Amanat پارتياسى جانىنداعى ازاماتتىق قوعام مەن مادەنيەتتى دامىتۋ جونىندەگى Miras رەسپۋبليكالىق قوعامدىق كەڭەسىنىڭ كەزەكتى وتىرىسى ءوتتى. وتىرىستا كەڭەس مۇشەلەرى مەملەكەت باسشىسى قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىنىڭ باسىم باعىتتارىن تالقىلادى.
كەڭەس توراعاسى, پارلامەنت ءماجىلىسىنىڭ دەپۋتاتى امانجول ءالتاي وتىرىستىڭ باستى ماقساتى ەلىمىزدە قولعا العان رەفورمالاردىڭ ءمان-ماعىناسىن, جولداۋدىڭ باسىم باعىتتارىن قوعامعا جەتكىزىپ, حالىقتى ۇيىستىرۋ, العا قويعان مىندەتتەردى جۇزەگە اسىرۋعا قوعاممەن بىرلەسىپ ىقپال ەتۋ ەكەنىن جەتكىزدى.
«مەملەكەت باسشىسىنىڭ قازاقستان حالقىنا جولداۋىنىڭ اۋقىمى كەڭ, مازمۇنى ەرەكشە. جولداۋدا كوتەرىلگەن بايىپتى باستامالار قوردالانعان ماسەلەلەردىڭ شەشۋ جولدارىن ايقىنداپ, مەملەكەتتى ودان ءارى جاڭعىرتۋ ىسىنە جاڭا مىندەتتەر قويىپ, تۇرعىنداردىڭ ءال-اۋقاتىن ارتتىرۋعا سەرپىن بەرەدى. «ادىلەتتى مەملەكەت. ءبىرتۇتاس ۇلت. بەرەكەلى قوعام» – اماناتقا ادال, ەڭسەلى ەل بولۋ جولىنداعى ايقىن ماقسات. جاڭا ەكونوميكالىق ساياسات, ناقتى سەكتوردى دامىتۋ, ەل بولاشاعىنا ارنالعان ستراتەگيالىق ينۆەستيتسيا, مەملەكەتتىك باسقارۋ ءىسىن قايتا جاڭعىرتۋ, زاڭ جانە ءتارتىپ ۇستەمدىگى – مەملەكەت باسشىسى ۇسىنعان جولداۋدىڭ ماڭىزدى باعدارلارى. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى نەگىزىندە پرەزيدەنت قولعا العان رەفورمالاردى ىسكە اسىرۋ – ورتاق ماقساتىمىز. ول ءۇشىن ۇلتتىق تۇتاستىق, ورتاق ماقسات جولىندا بىرىگۋ, ادىلەتتىلىك, جاڭاشىلدىق پەن تاباندىلىق, ءبىلىم مەن بىلىكتىلىك, مەملەكەتتىك مىنەز قاجەت», دەدى امانجول ءالتاي.
ءوز كەزەگىندە, پارلامەنت ءماجىلىسىنىڭ دەپۋتاتى دارحان مىڭباي پرەزيدەنت جولداۋىندا ايتىلعان ماسەلەلەردى حالىققا جەتكىزۋ – باستى ماقسات ەكەنىن جەتكىزدى. ماڭىزدى قۇجاتتاعى ويلاردى ورتاعا سالىپ, ونى جۇزەگە اسىرۋ ماسەلەسىنە ءمان بەرۋ قاجەت ەكەنىن اتاپ ءوتتى.
«بۇگىنگى مەملەكەتتىك باسقارۋ ءىسىن جاڭعىرتۋ جۇمىسى ەڭ الدىمەن جاڭا ەكونوميكالىق ساياساتقا قاتىستى بولماق. سەبەبى كەز كەلگەن ءىستىڭ ار جاعىندا قارجى كوزى بولماسا, باستامانىڭ بارلىعى قۇر جالاڭ سوزگە اينالادى. سوندىقتان پرەزيدەنتتىڭ «ازامات-بيزنەس-مەملەكەت» اراسىنداعى قاتىناستى تۇبەگەيلى وزگەرتەمىز دەگەن ءسوزى كوپتىڭ كوڭىلىنەن شىعىپ وتىر», دەدى دەپۋتات.
ال سەنات دەپۋتاتى دينارا نوكەتاەۆا جولداۋدا ايتىلعان ۇلتتىق قوردىڭ جىل سايىنعى ينۆەستيتسيالىق تابىسىنىڭ ءبىر بولىگىن بالالارعا اۋدارۋ ماسەلەسىنە توقتالدى. «قازاقستاندا جىل سايىن 420 مىڭعا جۋىق بالا دۇنيەگە كەلەدى. بۇل رەتتە «ۇلتتىق قور – بالالارعا» باعدارلاماسى ادىلەتتى قازاقستان قۇرۋ جولىنداعى اسا ماڭىزدى باستاما بولىپ وتىر. بۇل – ەل ەرتەڭىنە نەگىزدەلگەن ستراتەگيالىق ينۆەستيتسيا, ۇرپاق قامىن ويلاعان ۇتىمدى باعدارلاما», دەدى سەناتور.
