن جوق. وتكەن تاريحىن بىلمەگەن ادام جەتەسىز دەمەكشى, تاريحىمىزدى دارىپتەپ, وتكەنىمىز بەن بۇگىنىمىزدى سارالاي بىلگەنىمىز ءجون.
وتكەن تاريحىمىزداعى جوڭعار باسقىنشىلارىنا قارسى كۇرەستەر, پاتشا وكىمەتىنە قارسى باس كوتەرۋلەر, ۇلى وتان سوعىسى, سونداي-اق, تاۋەلسىزدىكتى اڭساعان جاستاردىڭ نارازىلىعىنان تۋىنداعان جەلتوقسان كوتەرىلىسى سىندى قازاق تاريحىنداعى كوپتەگەن ەلەۋلى وقيعالار ەلىمىزدىڭ تاۋەلسىزدىگى جولىنداعى ماڭىزدى قادامدار بولىپ تابىلادى.
حاندىق جۇيەدەن كەيىنگى رەسەي وكىمەتىنىڭ وتارلاۋ ساياساتى سايىن دالا توسىندە كوك شالعىنعا اۋناپ وسكەن قازاق حالقى ءۇشىن ۇلكەن سىن بولدى. وتارشىلدىق ەزگىنىڭ قۇرساۋىندا وتكەن 70 جىل ىشىندە قازاق حالقىنا ءتىلى مەن دىنىنەن, ادەت-عۇرپى مەن سالت-ساناسىنان ايىرىلۋ قاۋپى تونگەن بولاتىن. الايدا, حالقىمىز بابامىزدىڭ قانىمەن, انامىزدىڭ اق سۇتىمەن بويىنا دارىعان ۇلتتىق قۇندىلىقتارىن جوعالتقان جوق.
«قازاقستاننىڭ تاۋەلسىزدىگى قازاقتارعا تارتقان تاعدىردىڭ سىيى ەمەس, ءوزىنىڭ ەجەلگى جەرىندە قيلى كەزەڭدەردى باستان كەشۋ ارقىلى قولى جەتكەن زاڭدى قۇقىعى», دەپ كورەگەن ەلباسىمىز نۇرسۇلتان نازارباەۆ ايتقانداي, قازاق حالقىنىڭ باستان وتكەرگەن تاريحى – ۇيالاتىن تاريح ەمەس, ماقتاناتىن تاريح. سەبەبى, قازاق حالقى وزگە حالىقتاردىڭ تاعدىرىنا ەشقاشان قيانات جاساعان جوق, تەك ءوزىنىڭ ازاتتىعى جولىندا ولىسپەي, بەرىسپەدى. مىڭ ءولىپ, مىڭ تىرىلگەن حالقىمىزدىڭ ەجەلدەن اڭساعان اسىل مۇراتى ەگەمەندىكتىڭ تۋىن تىگۋ بولاتىن.
كيەلى قازاق جەرىندە 1991 جىلىڭ 16 جەلتوقسانىندا كوپتەن كۇتكەن ۇلى توي – تاۋەلسىزدىككە قولىمىز جەتىپ, اشىق اسپان استىندا كوك تۋىمىز جەلبىرەدى. تاۋەلسىزدىكپەن بىرگە ەگەمەن قازاقستاننىڭ جاڭا تاريحىنداعى جاڭا بەتتەر اشىلدى. ەلباسىمىزدىڭ سايلانۋى, ۇلتتىق ۆاليۋتامىز – تەڭگەنىڭ قولدانىسقا ەنۋى, مەملەكەتتىك رامىزدەرىمىز بەن اتا زاڭىمىز – كونستيتۋتسيانىڭ قابىلدانۋى, قازاقستاننىڭ حالىقارالىق ۇيىمدارعا مۇشە بولۋى مەن سارىارقانىڭ ءتوسىندە, ەركە ەسىلدىڭ بويىندا ارۋ استانامىزدىڭ بوي كوتەرۋى – ەگەمەندىگىمىزدىڭ جەمىسى.
