شىمكەنت. 28 ءساۋىر. شىمكەنت قالاسى اباي اۋداندىق سوتى 2012 جىلى 25 جەلتوقساندا «ان-72» اسكەري ۇشاعىنىڭ اپاتقا ۇشىراۋىنا اۋە ديسپەتچەرى قانات اقىلبەكوۆتى ايىپتى دەپ تاپتى. بۇل تۋرالى Today.kz حابارلادى.
«كازاەروناۆيگاتسيا» كومپانياسى شىمكەنت فيليالىنىڭ بۇرىنعى قىزمەتكەرى ق.اقىلبەكوۆ قىلمىستىق كودەكستىڭ «ابايسىزدا ەكى نەمەسە ودان دا كوپ ادامنىڭ ولىمىنە سوقتىرعان اۋە كولىگى قوزعالىسى قاۋىپسىزدىگى ەرەجەلەرىن بۇزۋ» بابى نەگىزىندە جاۋاپكەر دەپ ۇيعارىلعان. ءىستى قاراعان سۋديا سايدباتتال توقبەرگەنوۆ ايىپتالۋشىعا جازاسىن 6 جىل قونىستاندىرۋ كولونياسىندا وتەۋىنە ۇكىم شىعاردى. سونداي-اق, سۋديا وعان 3 جىل اۋە ديسپەتچەرى جۇمىسىن اتقارۋعا توقتام سالدى.
ەستەرىڭىزە سالا كەتەيىك, 2012 جىلدىڭ 25 جەلتوقسانىندا شىمكەنت قالاسى ماڭىندا «ان-72» ۇشاعى قۇلاپ, بورتتاعى 27 ادام تۇگەل قازا تاپقان. مارقۇمداردىڭ جەتەۋى ەكيپاج مۇشەلەرى بولسا, جيىرماسى اسكەري قىزمەتكەر ەدى.
جولدىباي بازار.
دەرەككوز: Today.kz.
فوتو: Nur.kz.