ءماجىلىس دەپۋتاتى جاناربەك ءاشىمجان جولداۋدا كورىنىس تاپقان ماڭىزدى ماسەلەنىڭ ءبىرى – يگەرىلمەي جاتقان جەردى مەملەكەت مەنشىگىنە قايتارۋ جۇمىسى جايلى ايتتى. «جولداۋدا مەملەكەت باسشىسى جىل سوڭىنا دەيىن اۋىل شارۋاشىلىعى ماقساتىنداعى 5 ملن گەكتار جەردى قايتارۋ جوسپارلانىپ وتىرعانىن جەتكىزدى. بۇل يگى ىستە پارتيا جانىنداعى «جەر اماناتى» كوميسسياسىنىڭ ۇلەسى ۇشان-تەڭىز. اتالعان كوميسسيا مەملەكەت باسشىسىنىڭ پارمەنىمەن قۇرىلعان بولاتىن. بۇگىندە ادىلەتتىلىكتى قالپىنا كەلتىرۋ ماقساتىندا ءبىر كەزدەرى زاڭسىز جەكە مەنشىككە ءوتىپ كەتكەن جەرلەردى مەملەكەت مەنشىگىنە قايتارۋ جۇمىسى قارقىندى ءجۇرىپ جاتىر. قازىر قوعامدا جايىلىم, شابىندىق ماسەلەسى وتە وزەكتى. سوندىقتان پرەزيدەنت جولداۋىنداعى جەر ماسەلەسىنىڭ ماڭىزى زور», دەدى ج.ءاشىمجان.
پارلامەنت ءماجىلىسىنىڭ دەپۋتاتى ايدوس سارىم ەلىمىزگە جاڭا ساياسي وزگەرىستەر اۋاداي قاجەت ەكەنىن العا تارتتى. ونىڭ ايتۋىنشا, مۇنداي وزگەرىستەرگە بەل بۋمايىنشا ادىلەتتى قازاقستاندى قۇرۋ, جارقىن بولاشاققا ۇمتىلۋ, جاڭا ساياسي داۋىرگە قادام باسۋ مۇمكىن ەمەس.
نۇر-سۇلتان قالاسى تۇرىك ەتنومادەني ورتالىعىنىڭ توراعاسى اسكەر پيريەۆ كەڭەس مۇشەلەرىنىڭ نازارىن جولداۋدا ايتىلعان كاسىپكەرلىكتى دامىتۋ مەن ينۆەستيتسيا ماسەلەسىنە اۋداردى. «مەملەكەت باسشىسى جولداۋدا كاسىپكەرلىكتى جۇيەلى تۇردە قولداۋ ماسەلەسىنە ەرەكشە توقتالدى. ءتىپتى زاڭنامالىق قۇجات پەن نۇسقاۋلىقتى قايتا-قايتا تۇزەتە بەرۋدىڭ ورنىنا ىقشام ءارى تۇسىنىكتى جاڭا ەرەجەلەردى بەكىتكەن ءجون دەپ ساناپ, بۇل ءتاسىلدى 2024 جىلدان باستاپ ەنگىزۋ قاجەت ەكەنىن جەتكىزدى. پرەزيدەنتتىڭ بۇل ۇسىنىسىن تولىق قولدايمىن. ەكونوميكانىڭ لوكوموتيۆى – شاعىن جانە ورتا بيزنەس. سوندىقتان مەملەكەت كاسىپكەرلەرگە كەدەرگى كەلتىرمەي, كەرىسىنشە قولداۋ كورسەتۋگە ءتيىس. مەملەكەت كاسىپكەرلەردىڭ جۇمىسىن تەكسەرۋ ەمەس, باقىلاپ وتىرۋى قاجەت», دەدى ءا.پيريەۆ.
م.س.نارىكباەۆ اتىنداعى كازگيۋ ۋنيۆەرسيتەتىنىڭ باسقارما توراعاسىنىڭ ورىنباسارى اينۇر كاربوزوۆا جولداۋداعى ءبىلىم سالاسىنا قاتىستى ايتىلعان ويلاردىڭ ماڭىزدىلىعىنا ءمان بەردى. «وكىنىشكە قاراي, قازىرگى تاڭدا ەلىمىزدەگى مەكتەپ وقۋشىلارىنىڭ 80 پايىزدان استامى بولاشاق ماماندىقتى قالاي تاڭداۋ كەرەك ەكەنىن بىلمەيدى. كاسىبي باعدار الماعان. بۇل رەتتە پرەزيدەنت بيىلعى جولداۋىندا جوعارى ءبىلىم سالاسىنا قاتىستى بىرنەشە ماڭىزدى باستاما كوتەردى. سونىڭ ىشىندە, ينجەنەرلىك-تەحنيكالىق ماماندار دايىندىعىن كۇشەيتۋ, جوعارى وقۋ ورىندارىنداعى ءبىلىم ساپاسىن جاقسارتۋ, گرانتتار سانىن كوبەيتۋ, جاستاردىڭ جاعدايىن جاقسارتۋ ماسەلەلەرىنە ەرەكشە نازار اۋدارىلدى. بۇل باستامالار – جاستار قاۋىمى ءۇشىن اسا ماڭىزدى», دەدى اينۇر كاربوزوۆا.
سونداي-اق وتىرىس بارىسىندا كەڭەستىڭ تۇراقتى مۇشەلەرىمەن قاتار, ارنايى شاقىرىلعان قوناقتار دا ءسوز سويلەدى. ورامدى ويلارىن ورتاعا سالدى. «بارلىق پىكىر بىلدىرگەن ازاماتتارعا العىس ايتامىن. راسىندا, جولداۋدىڭ باسىم باعىتتارى ۇلتتى ۇيىستىرىپ, ءال-اۋقاتىن ارتتىرىپ, بىرلىگىن بەكەم ەتەدى دەپ سەنەمىن», دەپ تۇيىندەدى امانجول ءالتاي.