ەگەمەندىك الۋ جولىندا اتا-بابالارىمىز قانشاما تەر توككەن بولسا, قازىرگى تاڭدا ەگەمەندىگىمىزدى ساقتاپ تۇرۋ دا بولاشاق ۇرپاقتىڭ سونشالىقتى تەر توگۋىن قاجەت ەتەدى. تاۋەلسىز قازاقستاننىڭ ءاربىر ۇلانىنىڭ بويىندا ەلگە دەگەن قۇرمەت پەن سۇيىسپەنشىلىك سەزىمىنىڭ بولۋى زاڭدى. كەڭ-بايتاق قازاقستانىمىزدىڭ تاۋەلسىزدىگىن كوزىمىزدىڭ قاراشىعىنداي ساقتاۋ – بىزگە جۇكتەلگەن مىندەت!
مىنە, بۇگىندە تاۋەلسىزدىگىمىزدى الىپ, ەڭسەمىزدى تىكتەگەلى 22 جىل بولدى. قازاقستان جاس تا بولسا, 22 جىلدىڭ ىشىندە كوپتەگەن جەتىستىكتەرگە قول جەتكىزىپ, دامىعان مەملەكەتتەرمەن تەرەزەسى تەڭ دارەجەگە كوتەرىلدى. تاۋەلسىزدىك العاننان كەيىن ەلباسىمىز نۇرسۇلتان نازارباەۆتىڭ باسشىلىعىمەن قازاقستان حالقى ىنتىماقتاسىپ, ۇلتارالىق بىرلىكتى نىعايتۋعا قول جەتكىزدى. سونداي-اق, قازاق حالقىنىڭ بولمىسىنان بويىنا دارىعان تاتۋلىعى مەن قوناقجايلىلىعىنىڭ ناتيجەسىندە قازاق شاڭىراعىنىڭ استىندا ءتۇرلى ۇلت وكىلدەرى بەيبىت كۇن كەشىپ, قازاقستان وزگە مەملەكەتتەرمەن ءتۇرلى ديپلوماتيالىق قارىم-قاتىناستار ورناتۋدا.
«قازاقستان-2050» ستراتەگيالىق دامۋ باعدارلاماسىن قابىلداۋ ارقىلى قازاقستاننىڭ بولاشاعىنا جارقىن جوسپارلار قۇرىلدى. ەلباسىمىزدىڭ كورەگەندىلىكپەن جۇرگىزگەن ساياساتتارى حالىقتىڭ كوڭىلىنە سەنىم ۇيالاتىپ, ەگەمەندىگىمىزدى تۇعىرلى ەتۋگە باعىتتالدى. قازاق ەلى بۇگىنگى كۇنى الەمدىك قوعامداستىقتىڭ لايىقتى مۇشەسى رەتىندە دامۋ ۇستىندە. وسى ورايدا اتاپ وتەتىن جايت, قازاقستان 2012 جىلى ەلوردامىز استانادا ەكسپو-2017 كورمەسىن وتكىزۋ قۇرمەتىنە يە بولدى. بۇل – ءبىزدىڭ باسەكەگە قابىلەتتى ەلگە اينالعانىمىزدىڭ ايعاعى. كورمەنى ءساتتى وتكىزۋ ەلىمىزدىڭ العا قويعان باستى ماقساتتارىنىڭ ءبىرى بولىپ وتىر.
«ەرتەڭگى ەل بولاشاعى كەلەشەك ۇرپاقتىڭ قولىندا», دەپ ەلباسى كەلەشەك ۇرپاققا ۇكىلى ءۇمىت ارتادى. ارينە, قازىرگى قازاقستاندا ءبىلىمى مەن پاراساتى, ونەرى مەن دارىنى, ادامگەرشىلىگى مەن مادەنيەتتىلىگى, ۇلتجاندىلىعى مەن ەلگە دەگەن سۇيىسپەنشىلىگى ۇيلەسىم تاپقان ۇرپاق ءوسىپ كەلەدى. دەمەك, ەگەمەن ەلىمىزدىڭ ەرتەڭى ەڭسەلى بولاتىنىنا ەش كۇمان بولماۋى ءتيىس.
دينارا دوسپان,
№69 مەكتەپ-گيمنازيانىڭ
11-سىنىپ وقۋشىسى.
استانا.