اتىراۋ. 28 ءساۋىر. اتىراۋدا ۇلى وتان سوعىسىنىڭ ارداگەرى, بۇگىندە ساۋ-سالامات ءجۇرىپ جاتقان الەكساندر پوگاداەۆ دەگەن قاريا 13 جىلداي ولىلەر تىزىمىندە تۇرعان. بۇل تۋرالى «قازاقپارات» حابارلادى.
باقانداي 13 جىل قايتىس بولعاندار قاتارىنا جاتقىزىلىپ كەلگەن الەكساندر پوگاداەۆ ءساتى ءتۇسىپ, قايتادان تىرىلەر تىزىمىنە ەنگىزىلدى. سوعىس ارداگەرىنىڭ نەمەرەسى ولگا سبيتنەۆا: «بىزگە جىبەرىلگەن قاتەلىكتىڭ تۇزەتىلگەنى حابارلاندى. ەندى مەنىڭ اتام حالىققا قىزمەت كورسەتۋ ورتالىعىنا كەز كەلگەن انىقتاما الۋ ءۇشىن جۇگىنە الادى», – دەدى.
الەكساندر پوگاداەۆتىڭ ولىلەر تىزىمىندە ەكەنى كەزدەيسوق انىقتالىپتى. قاريا حالىققا قىزمەت كورسەتۋ ورتالىعىنا مەكەن-جاي انىقتاماسىن الۋعا بارادى. ال ورتالىق قىزمەتكەرلەرى وعان: «ا.پوگاداەۆ دەگەن ازامات تۋرالى مالىمەت بازامىزدا جوق, ول 2001 جىلدان ولگەندەر قاتارىندا», – دەگەن مازمۇنداعى كەلەڭسىز حاباردى جەتكىزەدى. مۇنى ەستىگەن ارداگەر اڭ-تاڭ قالادى...
قاريانىڭ نەمەرەسى ولگا سبيتنەۆا: «ءبىز قاتەلىكتى تۇزەتۋدى سۇرادىق. كەتكەن كەمشىلىكتى جوندەۋ كوشى-قون پوليتسياسىنىڭ قۇزىرىنداعى ءىس ەكەن. سوسىن اتامىزدىڭ جەر باسىپ جۇرگەنىن راستايتىن مەديتسينالىق قورىتىندى تالاپ ەتىلدى. ءبىز سۇراعان انىقتاماسىن اپارىپ بەردىك. ارادا ءبىرشاما ۋاقىت وتكەن سوڭ حالىققا قىزمەت كورسەتۋ ورتالىعىنان اتامىزدىڭ مەكەن-جاي انىقتاماسىن الۋ ءۇشىن ەشقانداي كەدەرگى بولمايتىنى حابارلاندى. بۇل جەڭىس كۇنىنە وراي ۇلكەن سىيلىق بولدى», – دەدى.
الەكساندر پوگاداەۆ وسال ادام ەمەس كورىنەدى. ول – ۇلى وتان سوعىسىنىڭ ارداگەرى ءارى وتستاۆكاداعى ىشكى ىستەر پولكوۆنيگى. سونداي-اق, بۇل قاريا اتىراۋلىق تانىمال «فرونتوۆيچكا» سوعىس جانە ەڭبەك ارداگەرلەرى حورىنىڭ ءانشىسى رەتىندە دە بەلگىلى.
بيىل 90 جاسقا تولاتىن ارداگەر جەڭىس كۇنى مەرەكەسىنە بايلانىستى ۇيىمداستىرىلعالى وتىرعان كونتسەرتتىك شارالاردا ونەر كورسەتپەك.
جولدىباي بازار.
دەرەككوز: «قازاقپارات».
فوتو: Kostanay.gov.kz.