اتىراۋ. 28 ءساۋىر. وسىدان بىرەر كۇن بۇرىن پارا الۋ كەزىندە ۇستالىپ, ارتىنان قاشىپ كەتكەن اتىراۋ وبلىسى يساتاي اۋداندىق ىشكى ىستەر ءبولىمىنىڭ باستىعى التىنبەك قۇبايدۋلليننىڭ ءولى دەنەسى تابىلدى. بۇل تۋرالى «اق جايىق» گازەتى حابارلادى.
اۋداندىپ پوليتسيا باستىعى تەرگەۋ كەزىندە قان قىسىمى كوتەرىلىپ, سودان اۋرۋحاناعا جەتكىزىلەدى. ول سول جەردەن ەبىن تاۋىپ قاشىپ شىققان.
اتالعان باسىلىمنىڭ حابارلاعانىنداي, التىنبەك قۇبايدۋلليننىڭ ءولى دەنەسى 27 ساۋىردە اتىراۋ قالاسىنىڭ گۋرەۆسكي كوشەسىندەگى قۇرىلىس نىساندارىنىڭ بىرىنەن تابىلعان.
قازىرگى جورامال بويىنشا, ول ءوز-وزىنە قول سالعان بولۋى مۇمكىن. وسىعان قاتىستى جۇرتشىلىقتىڭ اراسىندا ءارتۇرلى الىپ-قاشپا اڭگىمەلەر ايتىلۋدا. بىرەۋلەر ونى كىسى قولىنان قازا تاپتى دەپ ساناۋدا. دەگەنمەن, مۇنىڭ جاي-جاپسارى سوت-مەديتسينالىق ساراپتامادان كەيىن بەلگىلى بولماق.
ەستەرىڭىزدە بولار, يساتاي اۋداندىق ىشكى ىستەر ءبولىمىنىڭ باستىعى ا.قۇبايدۋللين 250 مىڭ تەڭگە كولەمىندە پارا الۋ كەزىندە قارجى پوليتسياسىنىڭ قولىنا تۇسكەن. سول ساتتە ودان 3 كيلوگرامم قارا ۋىلدىرىق تا تاركىلەنگەن ەدى.
قازىر وسى تىزبەكتى وقيعاعا قاتىستى ءتيىستى ورىندار تەكسەرۋ جۇمىستارىن جۇرگىزۋدە.
جولدىباي بازار.
دەرەككوز: «اق جايىق» گازەتى.
فوتو: egemen.kz.