ادەتتە مەن جاڭا اۋديتوريانىڭ, ونىڭ ىشىندە قوردىڭ جاڭا سەرىكتەسىنىڭ نە باعدارلامانىڭ جۇمىسىن بايقاۋعا كەلگەن حالىقارالىق ۇيىمداردىڭ وكىلدەرىنىڭ الدىندا كەلىسىلگەن اقشالاي جاردەماقىلار باعدارلاماسى (كاجب) تۋرالى اڭگىمەلەۋ بارىسىندا «بىرەگەيلى» دەگەن ءسوزدى كوپ قولدانامىن. بۇل ءسوز ناقتى وسى يننوۆاتسيالىق باعدارلامانى سيپاتتاۋعا لايىق دەپ سانايمىن, سەبەبى, ول الەمنىڭ 20-دان استام ەلىندە الەۋمەتتىك قامسىزداندىرۋ باعىتىندا پايدالانىلىپ كەلە جاتقان ەڭ جاڭا قۇرال بولىپ تابىلادى.
بىرەگەيلى اقپاراتتى باسقارۋ جۇيەسى, بىرەگەيلى ەرىكتىلەر جۇيەسى, بەنەفيتسيارلار ساناتتارىنىڭ بىرەگەيلىگى جانە باستى بىرەگەيلىگى – كاج باعدارلاماسى مەملەكەت تاراپىنان ەمەس, كوممەرتسيالىق ەمەس ۇيىمنىڭ تاراپىنان ءجۇزەگە اسىرىلادى. سونداي-اق, مەنىڭشە, «بوتا» قورىنىڭ كاج باعدارلاماسىنىڭ بىرەگەيلىگى – ءتورت جىلدىڭ ىشىندە سانالى تۇردە قىزمەتكەرلەردىڭ, ەرىكتىلەردىڭ جانە بەنەتسيارلاردىڭ بويىندا قالىپتاسقان ادامدارعا دەگەن قارىم-قاتىناستا.
از قامتىلعان وتباسىلار ەلىمىزدە ءبىرىنشى رەت قايىرىمدىلىق شارانىڭ نىسانى عانا ەمەس, ولار ءوز بالالارىنىڭ جارقىن بولاشاعىن جاقسارتۋ ماقساتىندا الەۋمەتتىك باعدارلامانىڭ تولىققاندى قاتىسۋشىسىنا اينالدى. باعدارلاما قىزمەتكەرلەرى: «ءبىز ولارعا جاردەماقى تولەيمىز», دەگەندى اۋزىنا العان ەمەس, كەرىسىنشە, ولار: «ءبىز ادامدارعا ءوز بالالارىنىڭ ەرتەڭگى كەلەشەگىن جاقسارتۋ ءۇشىن كومەكتەسەمىز», دەيدى. ەرىكتىلەر دە ءومىر ءسۇرۋدى ۇيرەتپەيدى, تەك «تەڭ-تەڭىمەن» فورماتىندا كەشە عانا وزدەرى العان جاڭا اقپاراتپەن ءبولىسەدى. باعدارلاما وسىنداي ەكىجاقتى ءوزارا تۇسىنىستىك پەن جاۋاپكەرشىلىككە نەگىزدەلگەن. كاج باعدارلاماسىنىڭ قىزمەتكەرلەرى مەن ەرىكتىلەرىن ۇيرەتۋ «از قامتىلعان وتباسىنىڭ پورترەتىن» سۋرەتتەۋدەن جانە ونىڭ مىقتى جاقتارى مەن جاڭا مۇمكىندىكتەرىن انىقتاۋدان باستالادى. ياعني, ءبىز وتباسىنىڭ السىزدىگى مەن قيىندىقتارىن تالقىلامايمىز. بۇل ءتاسىل ترەنينگ قاتىسۋشىلارى ءۇشىن بالالاردىڭ بولاشاعى ءۇشىن جاۋاپكەرشىلىكتى تيەك ەتكەن باعدارلامانىڭ بىرەگەيلىگى مەن مىقتىلىعىن تۇسىنۋگە كومەكتەسەدى.
باعدارلامانىڭ جۇزەگە ءساتتى اسۋى «بوتا» قورىنىڭ قىزمەتكەرىنىڭ, ەرىكتىلەرى مەن قاتىسۋشى وتباسىلاردىڭ ءوزارا ىنتىماقتاستىققا جانە تەڭ-تەڭىمەن قاعيداسىنا نەگىزدەلىپ جۇمىس جاساۋىنا عانا بايلانىستى. وسى جىلدىڭ سوڭىندا باعدارلاما ءوز جۇمىسىن اياقتايدى, وسىعان وراي, ونىڭ ناتيجەلەرىن ەسكە العانىمىز ءجون بولار. كاج باعدارلاماسى 150 مىڭنان استام قاتىسۋشىسىنا قولداۋ كورسەتتى, ال ولاردىڭ وتباسىندا ورتاشا ەسەپپەن العاندا 470 مىڭعا جۋىق ادام تۇرادى. باعدارلاماعا قاتىسقان ادامدارعا قور 8 ملرد.تەڭگەدەن استام جاردەماقى تولەدى.
«بوتا» قورى الەۋمەتتىك باعدارلامالار جونىندەگى ادىستەمەلەرىن مەملەكەتكە ۇسىندى – ەڭبەك جانە حالىقتى الەۋمەتتىك قورعاۋ مينيسترلىگىنە, ءبىلىم جانە عىلىم مينيسترلىگى مەن دەنساۋلىق ساقتاۋ مينيسترلىگىنە. ياعني, 4 جىل ىشىندە جاسالعان جۇمىس ءوز جالعاسىن تابۋى ابدەن مۇمكىن. ال انا مەن بالانىڭ دەنساۋلىعىن كۇتۋ, ۇيدەگى كۇتىمدى جاقسارتۋ, بالالاردىڭ مەكتەپكە دايىن بولىپ كەلۋىن قامتاماسىز ەتۋ, بالالارىن ءتۇسىنىپ, ولارعا قولداۋ كورسەتەتىن اتا-انالار سانىنىڭ ارتۋى – كاجب-عا قاتىسقان جەكەلەگەن وتباسىلار مەن جەرگىلىكتى قاۋىمداستىق اياسىندا ءوز جالعاسىن ارمەن قاراي تابادى دەپ سەنەمىز. سونىمەن قاتار, ەرىكتىلەردىڭ دە جۇمىسى العا ورلەي بەرمەك, ولاردىڭ بىرقاتارى بيىل اقمولا جانە جامبىل وبلىستارىندا جۇزەگە اسىرىلا باستاعان «جۇمىسپەن قامتۋ-2020» جول كارتاسى اياسىندا جۇمىس جاسايتىن مەملەكەتتىك «ورلەۋ» جوباسىنا تارتىلدى.
ال قىزمەتكەرلەر قاي جەردە ەڭبەك ەتسە دە ادامعا دەگەن قۇرمەتتىڭ ماڭىزدىلىعىن ارقاشان جوعارى قوياتىن بولادى. وسى قاسيەتتەر ارمەن قاراي جالعاسىپ, ءتىپتى, «بوتا» قورىنىڭ كاج باعدارلاماسى تۋرالى ەشقاشان ەستىمەگەن ادامدارعا دا ءوز سەپتىگىن تيگىزەدى دەپ ۇمىتتەنەمىز.
ەلەنا ۆينوگرادوۆا,
«بوتا» قورى كاج باعدارلاماسىنىڭ كەڭەسشىسى.